Read Iban 2 Samuel 5 Bible Online

2 Samuel 5 - Iban bible

2 Samuel 5

¹Udah nya semua tuai raban bansa orang Israel betemu enggau David di Hebron, lalu bejaku munyi tu: “ Kami tu kaban belayan nuan.

²Indah lebuh Saul nyadi raja, deh nuan nguluka bansa kitai beperang. Lalu TUHAN udah besemaya madahka nuan deka megai perintah di menua Israel lalu ngibun kami baka pengibun bedus.”

³Nya meh maya David ngaga siti sempekat enggau bala tuai, lalu minta TUHAN nyadika saksi sida. Udah nya bala tuai nata pala David ngena minyak kana, kena nandaka iya diatu nyadi raja menua Israel.

⁴ Umur David tiga puluh taun lebuh iya nyadi raja, lalu iya merintah empat puluh taun.

⁵Iya megai perintah menua Judah di Hebron tujuh taun setengah. Udah nya iya pindah ngagai Jerusalem alai iya ke megai perintah di menua Israel enggau menua Judah tiga puluh tiga taun.

⁶ Maya pen nyau datai alai David enggau bala iya deka mupuk lalu nyerang Jerusalem. Orang Jebus ti diau dia, ngumbai David enda ulih ngalahka nengeri nya, lalu ku sida madahka ngagai iya, “Nuan enda ulih tama kitu. Indah orang ke buta enggau ti enda tau bejalai deh ulih nagang nuan tama.” (

⁷Tang David ngalahka nengeri Sion ti bekuta nya, lalu nengeri nya dikumbai “Nengeri David.”)

⁸Ku David bejaku enggau bala iya, “Kati orang ditu bisi begedika orang Jebus baka aku ke begedika sida? Chukup begedi, datai ke kitai keras deka munuh sida? Enti bisi, awakka iya mansang nengah jalai lubang ai, lalu nyerang sida ke buta enggau ke kait-kupit nya.” (Nya kebuah orang nyebut, “Orang ke buta enggau ke kait-kupit enda tau tama ngagai rumah TUHAN.”)[4]

⁹Lebuh sida udah ngalahka nengeri ti bekuta nya, David lalu diau dia, lalu ngumbai nengeri nya “Nengeri David.” Iya lalu ngaga nengeri ngelingi nya, belabuh ari endur alai tanah ti udah ditambun ba tisi timur bukit nya.

¹⁰Kuasa David nambah-menambah, laban TUHAN ti Pemadu Bekuasa bisi enggau iya.

¹¹Raja Hiram di Tire lalu ngirumka bala seruan betemu enggau David. Iya mega ngirumka kayu sidar, bala tukang kayu enggau bala tukang batu ngagai David, ngambika sida ngaga sebuah istana ke iya.

¹²Ari nya David nemu TUHAN udah ngasuh iya tegap nyadi raja menua Israel, lalu ngasuh menua ti diperintah iya nyadi kaya, ke penguntung bala nembiak TUHAN.

¹³Lebuh iya udah pindah ari Hebron ngagai Jerusalem, David ngambi mayuh agi indu simpan, enggau bini bukai, lalu anak lelaki enggau anak indu iya mega nambah mayuh agi.

¹⁴Tu nama bala anak iya ke ada di Jerusalem: Shamua, Sobap, Natan, Solomon,

¹⁵Ibar, Elisua, Nepek, Japia,

¹⁶Elisama, Eliada, enggau Elipelet.

¹⁷Lebuh orang Pilistin ninga David udah dichiri nyadi raja orang Israel, bala soldadu sida lalu ngiga iya; tang lebuh David ninga nya, iya lalu nurun ngagai siti endur ti bekuta.

¹⁸Orang Pilistin datai ba Lebak Repaim, lalu nguan endur nya.

¹⁹David lalu betanya ngagai TUHAN, “Kati tau aku nyerang orang Pilistin? Kati Nuan deka ngasuh aku menang?” Disaut TUHAN, “Serang meh sida! Aku deka ngasuh nuan menang!”

²⁰Nya alai David mansang ngagai Baal-perasim, lalu ngalahka orang Pilistin dia. Ku David, “TUHAN udah ngelanggar bala munsuh aku baka ai bah.” Nya kebuah endur nya dikumbai Baal-perasim.[5]

²¹Lebuh orang Pilistin rari, sida ninggalka engkeramba sida. David enggau bala iya lalu ngambi engkeramba nya.

²²Udah nya, orang Pilistin pulai baru ngagai Lebak Repaim, lalu nguan endur nya baru.

²³David lalu betanya baru ngagai TUHAN. Lalu ku TUHAN nyaut, “Anang nyerang sida muak ari tu, tang bejalai kita ngelaungka sida, lalu serang sida ari sepiak nyin, semak kayu balsam.

²⁴Lebuh nuan ninga munyi rentak kaki bejalai ba puchuk kayu, nuan enda tau enda nyerang sida, laban Aku deka bejalai dulu ari kita lalu ngalahka bala soldadu orang Pilistin.”

²⁵David lalu ngereja nitihka asuh TUHAN, lalu iya ulih muru orang Pilistin kenyau ari Geba terus ngagai Geser.