Read Iban 1 Raja 6 Bible Online

1 Raja 6 - Iban bible

1 Raja 6

¹Empat ratus lapan puluh taun udah bekau orang Israel pansut ari menua Ejip, dalam taun ti keempat Solomon udah berengkah megai perintah di menua Israel, dalam bulan ti kedua, iya nya bulan Sib, Solomon lalu berengkah ngaga Rumah Sembiang.

²Pemanjai iya, disukat ari dalam, 27 meter, buka iya 9 meter, lalu peninggi iya 13.5 meter.

³Pemanjai bilik penama nya 4.5 meter, lalu buka iya 9 meter, ngemesai Endur ti Kudus empu.

⁴Dinding Rumah Sembiang nya ditebuk, lalu lubang nya mit ari luar, besai ari dalam.

⁵Dinding Rumah Sembiang ari luar, muak ari tisi sepiak-sepiak enggau ari belakang, digagaka tungking rumah ti tinggi tiga ringkat, peninggi seringkat 2.2 meter.

⁶Bilik ti ba tingkat ti di baruh buka 2.2 meter, bilik ti ba tingkat ti kedua 2.7 meter buka, lalu ba tingkat ti di atas 3.1 meter buka. Dinding Rumah Sembiang nya mipau agi ba tingkat ti di atas, ari ba tingkat ti di baruh, ngambika siti-siti bilik nya duduk ba dinding, enda begunaka pengerat.

⁷Batu ti dikena ngaga Rumah Sembiang udah digaga ba endur alai orang ke ngulihka batu nya empu, ngambika sida enda ibuh inggar bekenaka tukul, tauka kapak, tauka perengka besi ti bukai lebuh Rumah Sembiang nya benung digaga.

⁸Pintu penama ngagai tingkat ti di baruh endar [7] ke tungking rumah nya, nya muak ke tisi selatan Rumah Sembiang, lalu ari nya digagaka tangga nuju ngagai tingkat ti kedua enggau ketiga.

⁹Nya meh jalai Raja Solomon nembuka pengawa begagaka Rumah Sembiang. Iya ngaga dek ke Rumah Sembiang ari papan kayu ara enggau papan kayu sidar.

¹⁰Tungking ti tiga tingkat, siti-siti tingkat tinggi 2.2 meter, digaga nungking ba dinding luar Rumah Sembiang, lalu dilekatka ngagai dinding luar Rumah Sembiang nya ngena sanding ti digaga ari kayu sidar.

¹¹Ku TUHAN bejaku ngagai Solomon,

¹²“Enti nuan ngasika semua adat enggau pesan Aku, Aku deka ngereja ke nuan utai ti udah disemaya Aku ngagai apai nuan David.

¹³Aku deka diau enggau bala nembiak Aku dalam Rumah Sembiang ti digaga nuan tu, lalu Aku enggai sekali-kali ninggalka sida.”

¹⁴Nya meh chara Solomon nembuka pengawa begagaka Rumah Sembiang nya.

¹⁵Dinding ti muak ari dalam dilapis ngena papan kenyau ari geladak nyentuk ngagai dek, lalu geladak nya digaga ari kayu pain.

¹⁶ Bilik ti di dalam bendar, ti dikumbai Endur ti Pemadu Kudus, digaga di belakang Rumah Sembiang. Pemanjai iya 9 meter, lalu disapat ngena papan kayu sidar kenyau ari geladak nyentuk ngagai dek. [8]

¹⁷Bilik ti di mua Endur ti Pemadu Kudus nya panjai 18 meter.

¹⁸Papan kayu sidar ti dalam Rumah Sembiang nya diukir enggau gamal randau enggau bungai. Semua dinding dalam Rumah Sembiang nya dilapis magang ngena kayu sidar, datai ke semua batu ti dikena ngaga dinding nya nadai ayan agi.

¹⁹Di belakang Rumah Sembiang nya bisi digagaka sebuah bilik dalam, alai nyimpan Peti Lampang Batu Adat TUHAN.

²⁰Bilik ti di dalam tu nya panjai 9 meter, buka 9 meter, enggau peninggi 9 meter, lalu semua disampak magang enggau emas ti tulin. Alta nya disampak enggau papan kayu sidar. [9]

²¹Muak ari dalam, Rumah Sembiang nya disampak enggau emas. Rantai emas ditarikka meraka penama ngagai bilik ti di dalam. Bilik ti di dalam tu mega disampak enggau emas.

²² Semua utai dalam Rumah Sembiang disampak enggau emas magang, nyengkaum alta ti dalam Endur ti Pemadu Kudus.

²³ Dua iku melikat cherub ti besayap, ke digaga ari kayu kana, siku-siku tinggi 4.4 meter, diengkahka dalam Endur ti Pemadu Kudus.

²⁴Dua iku melikat cherub tu sebaka pemesai, sebaka gamal. Siku-siku seduai nya bisi dua iti sayap. Lalu pemanjai siti-siti sayap nya 2.2 meter, ngambika penyauh ari puting sayap siti ngagai puting sayap siti nya 4.4 meter.

²⁷Melikat cherub ti dua iku tu diengkah berimbai enggau pangan diri dalam Endur ti Pemadu Kudus, ngambika puting sayap seduai iya betemu ba tengah-tengah bilik nya, lalu puting sayap seduai iya ari sepiak negu dinding bilik nya.

²⁸Dua iku melikat cherub ti besayap tu disampak enggau emas.

²⁹Dinding bilik besai enggau bilik ti di dalam semua diukir magang enggau gambar bala melikat cherub ti besayap, gambar kayu engkerema, enggau gambar bungai.

³⁰Indah geladak deh disampak enggau emas.

³¹Pintu ti berimbai dua, ti digaga ari kayu kana, diengkahka ba penama ngagai Endur ti Pemadu Kudus. Puchuk penama tu digaga juring.

³²Pintu nya diukir enggau gambar bala melikat cherub ti besayap, gambar kayu engkerema, enggau gambar bungai. Pintu, melikat cherub ti besayap, enggau kayu engkerema nya disampak enggau emas.

³³Langkar pintu ti ba penama ngagai bilik besai nya besegi empat, lalu digaga ari kayu kana.

³⁴Pintu dia dua iti, belipat dua, digaga ari kayu pain

³⁵lalu diukir enggau gambar bala melikat cherub ti besayap, gambar kayu engkerema enggau bungai lalu disampak enggau emas, sama penebal.

³⁶Siti tengah laman bisi digaga di mua Rumah Sembiang, dikelingi dinding. Dinding nya digaga ari selapis kayu sidar beselat enggau tiga lapis batu.

³⁷Batu pemun ke Rumah Sembiang tu ditanam dalam bulan ti kedua, iya nya bulan Sib, keempat taun Solomon udah berengkah megai menua nya.

³⁸Dalam bulan ti kelapan, iya nya bulan Bul, kesebelas taun Solomon udah berengkah megai menua nya, Rumah Sembiang nya lalu tembu digaga, betul-betul nitihka pelan. Pengelama Solomon ngaga Rumah Sembiang nya tujuh taun.