Read Iban 1 Raja 3 Bible Online

1 Raja 3 - Iban bible

1 Raja 3

¹Solomon ngaga sempekat enggau raja menua Ejip, lalu jadi enggau anak indu iya. Iya mai indu nya diau dalam Nengeri David, nyentuk ngagai maya iya udah tembu ngaga istana, Rumah Sembiang, enggau dinding kuta ti ngelingi Jerusalem.

²Lebuh maya nya Rumah Sembiang apin digaga. Nya alai orang Israel agi ngenjuk piring sida ba mayuh bengkah alta.

³Nyadi Solomon sigi rinduka TUHAN, lalu iya nitihka atur apai iya David, tang iya mega munuh jelu lalu ngenjuk sida nyadika piring ba mayuh bengkah alta.

⁴ Nyadi sekali, iya mansang ngagai Gibeon, deka ngenjuk piring dia, laban alta dia pemadu tebilang. Iya endang udah meri beratus ratus iti piring tunu ba endur nya dulu ari nya.

⁵Malam nya TUHAN pegari di mua iya dalam mimpi, lalu nanya iya, “Nama utai ti dipinta nuan ari Aku?”

⁶Solomon lalu nyaut, “Nuan endang seruran mandangka pengerindu ti besai ngagai apai aku David, ke nembiak Nuan, lalu iya orang ke badas, ke taluk, sereta tetap ati ngagai Nuan. Lalu Nuan udah majak ngayanka pengerindu Nuan ti meruan belama iya ngagai iya, lebuh Nuan meri iya siku anak lelaki, ke merintah nganti iya sehari tu.

⁷O TUHAN Allah Taala, Nuan udah ngasuh aku nganti apai aku nyadi raja, taja pen aku tu agi biak, lalu enda nemu chara merintah.

⁸Aku begulai enggau orang ke udah dipilih Nuan nyadi nembiak Nuan, bansa ti mayuh tubuh, ti enda ulih diitung.

⁹Nya alai, beri aku penemu-dalam kena aku merintah bala nembiak Nuan enggau lurus, sereta dikena aku ngelala bagi utai ti manah enggau ti jai. Enti enda baka nya, baka ni ku aku ulih merintah bala nembiak Nuan ke mayuh tu?”

¹⁰TUHAN gaga ati ninga Solomon minta nya.

¹¹Nya alai, ku Iya bejaku enggau Solomon, “Laban nuan udah minta penemu-dalam kena nuan merintah enggau lurus, lalu enda minta diri gayu-guru, tauka minta pengaya, tauka minta munsuh nuan dibunuh,

¹²Aku deka ngereja utai ti udah dipinta nuan. Aku deka meri nuan penemu-dalam enggau pemereti ati lebih ari enggi orang bukai ke dulu tauka dudi ari nuan.

¹³Aku deka mega meri ngagai nuan utai ti enda dipinta nuan. Nuan deka bulih pengaya enggau basa seumur idup, lebih ari enggi raja bukai.

¹⁴Lalu enti nuan ngasika Aku, lalu nitihka adat enggau pesan Aku, baka apai nuan David, Aku deka ngasuh nuan panjai umur.”

¹⁵Solomon lalu tedani. Nya baru iya nemu Allah Taala udah bejaku enggau iya dalam mimpi. Udah nya iya mansang ngagai Jerusalem, bediri di mua Peti Lampang Batu Adat TUHAN, lalu ngenjuk piring tunu enggau piring pemaik, ngagai TUHAN. Udah nya iya lalu nyendiaka pengerami makai besai ke semua pemesai iya.

¹⁶Nyadi sekali, dua iku indu sundal datai lalu bediri di mua Raja Solomon.

¹⁷Ku siku bejaku, “Tuan Raja, kami duai indu tu sama begulai diau dalam sebuah rumah, lalu aku ngadaka anak lelaki siku di rumah lebuh indu nya bisi dia.

¹⁸Dua hari udah bekau anak aku ada, iya mega ngadaka anak lelaki siku. Semina kami duai aja bisi di rumah nya. Orang bukai sigi nadai dia.

¹⁹Nyadi sekali, lebuh malam hari, iya bekalih, lalu tetinggangka anak iya, lalu anak iya mati.

²⁰Iya angkat malam nya, ngambi anak aku ke dikimbit aku lebuh aku tinduk, lalu mai anak aku ngagai peninduk iya empu. Udah nya iya ngengkahka anak iya ti udah mati nya ba peninduk aku.

²¹Pagi hari siti, lebuh aku dani, deka nusuka anak aku, aku meda iya udah mati. Aku lalu meresa iya enggau silik. Nya baru aku nemu iya ukai anak aku.”

²²Tang ku indu ke siku nya bejaku, “Ukai baka nya! Anak mit ke idup nya endang anak aku. Anak mit ke mati nya anak nuan!” Ku indu ke terubah bejaku nya nyaut, “Ukai baka nya! Anak mit ke mati nya endang anak nuan. Iya ti agi idup nya endang anak aku!” Nya meh munyi seduai iya bekelikuh di mua raja.

²³Udah nya Raja lalu bejaku, “Seduai sama ngumbai anak mit ke idup nya anak diri, lalu anak mit ke mati nya ukai anak seduai.”

²⁴Raja lalu ngasuh orang ngambi pedang. Lebuh pedang nya dibai ngagai iya,

²⁵raja lalu bejaku, “Belah dua anak mit ke idup nya, lalu beri setengah ngagai seduai iya siku-siku.”

²⁶Laban indai anak mit nya balat sayauka anak iya, nya alai iya lalu bejaku enggau raja, “Tuan Raja, anang munuh anak mit nya! Beri iya ngagai indu nya!” Tang ku indu nya bejaku, “Anang meri iya ngagai kami duai, tang awakka iya dibelah dua.”

²⁷Udah nya Solomon lalu bejaku, “Anang munuh anak mit nya! Beri iya ngagai indu ke terubah. Iya endang indai iya.”

²⁸Lebuh orang Israel ninga pasal pemutus penemu Solomon, sida balat amat bebasaka iya, laban sida nemu Allah Taala udah meri iya penemu-dalam kena iya meri atur ti lurus.