Read Iban 1 Raja 2 Bible Online

1 Raja 2 - Iban bible

1 Raja 2

¹Lebuh David baru deka ngapuska seput, iya mesanka anak iya Solomon, lalu meri jaku ajar ti penudi ngagai iya:

²“Aku nyau deka mati. Nuan enda tau enda kering sereta berani,

³lalu kereja semua utai ti diasuh TUHAN Allah Taala nuan. Nuan enda tau enda ngasika semua adat enggau pesan Iya, munyi ti ditulis dalam Adat Moses, ngambika, di sebarang endur nuan bejalai, nuan deka mujur dalam semua utai ti dikereja nuan.

⁴Enti nuan ngasika TUHAN, Iya deka ngamatka semua semaya ti udah digaga Iya, lebuh Iya madahka peturun aku deka megai perintah di menua Israel, enti sida bejimat sereta tetap ati ngasika pesan Iya enggau pengabis ati sida sereta enggau pengabis semengat sida.

⁵ “Siti agi pekara. Nuan ingatka utai ti udah dikereja Joap ngagai aku, lebuh iya munuh dua iku tuai soldadu menua Israel, Abner anak Ner enggau Amasa anak Jeter. Nuan ingatka chara iya munuh seduai nya, lebuh maya nadai pengachau, kena iya bebalaska orang ke dibunuh Abner seduai Amasa lebuh maya beperang. Joap munuh orang ke nadai penyalah.[3] Diatu aku betanggungjawapka utai ti udah dikereja iya, lalu aku kena laban penusah ketegal nya.

⁶Nuan nemu utai ti patut dikereja diri. Nuan enda tau nejuka iya mati tuai.

⁷ Tang nuan enda tau enda manah enggau bala anak Barsilai ari Giliat, lalu ngibun sida, laban sida udah manah enggau aku, lebuh aku ngerarika diri ari menyadi nuan Absalom.

⁸ “Baka nya mega Simei anak Gera, ari nengeri Bahurim, di menua Benjamin. Iya balat amat nyumpah aku, lebuh aku mansang ngagai Mahanaim, tang lebuh iya betemu enggau aku ba Sungai Jordan, aku besumpah enggau iya dalam nama TUHAN madahka diri enda munuh iya.

⁹Tang nuan enda tau enda ngukum iya. Nuan nemu utai ti patut dikereja diri, lalu nuan enda tau enda ngasuh orang munuh iya.”

¹⁰David mati lalu dikuburka di Nengeri David.

¹¹ Iya udah nyadi raja empat puluh taun. Iya udah merintah tujuh taun di Hebron, lalu tiga puluh tiga taun di Jerusalem.

¹² Solomon lalu nganti apai iya nyadi raja, lalu kuasa iya kukuh.

¹³Udah nya Adonijah (indai iya Hagit) lalu mansang ngagai Batseba, indai Solomon. “Kati nuan datai enggau ati ti manah?” ku Batseba nanya. “Enggau ati ti manah,” ku iya nyaut.

¹⁴Lalu ku iya nambahka jaku diri, “Aku bisi utai ti deka dipinta aku ari nuan.” “Nama utai nya?” ku Batseba nanya.

¹⁵Ku Adonijah nyaut, “Nuan nemu, aku endang patut nyadi raja. Semua orang di menua Israel endang ngadang nya magang. Tang utai ti nyadi nya lain agi ari nya, lalu menyadi aku nyadi raja, laban nya endang peneka TUHAN.

¹⁶Nya alai diatu aku bisi utai ti deka dipinta aku. Aku minta nuan meri utai nya ngagai aku.” “Utai nama?” ku Batseba nanya.

¹⁷ Ku Adonijah nyaut, “Aku minta nuan nanya Raja Solomon enti aku tau bempu Abisak, indu ke datai ari Sunem, nyadika bini aku. Aku nemu Solomon enggai nyebut ‘enggai’ ngagai nuan.”

¹⁸“Barang ku jaku,” ku Batseba nyaut. “Ila aku bejaku enggau raja ngarika nuan.”

¹⁹Batseba lalu betemu enggau raja, deka bejaku enggau iya, ngarika Adonijah. Raja lalu bediri nyambut penatai indai iya, lalu nyungkurka diri di mua indai iya. Udah nya Solomon lalu duduk ba kerusi diraja iya, lalu ngasuh orang mai siti agi kerusi diraja, alai indai iya ke lalu nudukka diri ari kanan iya.

²⁰Ku indai iya bejaku, “Aku bisi siti utai ti deka dipinta aku ari nuan. Anang nulak utai ti dipinta aku.” “Utai nama, indai?” ku Solomon nanya. “Nadai aku nulak utai ti dipinta nuan.”

²¹Ku indai iya nyaut, “Awakka menyadi nuan Adonijah bempu Abisak nyadika bini iya.”

²²“Nama kebuah nuan ngasuh aku meri Abisak ngagai iya?” ku Solomon nanya. “Manah agi enti nuan ngasuh aku meri kerusi diraja tu ngagai iya. Iya menyadi tuai aku, lalu Imam Abiatar enggau Joap setanah enggau iya!” [4]

²³Udah nya Solomon lalu besumpah dalam nama TUHAN, “Awakka Allah Taala munuh aku enti aku enda munuh Adonijah ketegal iya minta utai tu!

²⁴TUHAN udah ngasuh aku duduk ba kerusi diraja apai aku David. Iya udah ngamatka semaya Iya, lalu udah meri perintah tu ngagai aku, enggau ngagai peturun aku. Aku besumpah dalam nama TUHAN ti idup, Adonijah deka mati sehari tu!”

²⁵Raja Solomon lalu meri atur ngagai Benaiah. Benaiah mansang lalu munuh Adonijah.

²⁶ Udah nya Raja Solomon lalu bejaku enggau Imam Abiatar, “Pulai nuan ngagai rumah nuan empu di Anatot. Nuan patut dibunuh, tang aku enggai ngasuh orang munuh nuan diatu, laban nuan ngemataka Peti Lampang Batu Adat TUHAN lebuh nuan agi enggau apai aku, lalu nuan udah sama enggau apai aku ngasaika semua penusah iya.”

²⁷ Udah nya Solomon lalu muai Abiatar ari pengawa iya ti nyadi imam TUHAN. Tu ngamatka utai ti udah disebut TUHAN di Siloh, pasal Imam Eli enggau peturun iya.

²⁸Lebuh Joap ninga berita pasal utai ti udah nyadi, (iya udah nyukung Adonijah, tang enda nyukung Absalom.) iya lalu ngerarika diri ngagai Langkau Kain TUHAN, lalu bepegai ba sukut alta. [5]

²⁹Lebuh Raja Solomon ninga Joap udah ngerarika diri ngagai Langkau Kain TUHAN, lalu bediri ngimbai alta, Solomon lalu ngasuh siku seruan mansang ngagai Joap, nanyaka kebuah iya ngerarika diri ngagai alta nya. Ku Joap, iya udah ngerarika diri ngagai TUHAN, laban iya takutka Solomon. Nya alai Raja Solomon lalu ngasuh Benaiah munuh Joap.

³⁰Benaiah lalu mansang ngagai Langkau Kain TUHAN, lalu bejaku enggau Joap, “Raja ngasuh nuan pansut.” “Enggai aku,” ku Joap nyaut. “Awakka aku mati ditu.” Benaiah pulai baru ngagai raja, lalu madahka jaku Joap ngagai iya.

³¹“Kereja aja utai ti ku Joap,” ku Solomon nyaut. “Bunuh iya, lalu kuburka iya. Nya baru aku, tauka bala peturun David ti bukai, enda agi betanggungjawapka utai ti udah dikereja Joap lebuh iya munuh orang ke nadai penyalah.

³²TUHAN deka ngukum Joap ketegal iya udah munuh orang nya, lalu enda madahka ngagai apai aku. Joap udah munuh dua iku orang ke nadai penyalah, ke badas agi ari iya empu, Abner, tuai soldadu orang Israel, enggau Amasa, tuai soldadu orang Judah.

³³Ukum ketegal iya ti udah munuh orang nya deka ninggang Joap, enggau peturun iya belama iya. Tang TUHAN deka ngemujurka peturun David ke duduk ba kerusi diraja iya.”

³⁴Nya alai Benaiah lalu mansang ngagai Langkau Kain TUHAN, lalu munuh Joap. Joap lalu dikuburka di menua iya, ari luar nengeri.

³⁵Raja lalu ngasuh Benaiah nyadi tuai soldadu, nganti Joap, lalu ngasuh Sadok nyadi imam, nganti Abiatar.

³⁶Udah nya raja lalu mesanka Simei, lalu ku iya bejaku enggau Simei, “Gaga sebuah rumah ke diri empu ditu di Jerusalem. Diau dalam rumah nya, lalu anang angkat ari nengeri tu.

³⁷Enti nuan angkat ari tu ngilah sungai Kidron, nuan tetap deka mati, lalu nuan empu deka betanggungjawapka pemati diri.”

³⁸“Au, Tuan Raja,” ku Simei nyaut. “Aku deka ngereja utai ti ku nuan.” Nya alai iya diau lama di Jerusalem.

³⁹Tang tiga taun udah bekau nya, dua iku ulun Simei rari ngagai Raja Akis anak Maakah ti nyadi raja di Gat. Lebuh Simei ninga berita seduai iya bisi di Gat,

⁴⁰iya lalu nyendiaka keledai iya, lalu mansang ngagai Raja Akis di Gat, ngiga ulun iya. Iya lalu tetemuka seduai iya, lalu mai seduai iya pulai.

⁴¹Lebuh Solomon ninga berita pasal utai ti udah dikereja Simei,

⁴²iya lalu mesanka Simei, lalu bejaku, “Aku udah ngasuh nuan besemaya di mua TUHAN, enda ninggalka Jerusalem. Lalu aku udah meri jaku tangkan ngagai nuan, enti nuan ninggalka Jerusalem, nuan tetap deka mati. Lalu nuan udah besetuju enggau nya, lalu madahka diri deka ngasika aku, ukai enda?

⁴³Nya alai, nama kebuah nuan mungkirka semaya nya, lalu enda ngasika pesan aku?

⁴⁴Nuan endang nemu semua utai ti salah, ti udah dikereja nuan ngagai apai aku David. Nya alai, TUHAN deka ngukum nuan ketegal utai nya.

⁴⁵Tang Iya deka merekatka aku, lalu deka ngasuh perintah David meruan belama iya.”

⁴⁶Udah nya raja lalu bejaku enggau Benaiah. Benaiah mansang, lalu munuh Simei. Nya alai, semua kuasa diatu ba jari Solomon magang.