Read Iban 1 Raja 21 Bible Online

1 Raja 21 - Iban bible

1 Raja 21

¹Semak istana Raja Ahap di Jesril bisi sebidang kebun anggur ti diempu orang siku ke benama Nabot.

²Nyadi sekali Ahap bejaku enggau Nabot, “Beri kebun anggur nuan ngagai aku, laban kebun nuan semak istana aku, lalu aku deka ngena tanah nya alai aku nanam sayur. Aku deka meri nuan kebun anggur ti manah agi ari nya kena aku nyilih kebun nuan nya. Tauka, enti nuan deka, aku meli kebun nya enggau rega ti patut.”

³“Kebun anggur nya pesaka ari aki ini aku,” ku Nabot nyaut. “Aku enda tau meri kebun nya ngagai Raja!”

⁴Ahap lalu pulai, tusah ati sereta ringat ketegal jaku Nabot. Iya gali ba peninduk iya, nunga ngagai dinding, lalu enggai makai.

⁵Bini iya Jesebel mansang ngagai iya, lalu nanya, “Nama kebuah nuan tusah ati, lalu enggai makai?”

⁶Disaut Ahap, “Laban jaku Nabot enggau aku. Aku madahka diri deka meli kebun anggur iya, tauka, enti iya deka, aku meri iya sebidang kebun anggur ti bukai, kena aku nyilih kebun nya, tang iya madahka diri enggai!”

⁷Disaut Jesebel, “Kati nuan tu raja tauka ukai? Angkat ari katil nya, lalu makai. Anang tusah ati. Ila aku ngulihka kebun anggur Nabot nya ke nuan!”

⁸Udah nya Jesebel lalu nulis surat, nyain semua surat nya ngena nama Ahap, lalu ditanggam iya ngena chop Ahap. Udah nya iya lalu ngirumka surat nya ngagai bala pemesai enggau orang ke tinggi pangkat di Jesril.

⁹Tu utai ti disebut dalam surat nya, “Letak hari alai bepasa. Kangauka orang mayuh begempuru, lalu asuh Nabot duduk ba penuduk orang ke tinggi pangkat.

¹⁰Giga dua iku orang ke jai, lalu asuh seduai nya bedawaka iya mua mata madahka iya udah nyumpah Allah Taala sereta nyumpah raja. Udah nya, bai Nabot ke luar ari nengeri, lalu tuku iya ngena batu datai ke mati.”

¹¹Bala pemesai enggau orang ke tinggi pangkat di Jesril lalu ngereja utai ti diasuh Jesebel.

¹²Sida ngeletak hari alai bepasa, ngangauka orang mayuh begempuru, lalu ngasuh Nabot duduk ba penuduk orang ke tinggi pangkat.

¹³Orang dua iku ti jai nya lalu bedawaka Nabot di mua orang mayuh, madahka iya udah nyumpah Allah Taala sereta nyumpah raja. Nya alai Nabot dibai ke luar ari nengeri, dituku ngena batu, datai ke mati.

¹⁴Pesan lalu dikirumka ngagai Jesebel, “Nabot udah dibunuh.”

¹⁵Lebuh Jesebel nerima pesan nya, iya lalu bejaku enggau Ahap, “Nabot udah mati. Alai ambi kebun anggur iya.”

¹⁶Ahap lalu tekala nya mansang ngagai kebun anggur nya lalu ngambu kebun nya ke iya empu.

¹⁷Udah nya TUHAN lalu bejaku ngagai Elijah, siku nabi ari Tisbe,

¹⁸“Alai nuan mansang ngagai Raja Ahap di Samaria. Nuan deka nemu iya ba kebun anggur Nabot, lebuh iya baru deka ngambu kebun nya.

¹⁹Sebut ngagai iya munyi tu, ‘Ku TUHAN bejaku: Kati nuan udah munuh orang lalu ngerampas pesaka iya?’ Udah nya sebut ngagai iya, ‘Ku TUHAN bejaku: Ba endur alai ukui ti nilat darah Nabot, dia mega ukui deka nilat darah nuan!’ ”

²⁰Lebuh Ahap meda Elijah, iya lalu bejaku, “O munsuh! Diatu baru nuan tetemuka aku.” “Amat,” ku Elijah nyaut. “Nuan udah, enggau pengabis ati nuan, angkun ngereja utai ti salah di mua TUHAN.

²¹Nya alai TUHAN nyebut ngagai nuan, ‘Aku deka ngasuh penusah ti besai ninggang nuan. Aku deka muai nuan, lalu muai semua orang ke lelaki, ke tuai enggau ke biak ari ruang bilik nuan.

²²Ruang bilik nuan deka nyadi baka ruang bilik Raja Jeroboam anak Nebat, enggau baka ruang bilik Raja Baasa anak Ahijah, laban nuan udah ngeringatka ati Aku ketegal nuan udah nguluka orang Israel bedosa.’

²³ Nyadi pasal Jesebel, TUHAN madahka ukui deka makai bangkai iya di nengeri Jesril.

²⁴Barang sapa ari bala kaban belayan nuan mati di nengeri Jesril, sida deka diempa ukui, lalu sida ke mati ari luar nengeri, deka diempa burung.” (

²⁵Nadai orang bukai udah kala ngemendar Ahap angkun ngereja utai ti salah di mua TUHAN - semua utai nya nyadi magang ari ansak bini iya Jesebel.

²⁶Iya ngereja dosa ti pemadu ngasuh malu, laban iya besembahka engkeramba, baka orang Amor ti udah diburu TUHAN ari menua nya, lebuh orang Israel nyerang.)

²⁷Lebuh Elijah udah tembu bejaku, Ahap lalu nyarikka gari diri, lalu ngerasukka kain guni. Iya enggai makai. Iya tinduk ngena kain guni. Mua iya berupai tusah.

²⁸Ku TUHAN bejaku ngagai nabi Elijah,

²⁹“Kati nuan bisi meda chara Ahap ngemaruhka diri di mua Aku? Laban iya udah ngemaruhka diri di mua Aku, Aku enggai ngasuh penusah ti besai ninggang iya lebuh iya agi idup. Penusah ti besai nya deka ninggang ruang bilik iya lebuh maya anak iya ila.”