Read Iban 2 Samuel 6 Bible Online

2 Samuel 6 - Iban bible

2 Samuel 6

¹Nyadi sekali David ngempuruka tiga puluh ribu iku soldadu ke pemadu kering di menua Israel,

² lalu nguluka sida ngagai Baalah[6] di menua Judah, deka ngambi Peti Lampang Batu Adat Allah Taala, ti ngundan nama TUHAN ti Pemadu Bekuasa, ke bempu kerusi diraja atas dua iku melikat cherub ti besayap.

³ Sida ngambi Peti nya ari rumah Abinadap ti ba bukit, lalu ngengkahka Peti nya ba sebuah kerita tarit ti baru. Kerita nya lalu diiring Usah seduai Ahio, anak Abinadap,

⁴Ahio bejalai di mua.

⁵David enggau semua orang Israel betanda sereta belagu enggau pengabis pengering sida[7] ngemesaika TUHAN. Sida nebah belikan, engkeratung, dedumbak, cherakap enggau bebendai.

⁶Lebuh sida datai ba endur alai nungku gandum di Nakon, jelu sapi tesangkut. Usah nyapai lalu ngetanka Peti Lampang Batu Adat nya.

⁷Tekala nya TUHAN Allah Taala lalu ringat ngagai Usah, lalu munuh iya laban iya enda bebasaka Allah Taala.[8] Usah lalu mati dia ngimbai Peti Lampang Batu Adat nya.

⁸Nya kebuah, kenyau ari nya, endur nya dikumbai Peres-usah[9] David pedis ati, laban TUHAN udah ringat lalu ngukum Usah.

⁹David lalu takutka TUHAN. Ku iya, “Baka ni ku chara aku mai Peti Lampang Batu Adat tu diatu?”

¹⁰Nya alai, iya lalu mutuska runding enda nyadi mai Peti Lampang Batu Adat nya ngagai Jerusalem, tang limpang ari jalai raya, lalu mai Peti nya ngagai rumah Obet-edom, ke asal ari Gat.

¹¹ Peti Lampang Batu Adat nya mengkang dia tiga bulan, lalu TUHAN merekatka Obet-edom enggau sida sebilik.

¹²Lebuh Raja David ninga TUHAN udah merekatka ruang bilik Obet-edom enggau semua utai ti dikemisi iya, iya lalu ngambi Peti Lampang Batu Adat nya ari rumah Obet-edom, lalu mai Peti nya ngagai Jerusalem ngena pengerami ti besai.

¹³Lebuh orang ke ngesan Peti Lampang Batu Adat nya udah bejalai enam singkang, David lalu meri siku jelu sapi ti lelaki enggau siku anak sapi ti gemu nyadika piring.

¹⁴David, ke begari semina ngena kain linin ti dibelitka iya ba punggung iya, lalu betanda enggau pengabis pengering iya, ngemesaika TUHAN.

¹⁵Nya meh jalai iya, enggau semua orang Israel mai Peti Lampang Batu Adat nya ngagai Jerusalem, ngena panjung gaga ati enggau terumpit.

¹⁶Lebuh Peti nya benung dibai tama ngagai nengeri nya, Mikal anak Saul, nyenguk ari jenila, lalu tepedaka Raja David betanda sereta ngingkak di mua TUHAN, lalu Mikal mechat David dalam ati iya.

¹⁷Sida mai Peti nya, lalu ngengkahka iya ba endur asal iya dalam Langkau Kain ti udah didirika David alai engkah Peti nya. Udah nya iya lalu ngenjuk piring tunu enggau piring pemaik ngagai TUHAN.

¹⁸Lebuh iya udah tembu ngenjuk piring nya, iya lalu merekatka orang mayuh dalam nama TUHAN ti Pemadu Bekuasa,

¹⁹ lalu nyadung pemakai ngagai sida. Iya meri ngagai genap iku orang ke lelaki enggau orang ke indu di menua Israel siti tuku roti, dagin ti udah dipanggang,[10] enggau salai buah. Udah nya, semua orang pulai magang.

²⁰Lebuh David pulai ngagai istana iya deka betemu enggau sida sebilik, Mikal pansut lalu ngambat iya. Ku Mikal, “Balat amat Raja orang Israel ngemesaika diri sehari tu tadi, ngayanka tubuh diri di mua bala indu ke bekereja ke bala pemesai iya!”

²¹Disaut David, “Aku ngereja nya kena aku ngemesaika TUHAN ti udah milih aku nyadi tuai orang Israel, lalu enda milih apai nuan enggau sida sebilik. Lalu aku deka majak betanda ngemesaika TUHAN,

²²lalu deka ngemelika diri lebih agi ari nya. Nuan[11] nyangka ngumbai aku nadai guna, tang sida ke indu deka muji aku!”

²³Mikal anak Saul nadai kala bisi anak nyentuk ngagai iya mati.