Read Iban 1 Raja 8 Bible Online

1 Raja 8 - Iban bible

1 Raja 8

¹ Udah nya Raja Solomon lalu mesanka semua tuai raban bansa enggau tuai peturun orang Israel datai ngagai iya di Jerusalem laban iya deka mai Peti Lampang Batu Adat TUHAN ari Sion, iya nya nengeri David, ngagai Rumah Sembiang.

² Semua sida lalu begempuru lebuh Gawai Belangkau dalam bulan ti ketujuh, iya nya bulan Etanim.

³Lebuh semua bala tuai udah begempuru magang, bala imam lalu ngesan Peti Lampang Batu Adat

⁴lalu mai iya ngagai Rumah Sembiang. Bala orang Lewi enggau bala sida imam mega mindahka Langkau Kain TUHAN, enggau semua pekekas Langkau Kain nya ngagai Rumah Sembiang.

⁵Raja Solomon enggau semua orang Israel begempuru di mua Peti Lampang Batu Adat nya, lalu meri mayuh jelu bedus enggau jelu sapi nyadika piring, datai ke sida nyau enda ulih diitung agi.

⁶Udah nya bala imam lalu mai Peti Lampang Batu Adat nya ngagai Rumah Sembiang, lalu ngengkahka iya ba Endur ti Pemadu Kudus, di baruh melikat cherub ti besayap.

⁷Sayap ti dikerembaika dua iku melikat cherub nya mungkur Peti enggau kayu ti dikena ngesan Peti nya.

⁸Puting kayu nya ulih dipeda orang ke bediri di mua Endur ti Pemadu Kudus, tang enda ulih dipeda ari endur bukai. (Kayu ti dikena ngaling peti nya agi mengkang dia nyentuk ngagai sehari tu.)

⁹ Utai bukai nadai disimpan dalam Peti Lampang Batu Adat nya, kelimpah ari dua iti lampang batu ti udah diengkah Moses dalam Peti nya ba Bukit Sinai, lebuh TUHAN ngaga sempekat enggau orang Israel, lebuh sida pansut ari menua Ejip.

¹⁰ Lebuh bala imam ninggalka Rumah Sembiang nya, mua hari lalu tekala nya ngemenuhka Rumah nya

¹¹datai ke sida imam nyau enda ulih bekereja dalam Rumah Sembiang nya ketegal mua hari nya; laban mulia TUHAN ngemenuhka Rumah Sembiang nya.

¹² Udah nya Solomon lalu besampi: “Nuan, TUHAN, udah ngengkahka mata hari di langit, [18] tang taja pia, Nuan milih mua hari enggau pemetang alai Nuan diau.

¹³Diatu aku udah ngaga Rumah Sembiang ti manah tu ke Nuan, alai Nuan diau belama iya.”

¹⁴Lebuh orang mayuh agi benung bediri dia, Raja Solomon lalu nguing ngagai sida, lalu minta Allah Taala merekatka sida.

¹⁵Ku iya bejaku, “Pujika TUHAN Allah Taala ke disembah orang Israel! Iya udah ngamatka semaya ti udah digaga Iya enggau apai aku David, lebuh Iya madahka ngagai David,

¹⁶ ‘Kenyau ari lebuh Aku mai bala nembiak Aku pansut ari menua Ejip, Aku apin milih nengeri di serata menua Israel, alai Rumah Sembiang patut digaga, alai kita deka nyembah Aku. Tang Aku milih nuan, David, merintah bala nembiak Aku.’ ”

¹⁷ Ku Solomon nampung sampi iya, “Apai aku David udah bekira deka ngaga Rumah Sembiang alai orang tau nyembah TUHAN Allah Taala ke disembah orang Israel,

¹⁸tang ku TUHAN bejaku ngagai iya, ‘Ngena amat nuan bisi ati deka ngaga Rumah Sembiang ke Aku,

¹⁹ tang ukai nuan ti deka ngaga Rumah Sembiang nya. Anak nuan, anak nuan empu, ti deka ngaga Rumah Sembiang nya ke Aku.’

²⁰“Diatu TUHAN udah ngamatka semaya Iya. Aku udah nganti apai aku nyadi raja menua Israel, lalu aku udah ngaga Rumah Sembiang alai TUHAN Allah Taala ke disembah orang Israel deka disembah.

²¹Aku mega udah nyendiaka siti endur dalam Rumah Sembiang alai ngengkahka Peti Lampang Batu Adat ti ngundan lampang batu sempekat. Sempekat nya udah digaga TUHAN enggau bala aki ini kitai, lebuh Iya mai sida pansut ari menua Ejip.”

²²Udah nya, di mua orang mayuh, Solomon lalu mansang bediri di mua alta. Iya ngangkatka jari iya

²³lalu besampi, “TUHAN Allah Taala ke disembah orang Israel, nadai petara bukai ti baka Nuan, nemuka di serega di atas tauka di dunya di baruh! Nuan ngamatka sempekat Nuan enggau bala nembiak Nuan, lalu ngayanka pengerindu Nuan ke sida, lebuh sida ngasika Nuan enggau pengabis ati sida.

²⁴Nuan udah ngamatka semaya ti udah digaga Nuan enggau apai aku David. Sehari tu semua jaku nya udah dikamatka magang.

²⁵ Nya alai diatu, TUHAN Allah Taala ke disembah orang Israel, aku besampi minta Nuan mega ngamatka semaya ti udah digaga Nuan enggau apai aku David, lebuh Nuan madahka siku ari peturun iya deka merintah nyadi raja di menua Israel, asal ga sida bejimat ngasika Nuan baka iya.

²⁶Nya alai, O Allah Taala ke disembah orang Israel, awakka semua utai ti udah disemaya Nuan ngagai apai aku David, dikamatka magang.

²⁷ “Tang kati Nuan, O Allah Taala, amat ulih diau di dunya tu? Indah semua serega deh enda chukup alai Nuan diau. Nya alai, baka ni ku Rumah Sembiang tu, ti udah digaga aku, tau chukup alai Nuan diau?

²⁸TUHAN Allah Taala aku, aku tu nembiak Nuan. Pendingka sampi aku, lalu saut meh sampi ti disebut aku ngagai Nuan sehari tu.

²⁹ Jaga meh Rumah Sembiang tu siang malam, endur ti udah dipilih Nuan alai Nuan deka disembah. Dingaka aku, lebuh aku ngadap ngagai Rumah Sembiang tu, lalu besampi.

³⁰Dingaka sampi aku, enggau sampi bala nembiak Nuan, lebuh sida ngadap ngagai endur tu, lalu besampi. Dingaka kami ari rumah Nuan di serega, lalu ampun meh kami.

³¹“Lebuh orang kena dawa laban sida ngereja utai ti salah ngagai pangan diri, lalu dibai ngagai alta Nuan dalam Rumah Sembiang tu ngambika iya besumpah madahka diri nadai penyalah,

³²pendingka bala nembiak Nuan ari serega, O TUHAN, lalu akim meh iya. Ukum meh sapa ke salah, nitihka penyalah iya, lalu lepaska orang ke nadai penyalah.

³³“Lebuh bala nembiak Nuan Israel alah laban munsuh ketegal sida udah bedosa ngelaban Nuan, lalu lebuh sida nguing lalu datai ngagai Rumah Sembiang tu enggau ati ti baruh lalu besampi minta pengampun,

³⁴pendingka sida ari serega. Ampun dosa bala nembiak Nuan, lalu bai sida pulai baru ngagai menua ti udah diberi Nuan ngagai aki ini sida.

³⁵“Lebuh Nuan nagang hari ujan, ketegal bala nembiak Nuan udah bedosa ngelaban Nuan, lalu lebuh sida nesal ati lalu ngadap ngagai Rumah Sembiang tu enggau ati ti baruh lalu besampi ngagai Nuan,

³⁶pendingka sida ari serega. Ampun dosa raja enggau orang Israel, lalu ajar sida ngereja utai ti ngena. Udah nya, TUHAN, asuh hari ujan ba menua Nuan tu, ti udah diberi Nuan ngagai bala nembiak Nuan, nyadika pesaka sida belama iya.

³⁷“Lebuh lapar pungkang nyadi di menua tu, tauka penyakit bisi berampit, tauka utai ti ditanam bisi rusak laban ribut ti angat, tauka diserang raban buntak, tauka bala nembiak Nuan kena serang munsuh, tauka penyakit tauka pemedis bisi nyadi ba bala sida,

³⁸pendingka sampi sida. Enti orang Israel bisi ngangkatka jari besampi ngadap ngagai Rumah Sembiang tu, enggau ati ti tusah,

³⁹dingaka sampi sida. Dingaka sida ari rumah Nuan di serega, ampun sida, lalu tulung sida, laban semina Nuan siku aja ke nemu utai ti dalam ati mensia. Kereja meh utai ba siku-siku kami nitihka pematut,

⁴⁰ngambika bala nembiak Nuan seruran ngasika Nuan lebuh sida diau di menua ti udah diberi Nuan ngagai aki ini sida.

⁴¹“Lebuh orang bansa bukai ke diau jauh di menua bukai, ninga pemanah berita pasal Nuan, enggau pasal utai ti besai ti udah dikereja Nuan ke bala nembiak Nuan, lalu iya datai nyembah Nuan, lalu besampi ba Rumah Sembiang tu,

⁴²

⁴³pendingka sampi iya. Dingaka iya ari serega, alai Nuan ti diau, lalu kereja meh utai ti dipinta iya ari Nuan, ngambika semua orang di dunya tu nemu Nuan, lalu ngasika Nuan, baka bala nembiak Nuan orang Israel. Nya baru sida deka nemu, Rumah Sembiang ti udah digaga aku ba endur tu nya alai Nuan patut disembah.

⁴⁴“Lebuh Nuan ngasuh bala nembiak Nuan mansang beperang ngelaban munsuh sida, lalu sida besampi ngagai Nuan, di sebarang endur sida diau lalu nguingka diri tunga ngagai nengeri tu, ti udah dipilih Nuan alai Rumah Sembiang tu udah digaga aku ke Nuan,

⁴⁵pendingka sampi sida. Dingaka sida ari serega, lalu asuh sida menang.

⁴⁶“Lebuh bala nembiak Nuan bedosa ngelaban Nuan, laban nadai siku mensia ti enda bedosa, lalu Nuan ringat, lalu ngasuh munsuh sida ngalahka sida lalu nabanka sida nyadi orang tangkap ngagai menua bukai, taja pen menua nya jauh,

⁴⁷pendingka sampi bala nembiak Nuan. Enti di menua nya sida nesal ati, lalu besampi ngagai Nuan, ngaku pemesai penyalah enggau penyai sida, dingaka sampi sida, O TUHAN.

⁴⁸Enti di menua nya sida amat bebendar nesal ati lalu besampi ngagai Nuan, lebuh sida malik tunga ngagai menua tu ti udah diberi Nuan ngagai aki ini sida, tunga ngagai nengeri tu ti udah dipilih Nuan, enggau tunga ngagai Rumah Sembiang tu ti udah digaga aku ke Nuan,

⁴⁹pendingka sampi sida. Dingaka sida ari Rumah Nuan di serega, lalu ampun sida.

⁵⁰Ampun semua dosa sida, enggau penyalah sida ke udah angkat ngelaban Nuan, lalu asuh munsuh sida nelap enggau sida.

⁵¹Sida tu bala nembiak Nuan Empu, ti udah dibai Nuan pansut ari menua Ejip, menua alai sida ke udah balat diperinsa.

⁵²“TUHAN ti Pemadu Tinggi, awakka Nuan seruran kasihka bala nembiak Nuan enggau raja sida, lalu dingaka sampi sida, lebuh sida ngangauka Nuan.

⁵³Nuan udah milih sida ari semua bansa, ngambika sida nyadi nembiak Nuan, munyi ti udah dipadahka Nuan ngagai sida ngena Moses, lebuh Nuan mai bala aki ini sida pansut ari menua Ejip.”

⁵⁴Lebuh Solomon udah badu besampi ngagai TUHAN, iya bediri di mua alta, alai iya ti udah besugang ngangkatka jari iya.

⁵⁵Iya bejaku enggau nyawa ti inggar minta Allah Taala meri berekat ngagai semua orang ke begempuru dia. Ku iya,

⁵⁶ “Pujika TUHAN ti udah meri pemaik ngagai bala nembiak Iya, munyi ti udah disemaya Iya. Iya udah ngamatka semua semaya ti udah digaga Iya nengah nembiak Iya Moses.

⁵⁷Awakka TUHAN Allah Taala kitai diau enggau kitai, baka Iya ti udah begulai enggau bala aki ini kitai. Awakka Iya enda ngelengkaka kitai, tauka ninggalka kitai.

⁵⁸Awakka Iya ngasuh kitai ngasika Iya, ngambika kitai deka seruran diau nitihka gaya ti dikedekaka Iya, ngasika semua adat enggau pesan ti diberi Iya ngagai aki ini kitai.

⁵⁹Awakka TUHAN Allah Taala kitai seruran ingatka sampi tu enggau peminta ti udah dibai aku ngagai Iya. Awakka Iya seruran ngampun bala nembiak Iya orang Israel, enggau raja sida, nitihka utai ti diguna sida tiap hari.

⁶⁰Nya baru semua bansa deka nemu, semina TUHAN siku aja ti Allah Taala, lalu nadai petara bukai.

⁶¹Awakka kita ke nembiak Iya, seruran tetap ati ngagai TUHAN Allah Taala kitai, ngasika semua adat enggau pesan Iya, baka ke dikereja kita sehari tu.”

⁶²Udah nya Raja Solomon enggau semua orang mayuh ke bisi dia lalu ngenjuk piring ngagai TUHAN.

⁶³Raja Solomon meri 22,000 iku sapi enggau 120,000 iku jelu bedus nyadika piring pemaik. Nya meh chara raja enggau semua orang mayuh nyerahka Rumah Sembiang nya.

⁶⁴Ba hari nya mega iya nyerahka endur ti ba tengah laman nya ngagai TUHAN, iya nya endur ti di mua Rumah Sembiang, lalu udah nya ngenjuk piring tunu segala ba endur nya, piring tepung, enggau lemak ari jelu nyadika piring pemaik. Iya ngereja nya laban alta ti digaga ari temaga nya kelalu mit, lalu enda ulih ngundan semua piring nya.

⁶⁵Rumah Sembiang nya meh endur alai Solomon enggau semua orang Israel ngerami Gawai Belangkau tujuh [19] hari. Mayuh amat orang datai. Sida datai ari Lebo-hamat di utara, nyentuk ngagai ari gari entara menua enggau orang Ejip di selatan.

⁶⁶Ba hari ti kelapan, Solomon lalu ngasuh orang mayuh pulai. Semua sida bela muji Solomon, lalu pulai enggau ati ti lantang, ketegal semua berekat ti udah diberi TUHAN ngagai nembiak Iya David, enggau ngagai bala nembiak Iya orang Israel.