Read Iban 1 Raja 9 Bible Online

1 Raja 9 - Iban bible

1 Raja 9

¹Lebuh Raja Solomon udah tembu ngaga Rumah Sembiang, enggau istana, enggau semua utai bukai ti deka digaga iya,

² TUHAN lalu pegari baru ngagai iya, baka ke nyadi di Gibeon.

³Ku TUHAN bejaku ngagai iya, “Aku udah ninga sampi nuan. Aku udah nguduska Rumah Sembiang tu ti udah digaga nuan nyadi endur alai kita deka nyembah Aku belama iya. Aku deka ngemataka endur tu, lalu nyaga iya belama iya.

⁴Enti nuan deka betuaika Aku ngena ati ti betul sereta rentang, baka apai nuan David, lalu enti nuan ngasika adat Aku, lalu ngereja semua utai ti udah dipadahka Aku ngagai nuan,

⁵ Aku deka ngamatka semaya ti udah digaga Aku enggau apai nuan David, lebuh Aku madahka orang Israel deka diperintah bala peturun iya.

⁶Tang enti nuan, tauka peturun nuan badu agi nitihka Aku, enda ngasika adat enggau jaku ti dipesanka Aku ngagai nuan, lalu nyembah petara bukai,

⁷Aku deka muai bala nembiak Aku orang Israel ari menua ti udah diberi Aku ngagai sida. Aku deka mega ninggalka Rumah Sembiang tu, ti udah dikuduska Aku alai kita deka nyembah Aku. Orang di semua endur deka ngelanyaika orang Israel, lalu enda bebasaka sida.

⁸ Rumah Sembiang tu deka nyadi tembawai, lalu semua orang ke mansa deka tekenyit sereta alit ati. ‘Nama kebuah TUHAN ngereja utai tu ngagai menua tu, enggau ngagai Rumah Sembiang tu?’ ku sida deka nanya.

⁹Orang deka nyaut, ‘Laban sida udah ninggalka TUHAN Allah Taala sida ke udah mai aki ini sida pansut ari menua Ejip. Sida udah arapka lalu nyembah petara bukai. Nya kebuah TUHAN udah ngasuh penusah ti besai tu ninggang sida.’ ”

¹⁰Solomon ngaga Rumah Sembiang enggau istana iya empu dua puluh taun.

¹¹Raja Hiram di Sidon udah meri ngagai iya semua kayu sidar enggau kayu pain enggau semua emas ti diguna iya kena iya ngereja pengawa nya. Lebuh pengawa nya udah tembu, Raja Solomon meri ngagai Hiram dua puluh buah nengeri di menua Galili.

¹²Hiram mansang meda nengeri nya, lalu iya enda rinduka nengeri nya.

¹³Nya alai ku iya bejaku enggau Solomon, “Kati tu nengeri ti diberi nuan ngagai aku, menyadi!” Nya kebuah menua nya dikumbai Kabul [20] nyentuk ngagai diatu.

¹⁴Hiram udah ngirumka nyau deka bulih 5 tan emas ngagai Solomon.

¹⁵Raja Solomon mejalka orang ngaga Rumah Sembiang enggau istana, nambun tanah ba tisi timur nengeri nya, lalu ngaga dinding kuta ke nengeri nya. Iya mega mejalka sida ngaduka nengeri Hasor, Megido, enggau Geser. (

¹⁶Raja menua Ejip endang udah nyerang lalu ngalahka nengeri Geser, munuh orang ke diau dia, lalu nunu nengeri nya. Udah nya iya lalu meri nengeri nya nyadika derian ngagai anak indu iya lebuh anak indu iya jadi enggau Solomon,

¹⁷lalu Solomon nirika nengeri nya baru.) Solomon mega mejalka bala orang ngaduka nengeri Bet-horon Ili,

¹⁸Baalat, Tamar ti di menua puang dalam menua Judah,

¹⁹nyadi endur alai iya nyimpan semua utai ti diguna iya, alai iya nyimpan kuda enggau kerita perang iya, enggau semua utai bukai ti diguna iya kena iya ngaga utai di Jerusalem, di Lebanon, enggau ba endur bukai dalam menua ti dipegai iya.

²⁰Nyadi orang ke dipejalka Solomon bekereja ke iya nya peturun orang Kanaan, ti enda dibunuh orang Israel lebuh sida ngerampas menua nya. Orang Kanaan nyengkaum orang Amor, orang Iti, orang Peris, orang Ibi, enggau orang Jebus. Peturun sida tu mengkang nyadi ulun nyentuk ngagai sehari tu.

²²Solomon nadai ngaga orang Israel nyadi ulun iya. Sida nyadi bala soldadu iya, nyadi bala pemesai, tuai soldadu, orang ke nyadi kepala ke orang ke nepan kerita perang iya, enggau nyadi soldadu ke nepan kuda.

²³Lima ratus lima puluh iku pemesai nyadi kepala ngemataka bala orang ke dipejalka Solomon gawa begagaka rumah iya.

²⁴Solomon nambun tanah ba tisi ti muak ke timur nengeri nya, udah bekau bini iya, iya nya anak indu raja menua Ejip, ke mindah ari Nengeri David ngagai istana ti udah digaga Solomon ke iya.

²⁵ Tiga kali dalam setaun Solomon ngenjuk piring tunu enggau piring pemaik, ba alta ti udah digaga iya ke TUHAN. Iya mega nunu menyan ke TUHAN. Nya meh chara iya nembuka Rumah Sembiang.

²⁶Raja Solomon mega ngaga berapa buah kapal di Esion-geber, enda jauh ari Elat ba tebing Teluk Akaba, di menua Edom.

²⁷Raja Hiram ngirumka bala kelasi ke bisi peneleba ari berapa buah kapal iya empu, ngambika sida bekereja enggau bala Solomon.

²⁸Sida belayar ngagai menua Opir, lalu mai ngagai Solomon kira 16 tan emas.