Read Iban 2 Raja 1 Bible Online

2 Raja 1 - Iban bible

2 Raja 1

¹Udah bekau pemati Raja Ahap, orang menua Moap lalu angkat ngelaban Israel.

²Raja Ahasiah udah labuh ari tanju perabung istana iya di Samaria, lalu iya balat amat bebadi. Nya alai iya ngasuh bala seruan iya betanya ngagai Baal-sebup, iya nya petara orang Pilistin di nengeri Ekron, laban iya keran deka nemu enti iya ulih gerai tauka enda.

³Tang siku melikat TUHAN bejaku ngagai Elijah, iya nya nabi ke datai ari Tisbe, ngasuh iya betemu enggau bala seruan Raja Ahasiah, lalu nanya sida, “Nama kebuah kita deka betanya ngagai Baal-sebup, petara orang di Ekron? Kati kita ngumbai kitai nadai petara di menua Israel?

⁴Padahka ngagai raja utai ti disebut TUHAN, ‘Nuan enda ulih gerai ari pemedis nuan. Nuan deka mati!’ ” Elijah bejaku munyi nya ari asuh TUHAN.

⁵Bala seruan lalu pulai ngagai raja, lalu raja nanya, “Nama kebuah kita nikal?”

⁶Disaut sida, “Kami bisi betemu enggau orang siku. Iya ngasuh kami nikal lalu madahka ngagai nuan utai ti disebut TUHAN ngagai nuan, ‘Ku TUHAN bejaku: Nama kebuah nuan ngasuh bala seruan betanya ngagai Baal-sebup, petara orang di Ekron? Kati nuan ngumbai kitai nadai petara di menua Israel? Nuan enda ulih gerai ari pemedis nuan. Nuan deka mati!’ ”

⁷“Baka ni ku gamal orang nya?” ku raja nanya.

⁸ “Baju enggau belulang iya digaga ari kulit jelu,” ku sida nyaut. “Orang nya Elijah!” ku raja bejaku.

⁹Iya lalu ngasuh siku pemesai, enggau lima puluh iku soldadu ngambi Elijah. Pemesai nya betemu enggau Elijah ke benung duduk ba bukit sigi, lalu ku pemesai nya bejaku enggau Elijah, “Nabi, raja mesanka nuan nurun.”

¹⁰ “Enti aku tu nabi,” ku Elijah nyaut, “awakka api nurun ari langit lalu munuh nuan enggau bala nuan!” Tekala nya api nurun lalu munuh pemesai nya enggau bala iya.

¹¹Raja lalu ngirumka siku agi pemesai enggau lima puluh iku soldadu. Sida mansang [1] lalu bejaku enggau Elijah, “Nabi, raja mesanka nuan nurun diatu!”

¹²“Enti aku tu nabi,” ku Elijah nyaut, “awakka api nurun ari langit lalu munuh nuan enggau bala nuan!” Tekala nya api ari Allah Taala nurun lalu munuh pemesai nya enggau bala iya.

¹³Raja lalu sekali agi ngirumka siku pemesai enggau lima puluh iku soldadu. Pemesai nya niki ngagai bukit nya, besugang di mua Elijah, lalu minta kasih ari iya, “Nabi, kasihka aku enggau bala aku tu. Anang munuh kami!

¹⁴Pemesai ke dua iku nya, enggau bala seduai iya udah mati laban api ti nurun ari langit. Tang aku minta nuan kasihka aku!”

¹⁵Melikat TUHAN lalu bejaku ngagai Elijah, “Alai nuan nurun enggau iya. Anang takut.” Elijah lalu mupuk enggau pemesai nya mansang betemu enggau raja.

¹⁶Ku Elijah bejaku enggau raja, “Tu utai ti disebut TUHAN: ‘Laban nuan udah ngirumka bala seruan nuan betanya ngagai Baal-sebup, petara nengeri Ekron, lalu ngumbai menua Israel baka ke nadai Allah Taala alai betanya, nuan enda ulih gerai. Nuan deka mati!’ ”

¹⁷Nya alai Ahasiah mati, munyi ti udah dipadahka TUHAN ngena Elijah. Ahasiah nadai anak lelaki, nya alai menyadi lelaki iya [2] ke benama Jehoram nganti iya nyadi raja, dalam taun ti kedua Jehoram anak Jehosapat udah berengkah nyadi raja menua Judah.

¹⁸Semua utai bukai ti udah dikereja Ahasiah bisi dituliska magang dalam Jerita Lama Pasal Raja Menua Israel.