Read Iban 1 Raja 20 Bible Online

1 Raja 20 - Iban bible

1 Raja 20

¹Raja Benhadat menua Siria lalu ngempuruka semua bala soldadu iya. Iya disukung tiga puluh dua iku raja ti bukai enggau kuda enggau kerita kuda sida. Iya datai, ngelulung lalu nyerang nengeri Samaria.

²Iya ngasuh bala seruan tama ngagai nengeri nya betemu enggau Raja Ahap menua Israel, mai pesan tu, “Raja Benhadat minta

³nuan nyerahka ngagai iya pirak enggau emas nuan, bala indu kita, enggau bala anak kita ke pemadu kering.”

⁴Raja Ahap lalu nyaut, “Padahka ngagai tuan aku, Raja Benhadat, aku besetuju. Iya tau bempu aku enggau semua utai aku.”

⁵Udah nya bala seruan datai baru ngagai Ahap, mai siti agi peminta ari Benhadat, “Aku udah ngirumka pesan ngagai nuan, ngasuh nuan nyerahka ngagai aku pirak enggau emas nuan, bala indu ke diempu nuan, enggau bala anak nuan.

⁶Tang diatu aku deka ngasuh bala pemesai aku nyerungkai istana nuan enggau rumah bala pemesai nuan, lalu ngambi semua utai ti dikira sida [38] berega. Sida deka datai dia ba urung maya tu pagila.”

⁷Raja Ahap lalu mesanka semua bala tuai dalam menua nya, lalu ku iya bejaku, “Kita nemu, orang tu deka ngerusak kitai. Iya udah ngirumka pesan ngagai aku, minta aku meri bala bini enggau bala anak aku, perengka pirak enggau perengka emas aku, lalu aku udah besetuju.”

⁸Bala tuai enggau orang mayuh lalu nyaut, “Anang mendingka iya. Anang ngalahka diri.”

⁹Nya alai Ahap lalu nyaut bala seruan Benhadat, “Padahka ngagai tuan raja aku, aku besetuju enggau peminta iya ti keterubah, tang aku enda besetuju enggau peminta iya ti kedua.” Bala seruan nya mupuk, lalu udah nya datai baru mai siti agi pesan

¹⁰ari Benhadat: “Awakka bala petara munuh aku enti aku enda ngaga nengeri Samaria nyadi amau chukup kena ngisi tapa jari semua soldadu aku!”

¹¹Disaut Raja Ahap, “Padahka ngagai Raja Benhadat, orang ke amat nyadi soldadu semina temegah udah lepas perang, ukai sebedau beperang.”

¹²Benhadat nerima saut ari Ahap lebuh iya, enggau sida raja ti bukai ke setanah enggau iya, agi benung ngirup dalam langkau kain sida. Iya lalu ngasuh bala soldadu iya sedia nyerang nengeri nya. Sida lalu belatur.

¹³Lebuh maya nya, siku nabi betemu enggau Raja Ahap, lalu bejaku, “TUHAN bisi nyebut, ‘Anang takutka soldadu ti mayuh nya! Aku deka ngasuh nuan menang ngelaban bala soldadu nya sehari tu, ngambika nuan nemu, Aku tu endang TUHAN.’ ”

¹⁴“Sapa nguluka bala nyerang?” ku Ahap nanya. Disaut nabi nya, “TUHAN madahka, bala soldadu ti agi biak, ke dipegai tuan gabenor pelilih menua deka nguluka bala.” Lalu ku Ahap nanya, “Sapa deka dulu ngelabuhka jari?” “Nuan,” ku nabi nya nyaut.

¹⁵Raja lalu mesanka bala soldadu ti agi biak, ke diuluka bala gabenor pelilih menua, dua ratus tiga puluh dua iku semua sida. Udah nya iya lalu mesanka bala soldadu orang Israel, tujuh ribu iku semua sida.

¹⁶Sida lalu nyerang munsuh ba urung tengah hari, lebuh Benhadat enggau tiga puluh dua iku raja bukai ke setanah enggau iya benung mabuk dalam langkau kain sida.

¹⁷Bala soldadu ti agi biak bejalai dulu. Bala pematau ke diasuh Benhadat bejalai, madahka siti raban soldadu bisi pansut ari nengeri Samaria.

¹⁸Benhadat lalu meri atur, “Tangkap sida idup-idup, nemuka sida nya datai deka nyerang, tauka mai kitai bebaik.”

¹⁹Bala soldadu ti agi biak nya lalu nguluka orang nyerang, dientudika bala soldadu orang Israel,

²⁰lalu genap iku sida munuh orang ke dilaban sida. Orang Siria rari, digagai bala orang Israel, tang Benhadat rari nepan kuda, disempulang sekeda soldadu iya ke nepan kuda.

²¹Raja Ahap lalu enggau orang betempuh, ngerampas [39] kuda enggau kerita perang, lalu balat amat ngalahka orang Siria.

²²Udah nya nabi nya lalu mansang ngagai Raja Ahap, lalu bejaku, “Pulai nuan, tambahka bala soldadu nuan, lalu bejimat begagaka pelan, laban raja menua Siria deka nyerang baru lebuh musin bungai ti deka datai tu ila.”

²³Ku bala pemesai Raja Benhadat bejaku enggau iya, “Bala petara orang Israel nya bekuasa di menua ti bebukit. Nya kebuah orang Israel ngalahka kitai. Tang kitai tetap deka ngalahka sida, enti kitai belaban enggau sida ba emperan.

²⁴Nya alai, anang agi ngasuh tiga puluh dua iku raja nyadi tuai bala. Ganti sida enggau bala tuai soldadu.

²⁵Udah nya pesanka bala soldadu ngemayuh sida ke udah rari ninggalka nuan, sereta enggau ngemayuh nya mega kuda enggau kerita perang. Kitai deka ngelaban orang Israel ba menua ti emperan. Sekali tu kitai deka ngalahka sida.” Raja Benhadat besetuju lalu nitihka jaku lalau sida.

²⁶Lebuh musin panas taun siti udah bekau nya, iya lalu mesanka bala iya, lalu bejalai enggau sida ngagai nengeri Apek, deka nyerang orang Israel.

²⁷Bala orang Israel lalu ditesau, lalu diberi senyata. Sida bejalai, dibagi ngagai dua iti raban, lalu nirika kem sida, betunga enggau bala soldadu orang Siria. Bala orang Israel baka dua raban kambin, enti dibandingka enggau bala orang Siria, ke ngachir ba sebelah endur ari luar nengeri nya.

²⁸Siku nabi lalu mansang ngagai Raja Ahap, lalu bejaku enggau iya, “Tu utai ti disebut TUHAN: ‘Laban orang Siria ngumbai Aku tu petara ti bekuasa di menua ti bebukit, lalu enda bekuasa ba menua ti emperan, Aku deka ngasuh kita menang, lalu ngalahka bala soldadu sida ke mayuh tu. Nya baru nuan enggau bala nuan deka nemu Aku endang TUHAN.”

²⁹Bala soldadu orang Siria enggau bala soldadu orang Israel diau dalam kem tujuh hari, betunga enggau pangan diri. Ba hari ti ketujuh sida lalu belabuh belaban, lalu bala orang Israel munuh seratus ribu iku orang Siria.

³⁰Bala orang Siria ti agi idup lalu rari ngagai nengeri Apek, alai dua puluh tujuh ribu iku sida ditinggang dinding kuta ti runtuh. Benhadat mega rari ngagai nengeri nya, lalu belalai dalam bilik di belakang sebuah rumah.

³¹Bala pemesai iya betemu enggau iya, lalu ku sida bejaku, “Kami bisi udah ninga raja orang Israel nemu ngampun orang. Beri kami pemendar betemu enggau raja orang Israel, melitka kain guni ba punggung kami, enggau nanchangka tali ba rekung kami, nyangka ukur iya deka ngelakka nuan idup.”

³²Nya alai sida lalu melitka kain guni ba punggung sida, lalu nanchangka tali ba rekung sida, mansang ngagai Ahap, lalu bejaku, “Ulun nuan Benhadat minta nuan kasihka iya, lalu enda munuh iya.” Disaut Ahap, “Kati iya agi idup? Manah meh nya! Kami duai endang baka diri menyadi enggau pangan diri!”

³³Bala pemesai Benhadat endang nganti tanda ti manah. Nya alai, lebuh Ahap nyebut “menyadi,” sida lalu bepegai ba leka jaku nya, lalu ku sida, “Munyi ti ku nuan, Benhadat endang menyadi nuan!” “Bai iya ngagai aku,” ku Ahap bejaku enggau sida. Lebuh Benhadat datai, Ahap lalu mai iya nepan kerita perang iya.

³⁴Ku Benhadat bejaku enggau iya, “Aku deka mulaika ngagai nuan nengeri ti udah dirampas apai aku ari apai nuan, lalu nuan tau nirika siti endur alai bedagang di Damaskus, baka ke dikereja apai aku di Samaria.” Disaut Ahap, “Laban nuan deka ngereja utai nya, nya alai aku ngelepaska nuan.” Iya lalu ngaga siti sempekat enggau Benhadat, lalu ngelepaska iya.

³⁵Ari asuh TUHAN, siku ari bala sida nabi bejaku enggau pangan iya, ku iya, “Palu aku!” Tang orang nya enggai malu iya.

³⁶ Lalu ku nabi nya bejaku enggau orang nya, “Laban nuan enda ngasika pesan TUHAN, siku jelu singa deka munuh nuan, lebuh nuan angkat ari tu.” Lebuh nabi nya mupuk, siku singa datai, lalu nerekam iya. Lalu iya mati.

³⁷Udah nya nabi ti udah ngasuh orang nya malu iya, mansang ngagai siku agi orang bukai, lalu bejaku, “Palu aku!” Orang nya lalu malu iya. Balat amat orang nya malu iya, lalu ngemediska iya.

³⁸Nabi nya lalu malut mua diri ngena kain, ngambika orang enda ngelala iya. Udah nya iya mupuk lalu bediri ba tisi jalai, nganti raja menua Israel mansa.

³⁹Lebuh raja mansa, nabi nya lalu ngangauka raja, ku iya, “Tuan Raja, aku udah enggau orang beperang. Siku soldadu udah mai ngagai aku siku munsuh ti udah kena tangkap, lalu ku soldadu nya bejaku enggau aku, ‘Jaga orang tu. Enti iya rari, nuan deka bebayarka nyawa iya ngena nyawa nuan empu, tauka diukum tiga ribu singkap duit pirak.’

⁴⁰Tang lebuh aku benung kiruh ngereja utai bukai, orang nya rari.” Disaut Raja Ahap, “Nuan udah ngukum diri empu. Nya alai nuan enda tau enda mayar ukum nya.”

⁴¹Nabi nya lalu muka balut mua iya, lalu tekala nya Raja Ahap ngelala iya nya siku ari sida nabi.

⁴²Udah nya nabi nya lalu bejaku enggau raja, “Tu jaku TUHAN: ‘Laban nuan udah ngelepaska orang ke udah diasuh Aku bunuh nuan, nyawa nuan empu deka dikena nganti nyawa orang nya, lalu nyawa bala soldadu nuan deka dikena nganti nyawa bala soldadu orang nya.’ ”

⁴³Raja Ahap lalu pulai ngagai nengeri Samaria, ringat pedis ati.