Read Iban 1 Raja 5 Bible Online

1 Raja 5 - Iban bible

1 Raja 5

¹Raja Hiram ari Tire endang pangan David. Nya alai lebuh iya ninga berita Solomon udah nganti apai iya David nyadi raja, iya lalu ngasuh bala pengari iya betemu enggau Solomon.

²Solomon lalu ngirumka pesan tu ngagai Hiram:

³“Nuan nemu, apai aku David endang selalu beperang ngelaban munsuh ke nyerang ari menua ti ngelingi menua kami. Nya alai laban TUHAN apin ngasuh apai aku menang ngelaban semua munsuh iya, iya apin ulih ngaga rumah alai nyembah TUHAN Allah Taala iya.

⁴Tang diatu, TUHAN Allah Taala aku udah meri aku pemaik di serata menua ti dipegai aku. Aku nadai munsuh, lalu aku enda agi diserang orang.

⁵ TUHAN udah besemaya ngagai apai aku David, ku Iya, ‘Anak nuan, ti deka diletak Aku nyadi raja nganti nuan, deka ngaga Rumah ke Aku.’ Nya meh kebuah aku diatu udah mutuska runding deka ngaga rumah alai nyembah TUHAN Allah Taala aku.

⁶Nya alai, asuh meh bala nembiak nuan mansang ngagai Lebanon lalu nebang kayu sidar ke aku. Bala nembiak aku deka gawa enggau sida, lalu aku deka mayar gaji ngagai bala nembiak nuan nitihka penyampau ti diletak nuan ke sida siku-siku. Nuan nemu, bala nembiak aku enda landik baka bala nembiak nuan nebang kayu.”

⁷Hiram gaga amat ati nerima pesan ari Solomon, lalu ku iya, “Pujika TUHAN sehari tu laban Iya udah meri ngagai David anak ti bepenemu-dalam baka nya nganti iya nyadi raja ke menua ti bekuasa baka nya!”

⁸Udah nya Hiram lalu ngirumka pesan tu ngagai Solomon: “Aku udah nerima pesan nuan, lalu aku diatu sedia deka ngereja utai ti dipinta nuan. Aku deka meri ngagai nuan kayu sidar, enggau kayu pain.

⁹Bala nembiak aku deka narit kayu nya ari menua Lebanon ngagai tasik, lalu deka ngaga sida nyadi akit lalu beraratka sida nebing tasik ngagai endur ti dipilih nuan. Dia bala nembiak aku deka muka akit nya, lalu bala nembiak nuan deka betanggungjawapka kayu nya. Lalu aku minta nuan meri pemakai ngagai bala nembiak aku.”

¹⁰Hiram lalu meri Solomon semua batang sidar enggau batang pain ti dipeguna iya,

¹¹lalu Solomon meri ngagai Hiram 322,500 kilogram gandum enggau 400,000 liter minyak kana ti tulin genap taun, kena Hiram meri bala nembiak iya makai.

¹²TUHAN ngamatka semaya Iya, lalu meri penemu-dalam ngagai Solomon. Hiram seduai Solomon diau bebaik enggau pangan diri, lalu seduai iya ngaga sempekat enggau pangan diri.

¹³Raja Solomon ngambi 30,000 iku orang ari serata menua Israel bekereja ngena jalai pejal,

¹⁴ lalu ngasuh Adoniram nyadi tuai sida. Adoniram lalu magi sida ngagai tiga bengkah raban, 10,000 iku dalam siti-siti raban, lalu siti-siti raban bekereja sebulan di Lebanon, enggau dua bulan di menua diri.

¹⁵Solomon mega ngasuh 80,000 iku orang netak batu di menua ti bebukit, enggau 70,000 iku orang mai batu nya,

¹⁶lalu ngasuh 3,300 iku mandur nyadi tuai ngemataka pengawa sida.

¹⁷Nitihka pesan Solomon, sida lalu ningkuh batu ti alus nyadika batu pemun Rumah Sembiang.

¹⁸Bala orang ke bekereja ke Solomon seduai Hiram, enggau bala orang ke datai ari nengeri Gebal lalu nyendiaka batu enggau ramu kena ngaga Rumah Sembiang.