Read Iban 1 Raja 1 Bible Online

1 Raja 1 - Iban bible

1 Raja 1

¹Raja David diatu nyau tuai. Taja pen bala orang gaji iya mungkur iya ngena pua, iya seruran chelap tubuh.

²Nya alai bala pemesai iya bejaku enggau iya, “Tuan Raja, awakka kami ngiga indu ke biak ke nuan, lalu ngintu nuan. Iya deka gali ngimbai nuan, ngambika nuan seruran angat isi.”

³Sida lalu ngiga siku indu ke bajik di menua Israel. Sida lalu tetemuka siku di Sunem. Nama iya Abisak, lalu sida mai iya ngagai raja.

⁴Abisak bajik amat gamal. Iya ngibun sereta ngintu raja, tang raja enda beleman enggau iya.

⁵ Laban Absalom udah mati, Adonijah, anak David seduai Hagit, nyadi anak tuai David ti agi meruan idup. Adonijah tu sigat amat gamal. David nadai kala nganu iya, lalu iya pen bisi amat ati deka nyadi raja. Iya nyendiaka kerita perang ke diri empu, kuda, enggau lima puluh iku orang ke nyaga iya lebuh iya bejalai.

⁶

⁷Iya bejaku enggau Joap (indai Joap nya Seruiah). Iya mega bejaku enggau Imam Abiatar, lalu seduai iya besetuju deka nyukung iya.

⁸Tang Imam Sadok, Benaiah anak Jehoiada, nabi Natan, Simei, Rei, enggau bala soldadu ke nyaga David, enggai nyukung Adonijah.

⁹Nyadi sekali, Adonijah ngenjuk piring jelu bedus, sapi ti lelaki, enggau anak sapi ti gemu ba Batu Ular, semak mata ai di En-rogel. Iya mai anak lelaki David ti bukai, enggau bala pemesai raja ari menua Judah ngagai pengerami nya.

¹⁰Tang iya enda mai menyadi-tiri iya Solomon tauka nabi Natan, tauka Benaiah, tauka bala soldadu ke nyaga raja.

¹¹ Udah nya Natan lalu mansang ngagai Batseba, indai Solomon, lalu nanya ngagai iya, “Kati nuan nadai udah ninga pasal anak Hagit ke benama Adonijah, ti udah nyiri diri nyadi raja, lalu Raja David enda nemu pasal pekara nya?

¹²Enti nuan deka ngidupka nyawa diri, enggau nyawa anak nuan Solomon, aku meri nuan siti jaku lalau. Mansang nuan

¹³ngagai Raja David diatu, lalu tanya ngagai iya, ‘Tuan Raja, ukai enda nuan udah besemaya ngena sumpah madahka anak aku Solomon deka nganti nuan nyadi raja? Enti nuan amat udah besemaya, nama kebuah Adonijah diatu udah nyadi raja?’

¹⁴Udah nya, lebuh nuan benung bejaku enggau Raja, aku tama, lalu madahka pengamat berita ti dibai nuan.”

¹⁵Batseba lalu mansang betemu enggau raja dalam bilik tinduk raja. Raja udah tuai amat, lalu iya diintu Abisak, indu ke ari Sunem.

¹⁶Batseba nyungkurka diri di mua raja. Raja lalu nanya, “Nama utai ti dikedekaka nuan?”

¹⁷Batseba lalu nyaut, “Tuan Raja, nuan udah besumpah enggau aku dalam nama TUHAN Allah Taala nuan, madahka anak aku Solomon deka nganti nuan nyadi raja.

¹⁸Tang diatu Adonijah udah nyadi raja, lalu nuan nadai nemu pasal pekara nya.

¹⁹Iya udah meri sapi ti lelaki, bedus, enggau anak sapi ti gemu nyadika piring, lalu iya udah ngambi bala anak lelaki nuan, Imam Abiatar, enggau Joap ti nyadi tuai soldadu nuan, ngagai pengerami nya, tang iya enda mai anak nuan Solomon.

²⁰Tuan Raja, semua orang di menua Israel nganti nuan madahka sapa ti deka nganti nuan nyadi raja.

²¹Enti nuan enda, lebuh nuan mati ila, kami duai Solomon deka digaga nyadi baka orang ke nyual bansa.”

²²Lebuh Batseba agi benung bejaku, Natan pen datai di istana.

²³Orang lalu madahka ngagai David, “Nabi Natan!” Natan tama, lalu nyungkurka diri di mua raja.

²⁴Udah nya Natan lalu bejaku, “Tuan Raja, kati nuan bisi udah madahka Adonijah deka nganti nuan nyadi raja?

²⁵Sehari tu iya udah mansang lalu ngenjuk piring jelu sapi ti lelaki, bedus enggau anak sapi ti gemu. Semua bala anak lelaki nuan, Joap ti nyadi tuai soldadu nuan, [1] enggau Imam Abiatar udah diambi iya ngabang. Diatu sida benung ngintu pengerami makai besai enggau iya, sereta manjung ‘Gayu-guru Raja Adonijah!’

²⁶Tang, tuan, iya nadai ngambi aku, tauka Imam Sadok, tauka Benaiah, tauka Solomon ngagai pengerami nya.

²⁷Kati Tuan Raja bisi udah ngemendarka pengawa nya, lalu enda madahka ngagai bala pemesai nuan sapa ti deka nganti nuan nyadi raja?”

²⁸Ku Raja David bejaku, “Asuh Batseba tama kitu baru.” Batseba tama lalu bediri di mua raja.

²⁹David lalu bejaku enggau Betseba, “Aku besemaya enggau nuan, dalam nama TUHAN ti idup, ti udah ngelepaska aku ari semua penusah aku,

³⁰sehari tu aku deka ngamatka semaya ti udah digaga aku enggau nuan dalam nama TUHAN Allah Taala ke disembah orang Israel. Anak nuan Solomon deka nganti aku nyadi raja.”

³¹Batseba lalu nyungkurka diri, lalu ku iya, “Awakka Tuan Raja aku idup belama iya!”

³²Udah nya raja lalu mesanka Sadok, Natan, enggau Benaiah. Lebuh sida tama,

³³raja lalu bejaku enggau sida, “Bai bala pemesai aku enggau kita. Asuh anak aku Solomon nepan keledai aku empu, lalu iring iya nurun ngagai Mata Ai di Gihon.

³⁴Dia Sadok, enggau Natan deka nata iya nyadi raja menua Israel. Udah nya sepu terumpit, lalu manjung, ‘Gayu-guru Raja Solomon!’

³⁵Titihka iya pulai kitu baru, lebuh iya datai lalu duduk ba kerusi diraja aku. Iya deka nganti aku nyadi raja, laban iya endang udah dipilih aku nyadi raja menua Israel enggau menua Judah.”

³⁶“Utai nya deka dikereja,” ku Benaiah nyaut, “lalu awakka TUHAN Allah Taala nuan ngamatka utai nya!

³⁷Baka TUHAN ti udah enggau Tuan Raja, awakka Iya mega enggau Solomon, lalu ngasuh perintah Solomon lebih agi kaya-raja ari perintah nuan.”

³⁸Nya alai Sadok, Natan, Benaiah, enggau bala soldadu ke nyaga raja lalu ngasuh Solomon nepan keledai Raja David, lalu ngiring iya ngagai Mata Ai di Gihon.

³⁹Sadok mai sarang minyak kana, ti udah dibai iya ari Langkau Kain TUHAN, lalu nata Solomon. Sida nyepu terumpit, lalu semua orang manjung magang, “Gayu-guru Raja Solomon!”

⁴⁰Udah nya semua sida lalu nitihka iya pulai, manjung gaga ati, nyepu kesuling, sereta richah, datai ke tanah nyau berenyang.

⁴¹Lebuh Adonijah enggau semua pengabang iya udah tembu ngintu pengerami makai besai, sida lalu ninga utai inggar bemunyi. Lebuh Joap ninga munyi terumpit, iya lalu nanya, “Nama utai ti inggar nya di nengeri nya?”

⁴²Lebuh iya agi benung bejaku, Jonatan anak Imam Abiatar lalu datai. “Tama,” ku Adonijah bejaku enggau iya. “Nuan tu orang ke badas. Nuan tentu mai berita ti manah.”

⁴³“Ukai,” ku Jonatan nyaut. “Raja David udah ngaga Solomon nyadi raja.

⁴⁴Iya udah ngasuh Sadok, Natan enggau Benaiah enggau bala soldadu ke nyaga raja, ngiring iya. Iya udah ngasuh iya nepan keledai raja,

⁴⁵lalu Sadok enggau Natan udah nata iya nyadi raja ba Mata Ai di Gihon. Udah nya sida lalu tama ngagai nengeri, manjung gaga ati, lalu orang mayuh nyau richah magang. Nya utai ti didinga kita.

⁴⁶Solomon diatu udah nyadi raja.

⁴⁷Nambahka nya, bala pemesai ke bekereja dalam istana raja udah tama ngagai bilik raja, lalu meri tabi basa ngagai Raja David. Ku sida, ‘Awakka Allah Taala nuan ngasuh Solomon tebilang agi ari nuan, lalu awakka perintah Solomon lebih agi kaya-raja ari perintah nuan.’ Udah nya Raja David nyungkurka diri ba atas peninduk iya, nyembah Allah Taala.

⁴⁸Ku David besampi, ‘Pujika TUHAN Allah Taala ke disembah orang Israel ti udah sehari tu ngasuh siku ari peturun aku nganti aku nyadi raja, lalu udah ngasuh aku idup meda utai tu nyadi!’ ”

⁴⁹Udah nya bala pengabang Adonijah lalu takut. Semua sida angkat, lalu mupuk magang.

⁵⁰Adonijah lalu takutka Solomon, lalu iya mansang ngagai Langkau Kain TUHAN, lalu megai sukut alta. [2]

⁵¹Orang lalu madahka ngagai Raja Solomon pasal Adonijah ke takutka iya, lalu bepegai ba sukut alta, lalu udah bejaku, “Terubah, aku deka ngasuh Raja Solomon besumpah minta iya enda munuh aku.”

⁵²Ku Solomon nyaut, “Enti iya taluk, selambar pen nadai meh buk iya deka ditegu. Tang enti iya enda taluk, iya deka mati.”

⁵³Udah nya Raja Solomon lalu mesanka Adonijah, lalu ngasuh orang mai iya nurun ari alta nya. Adonijah mansang lalu nyungkurka diri di mua raja, lalu ku raja bejaku enggau iya, “Pulai meh nuan ke rumah.”