Read Iban 1 Raja 17 Bible Online

1 Raja 17 - Iban bible

1 Raja 17

¹ Siku nabi ke benama Elijah, ke datai ari Tisbe di menua Giliat, bejaku ngagai Raja Ahap. Ku iya, “Dalam nama TUHAN Allah Taala ti idup, ke disembah orang Israel sereta dipetuaika aku, aku madahka ngagai nuan, menua Israel nadai ambun tauka ujan dalam dua tauka tiga taun ti deka datai tu, nyentuk ngagai maya aku ngasuh hari ujan.”

²Udah nya TUHAN lalu bejaku ngagai Elijah,

³“Angkat ari tu, lalu bejalai tunga ke timur, lalu belalai semak sungai Cherit, tunga ke timur ari Sungai Jordan.

⁴Nuan deka ngirup ari sungai nya, lalu Aku udah ngasuh burung kak mai pemakai ngagai nuan dia.”

⁵Elijah ngasika pesan TUHAN, mansang ngagai sungai Cherit, lalu diau dia.

⁶Iya ngirup ari sungai nya, lalu burung kak mai roti enggau dagin tiap pagi enggau tiap lemai ngagai iya.

⁷Nyau kelama, sungai nya pen rangkai, laban hari nadai ujan.

⁸Udah nya TUHAN lalu bejaku ngagai Elijah,

⁹ “Alai nuan mansang diatu ngagai nengeri Sarepat, semak Sidon, lalu diau dia. Aku udah ngasuh siku indu balu, ti diau dia, nupi nuan.”

¹⁰Nya alai Elijah mansang ngagai nengeri Sarepat. Lebuh iya datai ba mua pintu nengeri nya, iya tepedaka siku indu ke balu ngumpul kayu api. “Endu, uji bai ai irup ngagai aku,” ku Elijah bejaku enggau iya.

¹¹Lebuh indu nya baru deka mansang ngambi ai, Elijah lalu ngangau, “Lalu bai mega roti ke aku.”

¹²Ku indu nya nyaut, “Aku besumpah dalam nama TUHAN Allah Taala nuan ti idup, aku nadai roti. Utai ti dikemisi aku nya semina segenggam aja tepung dalam sigi mangkuk, enggau minyak kana mimit dalam kebuk. Aku datai ditu deka ngumpul kayu api, lalu aku baru deka pulai ke rumah lalu nyendiaka utai ti mimit nya ke anak aku enggau ke aku empu. Nya meh naka kami duai ulih makai. Udah nya kami duai deka mati keberuran.”

¹³“Anang irau, Endu,” ku Elijah bejaku enggau iya. “Mupuk meh nuan lalu sediaka pemakai nuan. Tang gaga dulu siti tuku roti ti mit ari utai ti dikemisi nuan, lalu bai utai nya ngagai aku. Udah nya baru nuan nyendiaka teda utai nya ke seduai menyanak.

¹⁴Laban tu utai ti disebut TUHAN Allah Taala ke disembah orang Israel, ‘Mangkuk nya deka seruran bisi tepung, lalu kebuk nya deka seruran bisi minyak, sebedau Aku, ti TUHAN, ngasuh hari ujan.’ ”

¹⁵Indu balu nya mupuk lalu ngereja utai ti diasuh Elijah, lalu semua sida nadai kala suntuk pemakai.

¹⁶Munyi jaku ti udah disebut TUHAN ngena Elijah, mangkuk nya enda kala nadai tepung, lalu kebuk nya enda kala nadai minyak.

¹⁷Nyau kelama udah bekau nya, anak indu balu nya sakit. Iya majak balat-sebalat, lalu mati.

¹⁸Ku indu nya bejaku enggau Elijah, “Nabi, nama kebuah nuan ngereja utai tu ngagai aku? Kati nuan datai ditu deka ngasuh Allah Taala ngingatka dosa aku, lalu ngasuh anak aku mati?”

¹⁹“Beri nembiak nya ngagai aku,” ku Elijah bejaku. Iya lalu ngambi nembiak nya ari jari indu nya, mai iya ke sadau ngagai bilik ti alai Elijah diau, lalu ngalika nembiak nya ba katil.

²⁰Udah nya iya lalu besampi enggau nyawa ti inggar, “O TUHAN Allah Taala aku, nama kebuah Nuan udah ngereja utai ti ngenyai tu ngagai indu ke balu tu? Iya udah manah enggau aku lalu ngintu aku, lalu diatu Nuan udah munuh anak iya!”

²¹ Udah nya Elijah lalu nyuntaika diri atas nembiak nya tiga kali, lalu besampi, “O TUHAN Allah Taala aku, asuh nembiak tu idup baru!”

²²TUHAN nyaut sampi Elijah. Nembiak nya belabuh enseput baru, lalu idup.

²³Elijah lalu mai nembiak nya nurun ke baruh ngagai indai iya. Lalu ku Elijah bejaku enggau indai nembiak nya, “Tu anak nuan. Iya idup!”

²⁴Disaut indu nya, “Diatu baru aku nemu nuan tu amat nabi, lalu TUHAN sigi amat bejaku ngena nuan!”