Read Iban 1 Raja 16 Bible Online

1 Raja 16 - Iban bible

1 Raja 16

¹TUHAN bejaku ngagai nabi Jehu anak Hanani, ngasuh iya meri pesan tu ngagai Baasa:

²“Dulu suba nuan enda dikelala orang, tang Aku udah ngaga nuan nyadika tuai bansa orang Israel ti nembiak Aku. Lalu diatu nuan udah bedosa baka Jeroboam, lalu udah nguluka bala nembiak Aku bedosa. Dosa sida udah nyungkak Aku ringat.

³Nya alai Aku deka muai nuan enggau kita sebilik, baka ke udah dikereja Aku ngagai Jeroboam.

⁴Kita sebilik ke mati di nengeri, deka diempa ukui, lalu kita sebilik ke mati di menua pesisir, deka diempa burung.”

⁵Semua utai bukai ti udah dikereja Raja Baasa, enggau pemerani iya, bisi dituliska magang dalam Jerita Lama Pasal Raja Menua Israel.

⁶Raja Basa mati lalu dikuburka di Tirsah, lalu anak iya Elah nganti iya nyadi raja.

⁷Pesan kena TUHAN ngelaban Baasa enggau sida sebilik, udah diberi nabi Jehu laban Baasa udah bedosa ngelaban TUHAN. Iya udah nyungkak TUHAN ringat, ukai semina laban utai ti jai ti udah dikereja iya, baka ke udah dikereja Raja Jeroboam dulu ari iya, tang mega laban iya udah munuh semua sida Jeroboam sebilik.

⁸Dalam taun ti kedua puluh enam Raja Asa megai perintah di menua Judah, Elah anak Baasa berengkah nyadi raja menua Israel, lalu iya merintah di Tirsah dua taun.

⁹Simri, iya nya siku ari pemesai iya ti nyadi tuai ngemataka setengah ari kerita perang iya, lalu begigaka akal kena ngelaban iya. Nyadi sekali di Tirsah, Elah mabuk ba rumah Arsa ti nyadi tuai ngemataka istana.

¹⁰Simri tama ngagai rumah nya, lalu munuh Elah. Iya lalu nganti Elah nyadi raja. Pekara tu nyadi dalam taun ti kedua puluh tujuh Raja Asa megai perintah di menua Judah.

¹¹Sepengelengkas Simri nyadi raja, iya lalu munuh semua sida Baasa sebilik. Semua kaban belayan enggau pangan Baasa ti lelaki dibunuh iya magang.

¹²Nya alai, nitihka jaku ti disebut TUHAN ngagai Baasa ngena nabi Jehu, Simri munuh semua sida Baasa sebilik.

¹³Laban sida besembahka engkeramba, enggau laban sida udah nguluka orang Israel bedosa, Baasa enggau anak iya Elah udah ngeringatka TUHAN Allah Taala ke disembah orang Israel.

¹⁴Semua utai bukai ti udah dikereja Elah bisi dituliska magang dalam Jerita Lama Pasal Raja Menua Israel.

¹⁵Dalam taun ti kedua puluh tujuh Raja Asa megai menua Judah, Simri lalu belabuh megai perintah di menua Israel di Tirsah. Iya megai perintah tujuh hari aja. Lebuh maya nya bala soldadu orang Israel benung ngelulung nengeri Gibeton di menua Pilistin.

¹⁶Lalu lebuh sida ninga Simri udah bepekat ngelaban raja, lalu udah munuh iya, sida lalu tekala nya, ba endur nya, nyiri tuai soldadu sida ke benama Omri nyadi raja menua Israel.

¹⁷Omri enggau bala soldadu iya lalu angkat ari Gibeton, mansang ngagai Tirsah lalu ngelulung nengeri nya.

¹⁸Lebuh Simri meda nengeri nya udah alah, iya lalu tama ngagai kuta ti dalam istana, nunu istana nya, lalu iya mati diempa api.

¹⁹Utai tu nyadi laban Simri udah bedosa ngelaban TUHAN. Baka Jeroboam ke dulu ari iya, iya udah nyungkak TUHAN ringat laban dosa iya, enggau laban iya udah nguluka orang Israel bedosa.

²⁰Semua utai bukai ti udah dikereja Simri, nyengkaum cherita pasal iya ke angkat ngelaban, bisi dituliska magang dalam Jerita Lama Pasal Raja Menua Israel.

²¹Nyadi orang Israel beserekang penemu: sekeda sida deka nyiri Tibni anak Ginat nyadi raja, lalu sida ti bukai dekaka Omri.

²²Ke pengujung iya, sida ke dekaka Omri menang. Tibni mati, lalu Omri nyadi raja.

²³Nya alai dalam taun ti ketiga puluh satu Raja Asa megai perintah di menua Judah, Omri berengkah nyadi raja menua Israel, lalu iya merintah dua belas taun. Dalam enam taun ti keterubah, iya merintah di Tirsah.

²⁴Udah nya iya lalu meli bukit Samaria ngena enam ribu singkap duit pirak ari orang siku ke benama Semer. Omri lalu ngaga kuta ngelingi bukit nya, ngaga sebuah nengeri dia, lalu iya ngumbai nengeri nya Samaria, ngangkatka Semer, ke bempu bukit nya dulu ari nya.

²⁵Omri bedosa ngelaban TUHAN lebih agi ari orang ke dulu ari iya.

²⁶Baka Jeroboam ke dulu agi ari iya, iya ngeringatka TUHAN Allah Taala ke disembah orang Israel laban dosa iya, enggau laban iya nguluka orang Israel bedosa enggau besembahka engkeramba.

²⁷Semua utai bukai ti udah dikereja Omri, enggau semua utai ti ulih iya bisi dituliska magang dalam Jerita Lama Pasal Raja Menua Israel.

²⁸Omri mati lalu dikuburka di Samaria. Iya lalu diganti anak iya Ahap nyadi raja.

²⁹Dalam taun ti ketiga puluh lapan Raja Asa megai perintah di menua Judah, Ahap anak Omri berengkah nyadi raja menua Israel, lalu iya merintah di Samaria dua puluh dua taun.

³⁰Iya bedosa ngelaban TUHAN lebih agi ari semua orang ke dulu agi ari iya.

³¹Iya enda puas ati bedosa baka Raja Jeroboam. Iya ngereja utai ti lebih agi jai ari ti udah dikereja Jeroboam: iya jadi enggau Jesebel, anak indu Raja Etbaal menua Sidon, lalu nyembah Baal.

³²Iya ngaga rumah sembiang Baal di Samaria, ngaga siti alta ke Baal, lalu ngengkahka alta nya dalam rumah sembiang nya.

³³Iya mega nirika siti engkeramba petara indu Aserah. Iya ngereja lebih mayuh agi dosa ari semua raja menua Israel ti bukai ke dulu agi ari iya. Ketegal nya TUHAN Allah Taala ke disembah orang Israel ringat.

³⁴ Lebuh Ahap megai perintah, Hil ari Betel lalu nirika nengeri Jeriko baru. Munyi ti udah dipadahka TUHAN dulu ari nya ngena Josua anak Nun, anak tuai Hil ke benama Abiram mati lebuh iya nudukka batu pemun nengeri Jeriko, lalu anak bunsu iya ke benama Segup mega mati, lebuh iya ngaga pintu nengeri nya.