Read Iban 1 Raja 18 Bible Online

1 Raja 18 - Iban bible

1 Raja 18

¹Nyau kelama udah bekau nya, dalam taun ti ketiga menua nya udah kena laban kemarau, TUHAN bejaku ngagai Elijah, “Alai nuan betemu enggau Raja Ahap. Aku deka ngasuh hari ujan.”

²Elijah lalu mupuk. Lapar pungkang di menua Samaria endang balat amat nyadi.

³Nya alai Ahap ngangauka Obadiah, ti nyadi tuai ngemataka istana. (Obadiah nya orang ke angkunka TUHAN,

⁴lalu lebuh Jesebel benung bebunuhka bala nabi TUHAN, Obadiah mai seratus iku bala nabi TUHAN, magi sida ngagai dua iti raban, lima puluh iku dalam siti-siti raban, ngelalaika sida dalam lubang gua, lalu meri sida pemakai enggau ai.)

⁵Ku Ahap bejaku enggau Obadiah, “Aram kitai mupuk ngagai [36] semua mata ai, enggau semua sungai di menua tu, nyangka ukur kitai bisi tetemuka rumput ke kuda enggau keledai, ngambika kitai enda ibuh munuh jelu kitai.”

⁶Sida lalu magi menua ti deka dipatau sida siku-siku. Ahap mupuk kediri nuju ngagai endur siti, lalu Obadiah mupuk kediri nuju endur bukai.

⁷Lebuh Obadiah benung di rantau jalai, Elijah betemu enggau iya. Obadiah ngelala Elijah, meremi di mua Elijah, lalu nanya, “Kati tu amat nuan, Elijah?”

⁸“Aku meh tu,” ku Elijah nyaut. “Mupuk nuan, lalu padahka ngagai tuan nuan, ‘Elijah bisi ditu.’ ”

⁹Ku Obadiah nyaut, “Nama utai ti udah dikereja aku alai nuan ngasuh aku minta diri dibunuh Raja Ahap?

¹⁰Dalam nama TUHAN ti idup, ti Allah Taala nuan, aku besumpah madahka ngagai nuan, raja nya udah begigaka nuan di semua menua di dunya tu. Lebuh orang ke merintah nengeri siti-siti madahka nuan nadai di nengeri nya, Ahap lalu ngasuh orang nya besumpah madahka nuan nadai ulih digiga di menua nya.

¹¹Lalu diatu nuan ngasuh aku mupuk lalu madahka nuan bisi ditu?

¹²Kati enti Roh TUHAN nabanka nuan ngagai endur ti enda ditemu orang lebuh aku mupuk ari endur tu? Udah nya, lebuh aku madahka ngagai Ahap nuan bisi ditu, lalu iya nadai tetemuka nuan, iya deka munuh aku. Nuan ingat, aku tu orang ke angkun nyembah TUHAN kenyau ari aku agi biak.

¹³Kati nuan nadai udah kala ninga pasal Jesebel ti munuh bala nabi TUHAN, lalu aku ngelalaika seratus iku sida dalam lubang gua, dalam dua iti raban, lima puluh iku dalam siti-siti raban, lalu meri sida pemakai enggau ai?

¹⁴Nya alai, baka ni ku nuan tau ngasuh aku mupuk lalu madahka ngagai raja pasal nuan ke bisi ditu? Iya tentu deka munuh aku!”

¹⁵Disaut Elijah, “Dalam nama TUHAN ti Pemadu Bekuasa, ke dipetuaika aku, aku besemaya deka betemu enggau raja sehari tu.”

¹⁶Nya alai, Obadiah mansang ngagai Raja Ahap, lalu madahka ngagai Ahap. Ahap lalu mupuk, mansang betemu enggau Elijah.

¹⁷Lebuh Ahap meda Elijah, Ahap lalu bejaku, “Nya orang ke ngaga pengachau di menua Israel!”

¹⁸“Ukai aku ke ngaga pengachau,” ku Elijah nyaut. “Nuan empu ke ngaga pengachau - nuan enggau apai nuan. Nuan enda ngasika pesan TUHAN, lalu nyembah engkeramba Baal.

¹⁹Nya alai, asuh semua orang Israel betemu enggau aku ba Bukit Karmel. Bai 450 iku bala nabi Baal, enggau 400 iku bala nabi petara Aserah ke sama begulai makai enggau Kuin Jesebel.”

²⁰Ahap lalu mesanka semua orang Israel enggau bala nabi Baal, ngasuh sida begempuru ba Bukit Karmel.

²¹Elijah lalu mansang ngagai orang mayuh, lalu bejaku, “Ni pengelama baru kita deka ngaga pemutus penemu kita? Enti TUHAN nya Allah Taala, sembah meh Iya. Tang enti Baal nya Allah Taala, sembah meh iya!” Tang orang mayuh enda nyaut.

²²Udah nya Elijah bejaku, “Semina aku aja nabi TUHAN ti agi tinggal, tang Baal bisi 450 iku nabi.

²³Bai dua iku sapi ti lelaki. Awakka bala nabi Baal ngambi siku sapi, munuh iya, netak iya, lalu manggaika iya ba atas kayu, tang anang nyelup kayu nya. Aku deka ngereja baka nya ke sapi siku.

²⁴Udah nya awakka bala nabi Baal besampi ngagai petara sida, lalu aku deka besampi ngagai TUHAN. Iya ke nyaut ngena api, nya meh Allah Taala.” Orang mayuh manjung madahka sida besetuju.

²⁵Udah nya Elijah bejaku enggau bala nabi Baal, “Laban kita mayuh tubuh, awakka kita meh dulu ngambi siku sapi ti lelaki, lalu nyendiaka iya. Awakka kita besampi ngagai petara kita, tang anang nyelup kayu nya ngena api.”

²⁶Sida lalu ngambi sapi ti lelaki ti udah dibai ngagai sida, nyendiaka sapi nya, lalu besampi ngagai Baal nyentuk ngagai tengah hari. Ku sida ngangau enggau nyawa ti inggar, “Saut kami, Baal!” Sida majak betanda ngelingi alta ti udah digaga sida. Tang Baal nadai nyaut sida.

²⁷Ba urung tengah hari, Elijah lalu belabuh ngeleseka sida. “Besampi inggar agi! Iya petara, ukai enda? Kada enda iya benung bemimpi, tauka bira, tauka udah bejalai ngagai menua bukai! Enti iya tinduk, gerak iya!”

²⁸Bala nabi Baal lalu besampi inggar agi, lalu ngurik tubuh diri ngena duku enggau lungga, nitihka adat sida besembah, datai ke darah nyau nelusur tubuh sida.

²⁹Sida majak rauh-rauh besampi nyentuk ngagai ngalih hari. Tang nadai ga Baal nyaut sida. Siti pen nadai meh saut didinga.

³⁰Udah nya Elijah lalu bejaku ngagai orang mayuh, “Datai semak kitu ke agi ngagai aku.” Semua sida lalu begempuru ngelingi iya. Iya lalu belabuh ngaduka alta TUHAN ti udah runtuh.

³¹ Iya ngambi dua belas igi batu, sigi ke genap raban bansa orang Israel ti ngangkatka nama bala anak lelaki Jakop. Jakop udah diberi TUHAN nama Israel.

³²Iya lalu ngena batu nya ngaduka alta alai nyembah TUHAN. Iya ngeruang parit ngelingi alta nya. Parit nya ulih ngundan kira 15 liter ai.

³³Udah nya iya nusun kayu ba alta nya, netak sapi ti lelaki nya, lalu manggaika lampang sapi nya ba atas kayu nya. Ku iya, “Isi penuhka empat igi tepayan enggau ai, lalu tuang ai nya ba piring enggau ba kayu tu.” Sida lalu ngereja nitihka asuh iya,

³⁴lalu ku Elijah, “Beri mayuh agi ai.” Sida lalu nurutka jaku iya. “Kereja nya sekali agi,” ku iya bejaku. Sida lalu nurutka jaku iya baru.

³⁵Ai nya nyau lilih ari alta nya, lalu ngemenuhka parit ti ngelingi alta nya.

³⁶Ba urung ngalih hari, endang maya ngenjuk piring, nabi Elijah mansang ngagai alta, lalu besampi. Ku iya, “O TUHAN Allah Taala ke disembah Abraham, Isak enggau Jakop, beri tanda kena mandangka Nuan endang amat Allah Taala ke disembah orang Israel, lalu aku tu endang amat nembiak Nuan, ti udah ngereja semua utai tu nitihka pesan Nuan.

³⁷Saut aku, TUHAN, saut aku, ngambika orang tu nemu Nuan endang TUHAN Allah Taala, lalu Nuan deka mai sida pulai baru ngagai Nuan.”

³⁸TUHAN lalu ngasuh api nurun ari langit. Api nya lalu nganguska piring, kayu, enggau batu nya, ngasuh tanah dia angat, lalu ngerangkaika ai ti dalam parit nya.

³⁹Lebuh orang mayuh meda nya, sida lalu nyungkurka diri ke tanah, lalu bejaku enggau nyawa ti inggar, “TUHAN meh Allah Taala. Semina TUHAN siku aja ti Allah Taala!”

⁴⁰Elijah lalu bejaku ngagai sida, “Tangkap bala nabi Baal. Anang nejuka sida rari!” Orang mayuh lalu nangkap semua nabi Baal. Elijah lalu mai sida ngagai anak sungai Kison, lalu munuh sida dia.

⁴¹Udah nya Elijah lalu bejaku ngagai Raja Ahap, “Alai nuan makai. Aku bisi ninga munyi auh ujan datai.”

⁴² Lebuh Ahap mansang makai, Elijah niki ngagai tuchung Bukit Karmel. Dia iya lalu meremika diri ke tanah. Pala iya ba entara patung iya.

⁴³Ku iya bejaku ngagai orang gaji iya, “Uji perening tunga ke tasik.” Orang gaji iya mupuk, lalu pulai baru. Ku iya, “Nadai aku meda utai.” Elijah ngasuh iya ninjau tujuh kali.

⁴⁴Chukup ketujuh kali, orang gaji nya pulai, lalu ku iya, “Aku bisi meda siti mua hari mesai tapa jari, datai ari tasik.” Elijah lalu bejaku ngagai orang gaji iya, “Alai nuan mansang ngagai Raja Ahap, lalu asuh iya nepan kerita perang iya, lalu pulai, enggai ke iya tepagang laban ujan.”

⁴⁵Enda lama udah nya langit nyau chelum laban mua hari. Ribut belabuh muput, lalu hari bangat amat ujan. Ahap nepan kerita perang iya, lalu mupuk pulai ngagai Jesril.

⁴⁶Kuasa TUHAN lalu datai ngagai Elijah. Iya nyintalka gari iya erat ba punggung iya, lalu belanda dulu ari Ahap nyentuk ngagai Jesril.