Read Iban 1 Raja 19 Bible Online

1 Raja 19 - Iban bible

1 Raja 19

¹Raja Ahap lalu madahka ngagai bini iya Jesebel pasal semua utai ti udah dikereja Elijah, enggau chara iya munuh semua nabi Baal.

²Jesebel lalu ngirumka pesan ngagai Elijah, “Awakka bala petara munuh aku enti aku, lebuh maya tu pagila, enda ngereja ngagai nuan utai ti udah dikereja nuan ngagai bala nabi Baal.”

³Elijah takut, lalu rari. Iya mai orang gaji iya, lalu mansang ngagai Beer-seba di menua Judah. Iya lalu ninggalka orang gaji iya dia.

⁴ Elijah bejalai sehari nya ngagai menua puang. Iya ngetu lalu duduk belindung di baruh sepun kayu, ngajihka diri mati. “Utai tu kelalu balat, TUHAN,” ku iya besampi. “Ambi nyawa aku. Manah agi aku mati!”

⁵Iya gali di baruh kayu nya, lalu tinduk. Tekala nya siku melikat lalu negu iya, lalu ku melikat nya bejaku, “Dani, lalu makai.”

⁶Elijah malik lalu tepedaka siti tuku roti enggau sigi kebuk ai semak pala iya. Iya makai, ngirup, lalu gali baru.

⁷Melikat TUHAN datai baru, lalu ngerak iya kedua kali. Ku melikat nya bejaku, “Angkat lalu makai, enggai ke nuan enda ulih bejalai.”

⁸Elijah angkat, makai, ngirup, lalu pemakai nya chukup ngasuh iya kering bejalai empat puluh hari ngagai Sinai, bukit ti kudus.

⁹Iya lalu tama ngagai siti lubang gua, lalu bemalam dia. Tekala nya TUHAN lalu bejaku ngagai iya, “Elijah, nama pengawa nuan ditu?”

¹⁰ Ku Elijah nyaut, “TUHAN ti Pemadu Bekuasa, aku endang seruran betuaika Nuan siku aja. Tang orang Israel udah ngelanggar sempekat sida enggau Nuan, udah ngeruntuhka alta Nuan, lalu udah munuh semua bala nabi Nuan. Ka semina aku aja ti agi idup, lalu sida nguji munuh aku!”

¹¹“Pansut nuan, lalu bediri di mua Aku ba atas bukit,” ku TUHAN bejaku ngagai iya. Udah nya TUHAN mansa, lalu ngasuh ribut ti deras datai, ti mechahka bukit, lalu mambarka batu, tang TUHAN nadai dalam ribut nya. Ribut nya ngetu muput. Udah nya tanah lalu berenyang, tang TUHAN nadai dalam tanah ti berenyang nya.

¹²Udah bekau tanah berenyang, api lalu datai, tang TUHAN nadai dalam api nya. Lebuh api udah datai, nyawa lalu bisi betelai.

¹³Lebuh Elijah ninga nya, iya mampul mua diri ngena kelambi iya, lalu pansut, lalu bediri ba mua lubang gua nya. Nyawa siti lalu bejaku enggau iya, “Elijah, nama pengawa nuan ditu?”

¹⁴Ku Elijah nyaut, “TUHAN ti Pemadu Bekuasa, aku endang seruran betuaika Nuan siku aja. Tang orang Israel udah ngelanggar sempekat sida enggau Nuan, udah ngeruntuhka alta Nuan, lalu munuh semua bala nabi Nuan. Ka semina siku aku aja agi tinggal, lalu sida nguji munuh aku.”

¹⁵ Ku TUHAN bejaku, “Alai nuan pulai ngagai menua puang semak Damaskus, udah nya tama ngagai nengeri nya, lalu tata Hasael nyadi raja menua Siria.

¹⁶ Tata mega Jehu anak Nimsi nyadi raja menua Israel, lalu tata mega Elisa anak Sapat ari Abel-meholah nganti nuan nyadi nabi.

¹⁷Barang sapa enda kena bunuh Hasael, deka dibunuh Jehu, lalu barang sapa enda kena bunuh Jehu, deka dibunuh Elisa.

¹⁸ Tang Aku deka ngasuh tujuh ribu iku orang idup di menua Israel, iya nya semua orang ke taluk ngagai Aku, orang ke enda meremi ngagai Baal, tauka nyium engkeramba iya.”

¹⁹Elijah angkat lalu nemu Elisa benung ngeradu tanah ngena sepasang jelu sapi ti lelaki. Sebelas pasang jelu sapi bejalai dulu ari iya. Pasang ti dikena iya ngeradu tanah nya pasang ti penudi. Elijah muka kelambi iya, lalu ngerasukka kelambi nya ba Elisa.

²⁰Elisa lalu ninggalka jelu sapi iya, belanda nitihka Elijah. Ku iya, “Awakka aku meri selamat tinggal ngagai apai enggau indai aku. Udah nya baru aku bejalai enggau nuan.” Disaut Elijah, “Pulai meh nuan dulu. Enda aku nagang nuan!” [37]

²¹Udah nya Elisa mansang ngagai sapi iya, munuh sapi dua iku nya, lalu manduk dagin jelu nya, ngena kungkung sapi nya empu nyadika kayu api. Iya meri dagin nya ngagai orang mayuh, lalu sida makai. Udah nya iya mupuk, lalu nitihka Elijah, lalu nyadi penulung iya.