Read Iban 1 Raja 12 Bible Online

1 Raja 12 - Iban bible

1 Raja 12

¹Rehoboam mansang ngagai Sekem, alai semua orang Israel ti di utara udah begempuru deka nyiri iya nyadi raja.

²Lebuh Jeroboam anak Nebat, ti udah rari ari Raja Solomon ngagai menua Ejip, ninga berita nya, iya lalu mulaika diri ari [31] menua Ejip.

³Orang Israel ari raban bansa ti di utara lalu mesanka Jeroboam, lalu Jeroboam enggau semua bala sida mansang deka betemu enggau Rehoboam, lalu bejaku enggau iya,

⁴“Apai nuan Solomon udah kasar bendar enggau kami, lalu ngasuh kami ngereja pengawa ti berat. Enti nuan ngasuh pengawa kami lempung agi, lalu ngasuh pengidup kami nyamai agi, kami deka taluk ngagai nuan.”

⁵“Aku minta kita datai kitu baru tiga hari da agi, nya baru aku meri saut aku ngagai kita,” ku iya nyaut. Sida lalu mupuk.

⁶Raja Rehoboam lalu betanya ngagai orang ke tuai, ti udah bekereja nyadi penyanding penemu ke apai iya Solomon. “Dalam runding kita, nama saut ti patut diberi aku ngagai orang tu?” ku iya nanya.

⁷Ku sida nyaut, “Enti nuan deka betuaika orang tu enggau manah, nuan enda tau enda meri saut ti menyana ngagai peminta sida. Nya baru sida deka seruran taluk betuaika nuan.”

⁸Tang iya enda begunaka jaku lalau bala orang ke tuai. Iya mansang ngagai bala orang ke biak, ti udah besulu enggau iya kenyau ari mit, ti nyadi penyanding penemu iya diatu.

⁹“Dalam runding kita, nama utai ti patut dikereja aku?” ku iya nanya sida. “Nama utai ti patut dikereja aku ngagai orang ke minta aku ngasuh pengawa sida lempung agi?”

¹⁰Disaut sida, “Tu utai ti patut dipadahka nuan ngagai sida: ‘Tunjuk aku besai agi ari punggung apai aku!’

¹¹Padahka ngagai sida, ‘Apai aku udah ngasuh kita ngereja pengawa ti berat. Aku deka ngasuh pengawa kita berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!’ ”

¹²Tiga hari udah bekau nya, Jeroboam enggau semua orang lalu datai baru ngagai Raja Rehoboam, nitihka asuh Rehoboam empu.

¹³Raja Rehoboam enda begunaka jaku lalau ti diberi orang ke tuai, lalu iya bejaku kasar enggau orang mayuh,

¹⁴nitihka jaku lalau ari bala orang ke biak. Ku iya, “Apai aku ngasuh kita ngereja pengawa ti berat. Aku deka ngasuh pengawa kita berat agi. Iya udah nyipat kita ngena penyipat, tang Aku deka nyipat kita ngena penyipat ti bedurika besi!”

¹⁵TUHAN endang deka ngamatka utai ti udah disebut Iya ngagai Jeroboam anak Nebat ngena Ahijah ke datai ari Siloh. Nya kebuah raja enggai ibuhka orang mayuh.

¹⁶ Lebuh orang mayuh meda raja nya enggai mendingka sida, sida lalu manjung, “Tumbangka David enggau peturun iya! Sida nadai udah ngereja utai ke kitai! Orang Israel, aram kitai pulai! Awakka Rehoboam ngidupka diri empu!” Nya alai, orang Israel angkat ngelaban,

¹⁷lalu Rehoboam semina nyadi raja ke orang ke diau di menua Judah aja.

¹⁸Udah nya Raja Rehoboam lalu ngasuh Adoniram, ti nyadi tuai ngemataka orang ke dipejalka ngereja pengawa ti berat, mansang ngagai orang Israel, tang sida nuku iya ngena batu datai ke mati. Rehoboam lalu beguai-guai nepan kerita perang iya lalu rari ngagai Jerusalem.

¹⁹Kenyau ari nya, orang ke di utara menua Israel seruran ngelaban perintah peturun David.

²⁰Lebuh orang Israel ninga Jeroboam udah pulai ari menua Ejip, sida mai iya ngagai aum besai bala mayuh, lalu nyiri iya nyadi raja menua Israel. Semina raban bansa Judah aja agi taluk ngagai peturun David.

²¹Lebuh Rehoboam anak Solomon datai di Jerusalem, iya lalu ngempuruka 180,000 iku soldadu ti pemadu kering ari raban bansa Judah enggau Benjamin, deka nyerang raban bansa ti di utara laban iya deka ngambi pulai baru kuasa iya ti nyadi raja atas raban bansa ti di utara.

²²Tang Allah Taala ngasuh nabi Semaiah

²³meri pesan tu ngagai Rehoboam anak Solomon, enggau ngagai semua orang ke ari raban bansa Judah enggau Benjamin:

²⁴“Anang nyerang kaban belayan kita orang Israel. Pulai semua kita. Utai nya nyadi ari asuh Aku.” Semua sida ngasika pesan TUHAN, lalu pulai.

²⁵Raja Jeroboam menua Israel lalu ngaga kuta ngelingi nengeri Sekem di menua ti bebukit di menua Epraim, lalu iya diau dia enda lama. Udah nya iya angkat ari Sekem lalu ngaga kuta ngelingi nengeri Penuel.

²⁶Ku runding iya, “Nitihka gaya utai ti diatu, enti bala nembiak aku mansang ngagai Jerusalem, lalu ngenjuk piring ngagai TUHAN dalam Rumah Sembiang din, sida deka taluk ngagai Raja Rehoboam menua Judah, lalu munuh aku.”

²⁸ Lebuh iya udah berundingka pekara nya, iya lalu ngaga dua iku anak sapi ti lelaki ari emas, lalu ku iya bejaku enggau bala nembiak iya, “Orang Israel, kita udah chukup lama nyembah Allah Taala di Jerusalem. Nya alai, tu petara kita ke udah mai kita pansut ari menua Ejip!”

²⁹Iya lalu ngengkahka siku anak sapi emas di Betel, lalu siku di Dan.

³⁰Nya alai orang mayuh bedosa laban sida nyembah engkeramba nya di Betel enggau di Dan. [32]

³¹Jeroboam mega ngaga mayuh bengkah palan alai besembiang ba tuchung bukit, lalu iya milih orang ke ukai ari ruang bilik Lewi nyadi imam.

³² Jeroboam mega numbuhka siti gawai pengarap ti diintu kena lima belas hari bulan ti kelapan, baka gawai ti di menua Judah. Iya ngenjuk piring ba alta ngagai anak sapi emas ti udah digaga iya di Betel, lalu iya mega ngasuh bala imam gawa ba palan alai besembiang ti udah digaga iya.

³³Kena lima belas hari bulan ti kelapan, hari ti udah diletak iya empu, iya mansang ngagai Betel lalu ngenjuk piring ba alta, kena iya ngerami gawai ti udah ditumbuhka iya ke orang Israel.