Read Iban 1 Raja 15 Bible Online

1 Raja 15 - Iban bible

1 Raja 15

¹Dalam taun ti kelapan belas Jeroboam anak Nebat nyadi raja menua Israel, Abijah lalu berengkah nyadi raja menua Judah.

²Iya merintah tiga taun di Jerusalem. Indai iya Maakah anak Absalom.

³Iya bedosa baka apai iya, lalu iya enda tentu taluk ngagai TUHAN Allah Taala iya, enda baka aki ichit iya David.

⁴Tang ketegal David, TUHAN Allah Taala iya meri iya anak lelaki siku, ngambika bisi nganti iya megai perintah di Jerusalem lalu mai pengelikun ngagai Jerusalem.

⁵ TUHAN ngereja nya laban David udah ngereja utai ti ngerinduka ati TUHAN, lalu enda kala enda ngasika pesan Iya, kelimpah ari pekara pasal Uriah orang Iti.

⁶ Perang ti endang udah belabuh entara Rehoboam enggau Jeroboam, majak nyadi sepemanjai umur Abijah.

⁷Lalu semua utai bukai ti udah dikereja Abijah bisi dituliska magang dalam Jerita Lama Pasal Raja Menua Judah.

⁸Abijah mati, lalu dikuburka di Nengeri David, lalu anak iya Asa nganti iya nyadi raja.

⁹Dalam taun ti kedua puluh Jeroboam nyadi raja menua Israel, Asa lalu berengkah nyadi raja menua Judah.

¹⁰Iya merintah di Jerusalem empat puluh satu taun. Nama ini iya Maakah anak Absalom.

¹¹Asa ngereja utai ti ngerinduka ati TUHAN, baka aki iya David.

¹² Iya muai ari menua nya semua lelaki enggau indu ke bekereja nyadi sundal ba palan alai orang kapir nyembah petara sida, lalu iya muai semua engkeramba ti udah digaga sida raja ke dulu agi ari iya.

¹³Iya mega muai ini iya Maakah ari pangkat iya ti nyadi indai raja, laban iya udah ngaga engkeramba ke petara ti ngasuh peridi ke benama Aserah. Asa nebang engkeramba nya, lalu nunu iya ba Lebak Kidron.

¹⁴Taja pen Asa enda ngerusak semua palan alai orang kapir nyembah petara sida, iya mengkang tetap ati ngagai TUHAN sepemanjai umur iya.

¹⁵Iya ngengkahka dalam Rumah Sembiang semua utai ti udah diserahka apai iya ngagai Allah Taala, nyengkaum perengka emas enggau perengka pirak, ti udah diserahka iya empu.

¹⁶Raja Asa menua Judah enggau Raja Baasa menua Israel endang seruran beperang ngelaban pangan diri sekumbang seduai iya ke megai kuasa.

¹⁷Raja Baasa nyerang menua Judah lalu belabuh nguta nengeri Ramah, kena nagang orang tama-pansut ari menua Judah.

¹⁸Nya alai Raja Asa lalu ngambi semua pirak enggau emas ti disimpan dalam Rumah Sembiang, enggau dalam istana, lalu ngirumka utai nya ngena sekeda bala pemesai iya ngagai Damaskus, ngagai raja menua Siria, Benhadat anak Tabrimom, uchu Hesion. Baka tu ku pesan Raja Asa:

¹⁹“Manah tua beserakup baka apai tua menya. Pirak enggau emas tu diberi aku ngagai nuan. Anang agi beserakup enggau Raja Baasa menua Israel, ngambika iya mai bala soldadu iya pulai ari menua aku.”

²⁰Raja Benhadat besetuju enggau penemu Asa. Iya lalu ngasuh bala tuai soldadu iya enggau bala soldadu sida nyerang nengeri di menua Israel. Sida ngalahka Ijon, Dan, Abel Bet-maakah, menua ti semak Tasik Galili, enggau semua menua Naptali.

²¹Lebuh Raja Baasa ninga pasal utai ti udah nyadi, iya lalu badu agi nguta Ramah, lalu mansang ngagai Tirsah.

²²Udah nya Raja Asa lalu ngirumka atur ngagai serata menua Judah ngasuh semua orang, enda milih sapa-sapa, mai ari Ramah batu enggau ramu ti udah dikena Raja Baasa nguta nengeri nya. Asa lalu ngena utai nya nguta nengeri Mispah enggau nengeri Geba, sebuah nengeri di menua Benjamin.

²³Semua utai bukai ti udah dikereja Raja Asa, pemerani iya, enggau nengeri ti dikuta iya, bisi dituliska magang dalam Jerita Lama Pasal Raja Menua Judah. Tang lebuh iya nyau tuai, iya enda ulih bejalai laban kaki iya diempa penyakit.

²⁴Asa mati lalu dikuburka ba lumbung raja di Nengeri David, lalu anak iya Jehosapat nganti iya nyadi raja.

²⁵Dalam taun ti kedua Raja Asa megai menua Judah, Nadap anak Raja Jeroboam berengkah nyadi raja menua Israel. Iya merintah dua taun.

²⁶Baka apai iya ke dulu ari iya, iya bedosa ngelaban TUHAN, lalu iya nguluka orang Israel bedosa.

²⁷Baasa anak Ahijah, ari raban bansa Isakar, lalu begigaka akal kena ngelaban Nadap, lalu iya munuh Nadap lebuh Nadap enggau bala soldadu iya benung ngelulung nengeri Gibeton di menua Pilistin.

²⁸Pekara tu nyadi dalam taun ti ketiga Raja Asa megai menua Judah. Nya alai Baasa nganti Nadap nyadi raja menua Israel.

²⁹ Iya lalu tekala nya belabuh bebunuhka semua sida Jeroboam sebilik. Nitihka jaku ti udah disebut TUHAN ngena nembiak Iya nabi Ahijah ari Siloh, semua sida Jeroboam sebilik dibunuh magang. Nadai siku sida idup.

³⁰Pekara tu nyadi laban Jeroboam udah ngeringatka TUHAN Allah Taala ke disembah orang Israel, laban iya udah bedosa, lalu udah mai orang Israel bedosa.

³¹Semua utai bukai ti udah dikereja Nadap bisi dituliska magang dalam Jerita Lama Pasal Raja Menua Israel.

³²Raja Asa menua Judah enggau Raja Baasa menua Israel endang seruran beperang ngelaban pangan diri lebuh seduai iya agi megai kuasa.

³³Dalam taun ti ketiga Raja Asa megai perintah di menua Judah, Baasa anak Ahijah berengkah nyadi raja ke semua menua Israel, lalu iya merintah di Tirsah dua puluh taun.

³⁴Baka Raja Jeroboam ke dulu agi ari iya, iya mega bedosa ngelaban TUHAN, lalu iya mega nguluka orang Israel bedosa.