Read Iban 2 Samuel 9 Bible Online

2 Samuel 9 - Iban bible

2 Samuel 9

¹ Nyadi sekali David nanya, “Kati sida Saul sebilik agi bisi idup? Enti bisi, aku deka ngayanka penelap aku ngagai iya, nitihka semaya aku enggau Jonatan.”

²Lebuh maya nya bisi siku orang gaji sida Saul sebilik ke benama Siba. Orang lalu ngasuh iya betemu enggau David. Ku raja nanya iya, “Kati nuan tu Siba?” Siba lalu nyaut, “Aku meh tu, Tuan Raja.”

³ Raja lalu nanya iya, “Kati sida Saul sebilik agi bisi idup? Aku bisi ati deka ngayanka penaluk enggau penelap Allah Taala ngagai iya.” Disaut Siba, “Siku anak lelaki Jonatan, tang iya enda ulih bejalai.”

⁴“Dini alai iya?” ku raja nanya. “Ba rumah Machir anak Amil, di Lo-debar,” ku Siba nyaut.

⁵David lalu mesanka iya.

⁶Mepiboset anak Jonatan, uchu Saul lalu datai. Iya meremi meri tabi basa ngagai David. Ku David, “Mepiboset,” lalu ku iya nyaut, “Aku meh tu, Tuan Raja.”

⁷“Anang takut,” ku David nyaut. “Aku deka nelap enggau nuan, ketegal apai nuan Jonatan. Aku deka mulaika ngagai nuan semua tanah ti diempu aki nuan Saul, lalu nuan seruran tau makai enggau aku.”

⁸Mepiboset meremi baru, lalu ku iya, “Aku tu enda lebih ari bangkai ukui, Tuan Raja! Nama kebuah nuan manah enggau aku?”

⁹Udah nya raja lalu ngangauka Siba, ti udah nyadi orang gaji Saul, lalu bejaku enggau iya, “Aku meri ngagai Mepiboset semua utai sida Saul sebilik.

¹⁰Lalu nuan enggau bala anak lelaki nuan, enggau bala orang gaji nuan deka bumai ba tanah nya, ke uchu tuan nuan, lalu ngulihka pemakai ke sida sebilik. Tang Mepiboset empu deka seruran makai enggau aku.” (Siba bisi lima belas iku anak lelaki, enggau dua puluh iku orang gaji.)

¹¹Siba lalu nyaut, “Aku deka ngereja semua utai ti diasuh Raja.” Nya alai Mepiboset makai ba mija raja, [20] baka anak raja empu.

¹²Mepiboset bisi anak lelaki siku ti agi biak, ke benama Mika. Semua sida Siba sebilik nyadi orang gaji Mepiboset magang.

¹³Nya alai, Mepiboset, ke bajung ba kedua piak kaki, diau di Jerusalem, makai enggau raja.