Read Iban 1 Raja 13 Bible Online

1 Raja 13 - Iban bible

1 Raja 13

¹Ari asuh TUHAN, siku nabi lalu bejalai ari menua Judah ngagai Betel. Iya datai dia lebuh Jeroboam benung bediri ngimbai alta, deka ngenjuk piring.

² Ari asuh TUHAN, nabi nya lalu bejaku ngagai alta nya: “O alta, alta, tu utai ti disebut TUHAN: Siku anak mit ke benama Josiah, deka diadaka ari peturun David. Iya deka munuh ba atas nuan bala imam ke bekereja ba alta orang kapir ke ngenjuk piring ba atas nuan, lalu iya deka nunu tulang mensia ba atas nuan.”

³Lalu ku nabi nya nampung jaku iya, “Alta tu deka diruntuhka, lalu amau ti ba atas iya deka diachirka. Nya baru nuan deka nemu TUHAN udah bejaku ngena aku.”

⁴Lebuh Raja Jeroboam ninga nya, iya nunjuk ngagai nabi nya, lalu bejaku, “Tangkap orang nya!” Tekala nya lengan raja lalu enda ulih engkebut agi datai ke nyau enda ulih nekuka lengan iya pulai baru.

⁵Alta nya lalu tekala nya runtuh, lalu amau labuh ke tanah, munyi ti udah dipadahka nabi nya dalam nama TUHAN.

⁶Ku Raja Jeroboam bejaku enggau nabi nya, “Aku minta nuan besampika aku ngagai TUHAN, minta iya ngeraika lengan aku!” Nabi nya lalu besampi ngagai TUHAN, lalu lengan raja nya gerai.

⁷Udah nya raja lalu bejaku enggau nabi nya, “Aram makai enggau aku. Aku deka ngupah nuan ketegal utai ti udah dikereja nuan.”

⁸Disaut nabi nya, “Enti sema nuan meri aku setengah ari pengaya nuan, enggai meh aku bejalai enggau nuan, tauka makai, tauka ngirup enggau nuan,

⁹laban TUHAN udah nagang aku makai, tauka ngirup, tauka pulai nengah jalai aku mansang.”

¹⁰Nya alai nabi nya enda pulai nengah jalai iya mansang, tang nengah jalai bukai.

¹¹Lebuh maya nya, siku nabi bisi diau di Betel. Bala anak lelaki iya [33] datai lalu nusui ngagai iya utai ti udah dikereja nabi ke datai ari menua Judah di Betel sehari nya, enggau jaku ti disebut nabi nya ngagai Raja Jeroboam.

¹²“Ni jalai ditengah iya mupuk tadi?” ku nabi ke tuai nya nanya sida. Sida lalu nunjukka [34] jalai nya ngagai iya.

¹³Nabi ke tuai nya lalu ngasuh sida nyendiaka keledai iya. Sida ngereja nya lalu iya mupuk

¹⁴nengah jalai nya, nitihka nabi ke datai ari menua Judah nya, lalu nemu iya duduk di baruh sepun kayu oak. “Kati nuan tu nabi ke datai ari menua Judah?” ku nabi ke tuai nya nanya. “Aku meh tu,” ku nabi ari menua Judah nya nyaut.

¹⁵“Aram pulai lalu makai enggau aku,” ku nabi ke tuai nya bejaku.

¹⁶Tang ku nabi ari menua Judah nya nyaut, “Aku enda tau pulai enggau nuan, tauka makai enggau nuan. Lalu aku enggai makai ngirup enggau nuan ditu,

¹⁷laban TUHAN udah bejaku nagang aku makai, tauka ngirup, tauka pulai nengah jalai ti ditengah aku mansang.”

¹⁸Ku nabi ke tuai ari Betel nya bejaku enggau iya, “Aku pen nabi baka nuan. Nitihka pesan TUHAN, siku melikat udah bejaku ngagai aku, ngasuh aku mai nuan ke rumah, lalu mai nuan makai enggau aku.” Tang nabi ke tuai nya bejaku bula.

¹⁹Nabi ke datai ari menua Judah nya lalu pulai enggau nabi ke tuai nya, lalu makai enggau iya.

²⁰Lebuh seduai iya benung makai, jaku TUHAN lalu datai ba nabi ke tuai nya,

²¹lalu ku nabi nya bejaku enggau nyawa ti inggar ngagai nabi ke datai ari menua Judah nya, “TUHAN madahka nuan enda ngasika Iya, lalu enda ngereja utai ti diasuh Iya.

²²Nuan udah pulai lalu makai ba endur ti enda disagi Iya. Ketegal nya, nuan deka dibunuh, lalu bangkai nuan deka dikuburka ba kubur kita sebilik.”

²³Lebuh seduai iya udah badu makai, nabi ke tuai nya lalu nyendiaka keledai ke nabi ke datai ari menua Judah nya.

²⁴Nabi nya lalu mupuk. Di rantau jalai, siku singa nerekam lalu nyamah iya. Bangkai iya lalu garing-garing ba tengah jalai raya nya, lalu keledai enggau singa nya sama bediri semak bangkai iya.

²⁵Sekeda orang bisi mansa, lalu meda bangkai nya ba jalai raya nya, enggau singa nya bediri semak bangkai nya. Sida majakka pejalai sida ngagai Betel lalu madahka pasal utai ti udah dipeda sida.

²⁶Lebuh nabi ke tuai nya ninga berita nya, iya lalu bejaku, “Nya nabi ti enda ngasika pesan TUHAN! Nya kebuah TUHAN ngasuh singa nya nerekam lalu nyamah iya, munyi ti udah dipadahka TUHAN.”

²⁷Udah nya iya lalu bejaku enggau bala anak lelaki iya, “Sediaka keledai aku.” Sida lalu nyendiaka keledai iya.

²⁸Iya lalu nepan keledai nya, mupuk, lalu nemu bangkai nabi nya garing-garing ba tengah jalai raya, enggau keledai enggau singa nya sama bediri semak bangkai nya. Singa nya enda makai bangkai orang nya, tauka nyambarka keledai nya.

²⁹Nabi ke tuai nya lalu nanggung bangkai nya, manggaika iya ba keledai iya empu, lalu mai bangkai nya pulai ngagai Betel, ngulit sereta nguburka iya.

³⁰Nabi tuai nya nguburka iya dalam kubur sida sebilik. Iya enggau bala anak iya lalu ngulitka nabi nya, ku iya, “O menyadi! O menyadi!”

³¹Lebuh sida udah nguburka iya, nabi ke tuai nya lalu bejaku enggau bala anak iya, “Lebuh aku mati ila, kuburka aku ba kubur tu ngimbai bangkai iya.

³²Jaku ti disebut iya ari asuh TUHAN kena ngelaban alta ti di Betel, enggau kena ngelaban semua palan alai besembiang di menua Samaria, tetap deka dikamatka magang.”

³³Raja Jeroboam agi mengkang enggai ngelengkaka jalai iya ti jai, tang majak milih bala imam ari orang ke ukai ari peturun imam bekereja ba alta ti udah digaga iya. Iya nyiri sebarang orang ke bisi ati deka nyadi imam.

³⁴Dosa iya empu ti ngerusak semua perintah iya.