Read Iban 1 Raja 11 Bible Online

1 Raja 11 - Iban bible

1 Raja 11

¹ Solomon rinduka mayuh indu orang bansa bukai. Kelimpah ari anak indu raja menua Ejip, iya mega jadi enggau indu orang Iti, indu orang Moap, Amon, Edom, enggau Sidon.

² Iya jadi enggau sida taja pen TUHAN udah nagang orang Israel jadi enggau bansa orang nya, laban sida deka mai orang Israel taluk ngagai petara bukai.

³Solomon jadi enggau tujuh ratus iku anak indu raja, lalu iya bisi mega tiga ratus iku indu simpan. Sida indu nya ke nyungkak iya ninggalka Allah Taala,

⁴lalu lebuh umur iya nyau tuai, sida nguluka iya besembahka petara orang bansa bukai. Iya enda tetap ati ngagai TUHAN Allah Taala iya, enda baka apai iya David.

⁵Iya nyembah Astarte, petara indu orang Sidon, enggau Molek, petara orang Amon.

⁶Iya bedosa ngelaban TUHAN, lalu iya enda taluk ngagai TUHAN, enda baka apai iya David.

⁷Ba bukit sigi muak ke timur nengeri Jerusalem iya ngaga siti palan alai nyembah Kemos, petara orang Moap, enggau siti palan alai nyembah Molek, petara orang Amon.

⁸Iya mega ngaga mayuh bengkah endur alai semua bini iya ke ari bansa bukai ulih nunu menyan enggau ngenjuk piring ngagai petara sida.

⁹Taja pen TUHAN Allah Taala ke disembah orang Israel udah ngayanka Diri dua kali ngagai Solomon, lalu udah nagang iya nyembah petara orang bansa bukai, Solomon mengkang enda ngasika TUHAN, tang ninggalka Iya. Nya alai TUHAN ringat ngagai Solomon

¹¹lalu bejaku enggau iya, “Laban nuan udah sengaja mungkir ari sempekat Aku enggau nuan, lalu enda ngasika pesan Aku, Aku deka ngerampas perintah orang Israel ari jari nuan, lalu meri perintah nya ngagai siku ari bala pemesai nuan.

¹²Tang, ketegal apai nuan David, Aku enda ngereja nya lebuh nuan empu agi idup, tang lebuh anak nuan megai perintah.

¹³Lalu Aku enda ngambi semua menua ti dipegai iya ari iya, tang Aku deka ninggalka siti aja raban bansa ke iya, ketegal nembiak Aku David, enggau ketegal Jerusalem, nengeri ti udah digaga Aku nyadika nengeri Aku Empu.”

¹⁴Nya alai TUHAN ngasuh Hadat, siku orang ari ruang bilik raja Edom, ngelaban Solomon.

¹⁵Sebedau nya, lebuh David udah ngalahka Edom, Joap ti nyadi tuai soldadu iya bisi udah bejalai ngagai menua nya deka nguburka orang ke mati. Iya enggau bala iya mengkang di menua nya enam bulan, lalu sekumbang sida ke dia, sida munuh semua orang ke lelaki di menua Edom.

¹⁷Tang Hadat ti agi biak lebuh maya nya, enggau sekeda orang Edom ti nyadi orang gaji apai iya, ngerarika diri ngagai menua Ejip.

¹⁸Sida angkat ari Midian lalu mansang ngagai Paran. Sekeda orang bukai mupuk enggau sida. Udah nya sida lalu bejalai ngagai menua Ejip, lalu betemu enggau raja menua nya. Raja nya meri tanah, sebuah rumah enggau pemakai ngagai Hadat.

¹⁹Hadat nyau bepangan enggau raja, lalu raja meri ipar indu iya, iya nya menyadi indu kuin Papenes, nyadika bini Hadat.

²⁰Papenes ngadaka anak lelaki siku. Nama iya Genubat, lalu iya diibun kuin nya dalam istana, alai iya ti diau begulai enggau bala anak raja.

²¹Lebuh Hadat ninga David, enggau Joap ti nyadi tuai soldadu orang Israel udah mati, Hadat lalu bejaku enggau raja, “Awakka aku pulai ngagai menua aku empu.”

²²“Lapa?” ku raja nanya. “Kati aku bisi udah enda meri nuan utai? Kati nya kebuah nuan keran deka pulai ngagai menua nuan empu?” “Awakka aku mupuk,” ku Hadat nyaut raja. Iya lalu pulai ngagai menua iya empu. [27] Lebuh Hadat nyadi raja menua Edom, iya lalu bemunsuh enggau orang Israel. [28]

²³Allah Taala mega ngasuh Reson anak Eliada ngelaban Solomon. Reson udah rari ninggalka tuan iya, iya nya Raja Hadadeser ke merintah di Sobah,

²⁴lalu udah nyadi tuai bala orang ke enda beradat. (Utai tu nyadi udah bekau David ngalahka Hadadeser lalu udah munuh bala orang Siria ke setanah enggau Hadadeser.) Reson enggau bala iya mansang lalu diau di Damaskus. Dia orang ke nitihka iya lalu nyiri iya nyadi raja menua Siria.

²⁵Iya nyadi munsuh menua Israel sekumbang Solomon agi idup.

²⁶Siku agi orang angkat ngelaban Raja Solomon. Orang nya siku ari pemesai iya empu, ke benama Jeroboam anak Nebat, ari Seredah di menua Epraim. Indai iya Seruah, lalu Seruah balu.

²⁷Tu cherita pasal Jeroboam ke angkat ngelaban perintah. Nyadi Solomon agi benung nambun tanah ba tisi timur nengeri Jerusalem, sereta ngaduka dinding kuta nengeri.

²⁸Jeroboam agi biak umur sereta nemu gawa, lalu lebuh Solomon meda iya rajin gawa, iya lalu ngasuh iya nyadi tuai ngemataka semua orang ke dipejalka gawa dalam menua Manasi enggau Epraim.

²⁹Nyadi sekali, lebuh Jeroboam bejalai ari Jerusalem, nabi Ahijah ari Siloh betemu enggau iya kediri ba jalai raya di menua pesisir.

³⁰Ahijah lalu muka baju panjai ari tubuh iya empu, nyarikka baju nya ngagai dua belas iti chebik,

³¹lalu bejaku enggau Jeroboam, “Bai sepuluh iti chebik ke nuan empu, laban tu utai ti disebut TUHAN Allah Taala ke disembah orang Israel ngagai nuan, ‘Aku deka ngerampas menua ti diperintah Solomon ari jari iya, lalu Aku deka meri sepuluh bengkah raban bansa ngagai nuan.

³²Solomon deka merintah siti aja raban bansa ketegal nembiak Aku David, enggau ketegal Jerusalem, nengeri ti udah dipilih Aku ari semua menua Israel nyadika nengeri Aku Empu.

³³Aku deka ngereja tu laban Solomon udah nulak Aku, lalu udah [29] nyembah petara orang bansa bukai - petara Astarte, petara indu orang Sidon; Kemos, petara orang Moap; enggau Molek, petara orang Amon. Solomon udah [30] enda ngasika Aku. Iya udah ngereja utai ti salah, lalu enda agi nitihka adat enggau pesan Aku, enda baka apai iya David.

³⁴Tang Aku enda ngerampas semua menua ti diperintah Solomon ari jari iya, lalu Aku deka ngasuh iya megai perintah sepemanjai umur iya. Aku deka ngereja tu ketegal nembiak Aku David, ti udah dipilih Aku, lalu udah ngasika adat enggau pesan Aku.

³⁵Aku deka ngerampas menua ti diperintah Solomon ari jari anak iya, lalu deka meri sepuluh bengkah raban bansa ngagai nuan,

³⁶tang Aku deka nejuka anak Solomon merintah siti raban bansa, ngambika Aku deka seruran bisi siti peturun ari nembiak Aku David merintah di Jerusalem, nengeri ti udah dipilih Aku nyadika palan alai Aku disembah.

³⁷Jeroboam, Aku deka ngaga nuan nyadi raja menua Israel, lalu nuan deka merintah semua menua ti dikinginka nuan.

³⁸Enti nuan ngasika Aku enggau pengabis ati nuan, idup nitihka jalai Aku, lalu ngereja utai ti ngena nitihka adat enggau pesan Aku, baka nembiak Aku David, Aku deka seruran enggau nuan. Aku deka ngaga nuan nyadi raja menua Israel, lalu Aku deka netapka peturun nuan merintah ngentudika nuan, baka ke udah dikereja Aku ngagai David.

³⁹Ketegal dosa Solomon, Aku deka ngukum peturun David, tang enda belama iya.’ ”

⁴⁰Solomon lalu nguji munuh Jeroboam, tang Jeroboam ngerarika diri ngagai Raja Sisak di menua Ejip, lalu diau dia nyentuk ngagai pemati Solomon.

⁴¹Semua utai ti udah dikereja Solomon, jalai pengidup iya, penemu-dalam ti dikembuan iya bisi dituliska magang dalam Jerita Lama Pasal Solomon.

⁴²Iya nyadi raja di Jerusalem merintah semua menua Israel empat puluh taun.

⁴³Iya mati lalu dikuburka di Nengeri David, lalu anak iya Rehoboam nganti iya nyadi raja.