Read Iban 1 Raja 14 Bible Online

1 Raja 14 - Iban bible

1 Raja 14

¹Ba urung maya nya, anak lelaki Jeroboam ke benama Abijah, sakit.

²Ku Jeroboam bejaku enggau bini iya, “Nuan patut ngeluluka diri nyadi orang bukai, ngambika orang enda ngelala nuan. Udah nya bejalai nuan ngagai Siloh, alai nabi Ahijah diau, nabi ti udah madahka aku deka nyadi raja menua Israel.

³Bai ngagai iya sepuluh iti tuku roti, kek, enggau sekebuk ai manyi, lalu bejalai nuan ngagai iya. Iya deka madahka ngagai nuan utai ti deka nyadi ba anak tua tu.”

⁴Bini Jeroboam lalu mansang ngagai rumah Ahijah di Siloh. Nyadi Ahijah buta, laban iya nyau tuai.

⁵TUHAN udah madahka ngagai iya pasal bini Jeroboam ti deka datai lalu nanya ngagai iya pasal anak Jeroboam ke sakit. TUHAN lalu madahka ngagai Ahijah utai ti patut disebut iya. Bini Jeroboam datai, ngeluluka diri nyadi orang bukai.

⁶Tang lebuh Ahijah ninga iya tama, Ahijah lalu bejaku, “Tama meh, bini Jeroboam. Nama kebuah nuan ngeluluka gamal diri baka gamal orang bukai? Aku bisi berita ti enda manah ti deka dipadahka aku ngagai nuan.

⁷Mupuk meh nuan, lalu padahka jaku TUHAN Allah Taala ke disembah orang Israel ngagai Jeroboam: ‘Aku udah milih nuan ari semua orang bukai, lalu ngasuh nuan merintah bala nembiak Aku Israel.

⁸Aku udah ngambi perintah ari jari peturun David, lalu meri perintah nya ngagai nuan. Tang nuan enda baka nembiak Aku David, ke taluk ngagai Aku enggau pengabis ati iya, lalu ngasika pesan Aku, lalu semina ngereja utai ti dikemendarka Aku.

⁹Nuan udah bedosa lebih ari orang ke dulu ari nuan nyadi raja. Nuan udah nulak Aku, lalu udah nyungkak Aku ringat, lebuh nuan ngaga engkeramba enggau anak patung ari besi ke disembah nuan.

¹⁰ Ketegal nya, Aku deka ngasuh penusah ti besai ninggang kita sebilik, lalu deka munuh semua peturun nuan ti lelaki, ke tuai enggau ke biak. Aku deka muai ruang bilik nuan baka ke muai tai sapi.

¹¹Kita sebilik ke mati di nengeri deka diempa ukui, lalu bala kita ke mati di menua pesisir, deka diempa burung ti bepakaika bangkai. Aku ti TUHAN, udah bejaku.’ ”

¹²Ku Ahijah nampung jaku iya ngagai bini Jeroboam, “Nya alai, pulai nuan diatu. Anak nuan deka mati lebuh nuan tama ngagai nengeri nya lagi.

¹³Semua orang Israel deka ngulitka iya, lalu nguburka iya. Semina iya siku aja ari ruang bilik Jeroboam ti deka dikuburka ngena chara ti menyana, laban semina iya siku aja ke dikerinduka TUHAN Allah Taala ke disembah orang Israel.

¹⁴TUHAN deka ngeletak siku raja megai perintah di menua Israel, ti deka madamka peturun Jeroboam nyadi raja. [35]

¹⁵TUHAN deka ngukum Israel, lalu Israel deka begetar baka bemban ti diteruju ai. TUHAN deka nyabut orang Israel ari menua ti manah tu, ti udah diberi Iya ngagai aki ini sida, lalu Iya deka ngachirka sida ngagai menua ngilah Sungai Eupratis, laban sida udah nyungkak TUHAN ringat, lebuh sida begagaka engkeramba ke petara indu Aserah.

¹⁶TUHAN deka ninggalka orang Israel laban Jeroboam udah bedosa, lalu nguluka orang Israel bedosa.”

¹⁷Bini Jeroboam lalu pulai ngagai Tirsah. Lebuh iya baru datai di rumah, anak mit nya lalu mati.

¹⁸Orang Israel nyenggai lalu nguburka anak mit nya, munyi ti udah dipadahka TUHAN ngena nembiak Iya, nabi Ahijah.

¹⁹Semua utai bukai ti udah dikereja Raja Jeroboam, pasal iya ke beperang, chara iya merintah, bisi dituliska magang dalam Jerita Lama Pasal Raja Menua Israel.

²⁰Jeroboam merintah nyadi raja dua puluh dua taun. Iya mati lalu dikuburka, lalu anak iya Nadap nganti iya nyadi raja.

²¹Rehoboam anak Solomon, umur empat puluh satu taun lebuh iya nyadi raja menua Judah, lalu iya merintah tujuh belas taun di Jerusalem, nengeri ti udah dipilih TUHAN ari semua menua Israel nyadika palan alai Iya disembah. Indai Rehoboam nya Naamah ari Amon.

²²Orang Judah udah bedosa ngelaban TUHAN, lalu udah nyungkak TUHAN ringat ngena mayuh agi dosa, ari ti udah dikereja bala aki ini sida.

²³ Sida udah ngaga palan alai nyembah petara ti pelesu, lalu udah nirika tiang batu enggau tanda Aserah ngambika bisi disembah ba bukit enggau ba palan ti lindung di baruh kayu.

²⁴ Tang utai ti pemadu jai nya baka tu: orang ke lelaki enggau orang ke indu ke bekereja nyadi sundal ba endur alai orang kapir nyembah petara sida. Orang Judah ngereja semua utai ti ngemalu, ti dikereja orang ke diburu TUHAN ari menua nya, lebuh orang Israel nyerang.

²⁵ Dalam taun ti kelima Rehoboam nyadi raja, Raja Sisak ari menua Ejip nyerang Jerusalem.

²⁶ Raja Sisak nabanka semua utai ti berega ari Rumah Sembiang enggau ari istana, nyengkaum terabai emas ti digaga Solomon.

²⁷Kena iya nganti utai nya, Raja Rehoboam ngaga terabai temaga, lalu nyerahka utai nya ngagai bala pemesai ke betanggungjawap nyaga pintu penama ngagai istana nya.

²⁸Genap kali Raja Rehoboam mansang ngagai Rumah Sembiang, bala jejaga lalu mai terabai nya, lalu udah nya, mulaika terabai nya baru ngagai bilik jejaga.

²⁹Semua utai bukai ti udah dikereja Raja Rehoboam bisi dituliska magang dalam Jerita Lama Pasal Raja Menua Judah.

³⁰Sekumbang maya nya, Rehoboam enggau Jeroboam endang seruran beperang ngelaban pangan diri.

³¹Rehoboam mati lalu dikuburka ba lumbung raja di Nengeri David, lalu anak iya Abijah nganti iya nyadi raja.