Read Iban 1 Raja 22 Bible Online

1 Raja 22 - Iban bible

1 Raja 22

¹Dalam kandang dua taun udah bekau nya, menua Israel enggau menua Siria nadai beperang ngelaban pangan diri agi,

²tang dalam taun ti ketiga Raja Jehosapat menua Judah betemu enggau Raja Ahap menua Israel.

³Ahap lalu nanya ngagai bala pemesai iya, “Nama kebuah kitai lalu enda ngerampas pulai baru nengeri Ramot-giliat ari raja menua Siria? Nengeri nya endang enggi kitai!”

⁴Ahap lalu nanya Jehosapat, “Kati nuan deka enggau aku nyerang Ramot?” “Aku sedia, enti nuan sedia,” ku Jehosapat nyaut. “Bala soldadu enggau bala soldadu ke nepan kuda mega sedia.

⁵Tang manah kitai betanya dulu ngagai TUHAN.”

⁶Ahap lalu mesanka bala nabi, kira empat ratus iku bala sida. Iya lalu nanya sida, “Kati patut tauka enda aku nyerang Ramot?” “Serang,” ku sida nyaut, “laban TUHAN deka ngasuh nuan menang.”

⁷Tang ku Jehosapat nanya, “Ukai enda bisi siku agi nabi ti tau diasuh kitai betanya ngagai TUHAN?”

⁸Ahap lalu nyaut, “Bisi. Mikaiah anak Imlah. Tang aku begedika iya, laban iya nadai kala benabika utai ti manah ke aku. Iya selalu nyebut utai ti jai.” “Nuan enda tau bejaku munyi nya!” ku Jehosapat nyaut.

⁹Udah nya Ahap lalu mesanka siku pemesai ke bekereja dalam istana lalu ngasuh iya mesanka Mikaiah tekala nya.

¹⁰Raja dua iku nya, ke ngena pekayan raja, duduk ba kerusi diraja seduai iya ba endur alai orang ke ngindik gandum, di luar pintu nengeri Samaria. Semua nabi lalu benabi di mua seduai iya.

¹¹Siku ari bala sida, Sedekiah anak Chenaana, ngaga berapa iti tanduk besi, lalu bejaku enggau Ahap, ku iya, “Tu utai ti disebut TUHAN: ‘Nuan deka ngena tanduk besi tu nyerang lalu ngalahka semua orang Siria.’ ”

¹²Semua nabi ti bukai bela nyebut nya magang. Ku sida, “Serang meh Ramot. Nuan deka menang. TUHAN deka ngasuh nuan menang.”

¹³Lebuh maya nya mega, pemesai ti udah bejalai ngambi Mikaiah, benung bejaku enggau iya, “Semua nabi bukai udah benabi magang madahka raja deka mujur, nya alai manah nuan mega benabi baka sida.”

¹⁴Tang ku Mikaiah nyaut, “Aku besumpah dalam nama TUHAN ti idup, aku besemaya deka nyebut semina utai ti diasuh TUHAN!”

¹⁵Lebuh iya bediri di mua Raja Ahap, raja nya lalu nanya iya, “Mikaiah, kati kami duai Raja Jehosapat patut nyerang Ramot, tauka enda?” “Serang aja!” ku Mikaiah nyaut. “Seduai endang tetap deka menang. TUHAN deka ngasuh seduai menang.”

¹⁶Tang ku Ahap nyaut, “Lebuh nuan bejaku ngagai aku dalam nama TUHAN, sebut utai ti bendar! Berapa kali aku enda tau enda madahka nya ngagai nuan?”

¹⁷ Mikaiah lalu nyaut, “Aku bisi meda bala soldadu orang Israel ngachir ba sebelah bukit baka raban jelu bedus ti nadai orang ngibun. Lalu ku TUHAN bejaku, ‘Orang tu nadai kepala. Asuh sida pulai enggau selamat.’ ”

¹⁸Ku Ahap bejaku enggau Jehosapat, “Nya utai ti ku aku tadi. Iya nadai kala benabika utai ti manah ke aku. Iya seruran nyebut utai ti jai!”

¹⁹ Lalu ku Mikaiah nampung jaku iya, “Diatu pendingka utai ti disebut TUHAN! Aku meda TUHAN duduk ba kerusi diraja Iya di serega, lalu semua melikat Iya bediri ngimbai Iya.

²⁰Ku TUHAN nanya, ‘Sapa deka nipu Ahap ngambika iya mupuk lalu dibunuh di Ramot?’ Sekeda bala melikat nyebut tu, sekeda sida ti bukai nyebut nya.

²¹Udah nya siku roh mansang ke mua ngagai TUHAN, lalu bejaku, ‘Awakka aku nipu Ahap.’

²²‘Baka ni ku chara nuan deka nipu iya?’ ku TUHAN nanya. Ku roh nya nyaut, ‘Aku deka mupuk lalu ngasuh semua bala nabi ke bekereja ke Ahap madahka utai ti bula.’ Lalu ku TUHAN bejaku, ‘Mupuk meh nuan. Tipu meh iya. Nuan deka mujur.’ ”

²³Ku Mikaiah ngujungka jaku iya, “Tu meh utai ti udah nyadi. TUHAN udah ngasuh bala nabi nuan ngemulaka nuan. Tang TUHAN Empu udah ngeletak nuan deka dituntung penusah!”

²⁴Udah nya Sedekiah lalu mansang ngagai Mikaiah, nampar mua iya, lalu nanya, “Kemaya Roh TUHAN udah kala ninggalka aku, lalu bejaku enggau nuan?”

²⁵Disaut Mikaiah, “Nuan deka nemu nya lebuh nuan tama ngagai bilik di belakang rumah, deka belalai.”

²⁶Udah nya Raja Ahap lalu bejaku enggau siku ari bala pemesai iya. Ku iya, “Tangkap Mikaiah, lalu bai iya ngagai Amon, tuan gabenor nengeri nya, enggau ngagai Anak Raja Joas.

²⁷Asuh sida nutup iya dalam rumah jil, lalu asuh sida meri iya semina roti enggau ai aja, nyentuk ngagai maya aku udah pulai beperang enggau selamat.”

²⁸Ku Mikaiah, “Enti nuan ulih pulai baru enggau selamat, reti nya, TUHAN nadai udah bejaku ngena aku!” Lalu ku iya nambahka jaku iya, “Pendingka ulih semua kita, utai ti udah disebut aku!”

²⁹Udah nya Raja Ahap menua Israel enggau Raja Jehosapat menua Judah mansang nyerang nengeri Ramot-giliat.

³⁰Ku Ahap bejaku enggau Jehosapat, “Lebuh kitai nyerang, aku deka ngeluluka diri baka orang bukai, tang nuan ngena pekayan diraja nuan empu.” Nya alai raja menua Israel mansang beperang ngaga diri baka gamal orang bukai.

³¹Nyadi raja menua Siria udah meri atur ngagai tiga puluh dua iku orang ke nyadi tuai bala ke nepan kerita perang, enda ngasuh sida nyerang orang bukai, tang semina raja menua Israel aja.

³²Nya alai, lebuh sida meda Raja Jehosapat, semua sida ngumbai iya raja menua Israel. Sida lalu nyerang iya. Tang lebuh iya nyerauh,

³³sida lalu nemu iya ukai raja menua Israel, lalu sida enda nyadi nyerang iya.

³⁴Tang seninjik amat, siku soldadu orang Siria nimbakka laja. Laja nya lalu kena ba sambung baju kebal Raja Ahap. “Bakal aku!” ku Ahap ngangau ngagai orang ke ngemudika kerita perang iya. “Nikal tua. Anang agi nyerang munsuh!”

³⁵Lebuh bala soldadu agi benung bamuk, Raja Ahap agi nyandih duduk dalam kerita perang iya, nunga ngagai bala orang Siria. Darah ari bakal iya pansut nelusur tubuh iya, lalu ngachir ba sebelah geladak kerita perang nya. Lemai nya iya mati.

³⁶Lebuh padam mata panas, atur lalu diberi ngagai semua soldadu orang Israel, “Pulai semua kita ngagai menua enggau nengeri kita empu!”

³⁷Nya meh gaya pemati Raja Ahap. Bangkai iya dibai ngagai Samaria, lalu dikuburka.

³⁸Kerita perang iya lalu dituchi ba siti telaga di Samaria. Ukui lalu bedilatka darah iya, ba endur alai bala indu sundal mandi, munyi ti udah disebut TUHAN.

³⁹Semua utai bukai ti udah dikereja Raja Ahap, nyengkaum cherita pasal istana iya ke dilagu iya ngena gading, enggau pasal semua nengeri ti udah digaga iya, bisi dituliska magang dalam Jerita Lama Pasal Raja Menua Israel.

⁴⁰Lebuh iya mati, anak iya Ahasiah nganti iya nyadi raja.

⁴¹Dalam taun ti keempat Raja Ahap megai perintah di menua Israel, Jehosapat anak Asa nyadi raja menua Judah,

⁴²lebuh umur iya tiga puluh lima taun. Lalu iya merintah di Jerusalem dua puluh lima taun. Indai iya Asubah anak Silhi.

⁴³Baka apai iya Asa ke dulu ari iya, iya mega ngereja utai ti ngena di mua TUHAN. Tang semua palan alai besembiang enda dirusak, lalu orang mayuh majak ngenjuk piring lalu nunu menyan ba endur nya.

⁴⁴Jehosapat bebaik enggau raja menua Israel.

⁴⁵Semua utai bukai ti udah dikereja Jehosapat, enggau pasal pemerani iya beperang, bisi dituliska magang dalam Jerita Lama Pasal Raja Menua Judah.

⁴⁶Iya muai semua lelaki enggau indu ke bekereja nyadi sundal ba alta petara orang kapir ti agi tinggal ari maya apai iya Raja Asa.

⁴⁷Menua Edom nadai raja. Menua nya diperintah siku penulung raja ke diletak raja menua Judah.

⁴⁸Raja Jehosapat ngasuh orang ngaga kapal, ngambika bisi belayar ngagai menua Opir ngambi emas. Tang kapal nya karam di Esion-geber, lalu nadai kala belayar.

⁴⁹Udah nya Raja Ahasiah menua Israel madahka diri deka ngasuh bala kelasi iya nulung bala nembiak Jehosapat belayar. Tang Jehosapat enda nerima tulung nya.

⁵⁰Jehosapat mati lalu dikuburka ba lumbung bala raja di Nengeri David, lalu anak iya Jehoram nganti iya nyadi raja.

⁵¹Dalam taun ti ketujuh belas Raja Jehosapat megai perintah di menua Judah, Ahasiah anak Ahap berengkah nyadi raja menua Israel, lalu iya merintah di Samaria dua taun.

⁵²Iya bedosa ngelaban TUHAN, nitihka teladan ti jai ari apai iya, ari indai iya Jesebel, enggau Raja Jeroboam, ti udah nguluka orang Israel bedosa.

⁵³Iya nyembah sereta betuaika Baal, lalu baka apai iya ke dulu ari iya, iya ngeringatka ati TUHAN Allah Taala ke disembah orang Israel.