Read Iban 1 Raja 4 Bible Online

1 Raja 4 - Iban bible

1 Raja 4

¹Raja Solomon merintah semua menua Israel,

²lalu tu bala pemesai iya ti tinggi pangkat: Imam: Asariah anak Sadok

³Kerani kot: Elihorep seduai Ahijah, ke sama anak Sisa Tukang tulis: Jehosapat anak Ahilut

⁴Tuai soldadu: Sadok anak Abiatar

⁵Kepala gabenor pelilih menua: Asariah anak Natan Penyanding penemu raja: Imam Sabut anak Natan

⁶Orang ke nyadi tuai ngemataka bala orang gaji ke bekereja dalam istana: Ahisar Orang ke nyadi tuai ngemataka orang ke dipejalka gawa ngereja pengawa ti berat: Adoniram anak Abda.

⁷Solomon ngeletak dua belas iku orang nyadi gabenor ke pelilih menua di menua Israel. Sida tu diberi tanggungjawap meri, ari pelilih menua ti dipegai sida, pemakai ngagai raja enggau sida raja sebilik. Siku-siku sida meri pemakai sebulan aja dalam setaun.

⁸Tu nama bala pemesai ke dua belas iku nya, enggau pelilih menua ti dipegai sida: Benhur: menua ti bebukit di menua Epraim

⁹Ben-deker: di Makas, Sa-albim, Bet-semes, Elon, enggau Elon-bet-hanan

¹⁰Ben-heset: di Arubot enggau Sokoh, enggau semua menua Heper

¹¹Ben-abinadap, ke jadi enggau anak indu Solomon ke benama Tapat: semua menua Dor

¹²Bana anak Ahilut: di Taanak, Megido, enggau semua menua ti semak Bet-san, semak nengeri Saretan, tunga ke selatan nengeri Jesril, nyentuk ngagai nengeri Abel-meholah enggau nengeri Jokmim

¹³Ben-geber: nengeri Ramot-giliat, enggau genturung pendiau di menua Giliat ti diempu raban peturun Jair, siti peturun Manasi, enggau menua Argop di Basan, enam puluh buah nengeri ti besai semua iya ke bisi dinding kuta, enggau alang temaga ba pintu nengeri

¹⁴Ahinadap anak Ido: pelilih menua Mahanaim

¹⁵Ahimas, ke jadi enggau Basemat, siku ari anak indu Solomon: menua Naptali

¹⁶Bana anak Husai: menua Aser enggau nengeri Bealot

¹⁷Jehosapat anak Paruah: menua Isakar

¹⁸Simei anak Ela: menua Benjamin

¹⁹Geba anak Uri: menua Giliat, ti udah dipegai raja orang Amor, Raja Sihon, enggau Raja Og di Basan Kelimpah ari sida dua belas tu, bisi siku agi gabenor, ti nyadi gabenor ke semua menua Israel.

²⁰Orang Judah enggau orang Israel nyau ngemayuh igi pasir ti ba tebing tasik. Sida makai ngirup, lalu lantang diau.

²¹ Menua ti dipegai Solomon nyengkaum semua menua ari Sungai Eupratis ngagai menua Pilistin, nyentuk ngagai entara menua Ejip. Sida mayar chukai ngagai iya, lalu nunduk ngagai iya seumur iya idup.

²²Utai ti dipeguna Solomon tiap hari nya 5,000 liter tepung ti alus enggau 10,000 liter tepung ti kasar,

²³Sepuluh iku jelu sapi ti ditupi dalam bansal, 20 iku sapi ti ditupi di padang, enggau 100 iku bedus, nambahka rusa, kijang, pelanduk enggau manuk.

²⁴Solomon merintah serata menua ti tunga ke barat Sungai Eupratis, ari Tipsah ti ba Sungai Eupratis nyentuk ngagai nengeri Gasa di barat. Semua raja tunga ke barat Sungai Eupratis nunduk magang ngagai iya, lalu iya diau bebaik enggau semua menua ti ngelingi menua ti dipegai iya.

²⁵Lebuh iya agi idup, orang Israel di serata menua Judah enggau menua Israel diau likun. Genap ruang bilik sida bela bisi kebun anggur enggau kebun buah kana ke diri empu.

²⁶ Solomon bisi 40,000 buah bansal alai iya ngandang kuda ti dikena iya narit kerita perang iya, enggau 12,000 iku kuda kena beperang.

²⁷Ba bulan ti udah diletak, siku-siku gabenor meri pemakai ngagai Raja Solomon empu enggau ngagai semua orang ke makai dalam istana. Sida gabenor tu endang seruran meri utai ti dipeguna raja.

²⁸Genap iku gabenor mega meri barli enggau rumput ti rangkai, ngagai endur alai utai nya dipeguna, [6] ke kuda ti narit kerita perang enggau ke jelu ti dikena ngereja pengawa.

²⁹Allah Taala meri Solomon penemu-dalam enggau runding ti dalam, enggau pemandai ti enda ulih disagam.

³⁰Solomon lebih agi bepenemu-dalam ari orang ke bepenemu-dalam di Timur, tauka ari orang ke bepenemu-dalam di menua Ejip.

³¹ Iya orang ke pemadu bepenemu-dalam ari semua orang, lebih agi bepenemu-dalam ari sida Etan orang Esrahi, enggau ari Heman, Kalkol, enggau Darda, bala anak lelaki Mahol. Lalu berita pasal iya ngelekai ngagai semua menua ti ngelingi menua iya.

³² Iya nulis tiga ribu iti jaku-dalam, enggau lebih seribu iti lagu.

³³Iya bejakuka pasal kayu enggau utai ti tumbuh, berengkah ari kayu sidar di Lebanon, nyentuk ngagai isop ti tumbuh ba dinding. Iya bejakuka pasal jelu, burung, ular enggau ikan.

³⁴Raja ari semua menua di dunya tu bela ninga berita pasal penemu-dalam ti dikembuan iya, lalu sida ngasuh orang mansang ngagai iya lalu mendingka iya.