Read Iban 2 Raja 10 Bible Online

2 Raja 10 - Iban bible

2 Raja 10

¹Tujuh puluh iku peturun Raja Ahap bisi diau di nengeri Samaria. Jehu nulis surat, lalu ngirumka salin surat nya ngagai bala orang ke merintah di nengeri nya, [14] ngagai bala tuai, enggau ngagai bala orang ke ngibun bala peturun Ahap. Baka tu ku jaku dalam surat nya:

²“Kita tu orang ke ngibun bala peturun raja, lalu kita bisi kerita perang, kuda, senyata, enggau nengeri ti bekuta. Nya alai, lebuh kita nerima surat tu,

³pilih peturun raja ke pemadu patut, chiri iya nyadi raja, lalu kita enda tau enda beperang ngarika iya.”

⁴Tang sida balat amat takut. Ku sida, “Baka ni ku kitai ulih ngelaban Jehu? Indah Raja Joram enggau Raja Ahasiah deh enda ulih ngelaban iya.”

⁵Nya alai, tuai ke ngintu istana, enggau tuan gabenor nengeri nya, enggau bala tuai, enggau orang ke ngibun peturun raja, lalu ngirumka pesan ngagai Jehu, “Kami tu nembiak nuan, lalu kami sedia deka ngereja utai ti diasuh nuan. Tang kami enggai nyiri orang nyadi raja. Kereja aja meh utai ti patut ku ati nuan.”

⁶Jehu lalu nulis siti agi surat ngagai sida, “Enti kita setanah enggau aku, lalu sedia deka nitihka atur aku, bai pala bala peturun Raja Ahap ngagai aku di Jesril ba urung maya tu pagila.” Nyadi tujuh puluh iku peturun Raja Ahap nya diibun bala orang ke tampak nama di nengeri Samaria, ti udah ngibun sida datai ke sida nyau besai tuai.

⁷Lebuh surat Jehu diterima, bala tuai orang Samaria lalu munuh semua tujuh puluh iku bala peturun Ahap, ngengkahka pala sida ba bakul, lalu ngirumka pala nya ngagai Jehu di Jesril.

⁸Lebuh orang madahka ngagai Jehu pala bala peturun Ahap udah dibai kia, iya lalu meri atur ngasuh pala nya ditugungka ngagai dua iti tugung ba mua pintu nengeri nya, lalu nejuka pala nya dia datai ngagai pagi hari siti.

⁹Pagi hari siti iya lalu pansut ngagai mua pintu nya, lalu bejaku enggau orang ke bisi dia, “Aku tu meh orang ke udah bepekat ngelaban Raja Joram, lalu munuh iya. Ukai kita ke betanggungjawapka pekara nya. Tang sapa munuh semua sida tu?

¹⁰Tu nunjukka semua utai ti udah disebut TUHAN pasal peturun Ahap, deka dikamatka magang. TUHAN udah ngereja utai ti udah disemaya Iya ngena nabi Elijah.”

¹¹ Udah nya Jehu lalu munuh semua kaban belayan Ahap ti bukai ti diau di Jesril, enggau semua pemesai iya, pangan iya ti nyempil, enggau bala imam. Nadai siku sida ditejuka idup.

¹²Jehu angkat ari Jesril, lalu mansang ngagai Samaria. Di rantau jalai, ba endur ti dikumbai “Kem Orang Ke Pengibun Bedus,”

¹³iya betemu enggau sekeda kaban belayan niang Raja Ahasiah menua Judah, lalu nanya sida, “Sapa kita tu?” “Kaban belayan Ahasiah,” ku sida nyaut. “Kami tu deka mansang ngagai Jesril, deka meri tabi basa ngagai bala anak Kuin Jesebel, enggau sida raja sebilik ti bukai.”

¹⁴Jehu lalu bejaku enggau bala iya, “Tangkap sida idup-idup!” Sida lalu nangkap bala kaban belayan Ahasiah. Jehu lalu munuh sida semak siti lubang kebung ti ba endur nya. Pemayuh sida nya empat puluh dua iku. Nadai siku sida ditejuka idup.

¹⁵Jehu lalu mupuk baru, lalu di rantau jalai, iya betemu enggau Jonadap anak Rekap. Jehu betabi enggau iya, lalu ku Jehu, “Tua sama sepenemu. Kati nuan deka nyukung aku?” “Ka,” ku Jonadap nyaut. “Enti munyi nya, betabi meh tua,” ku Jehu nyaut. Seduai iya lalu betabi, lalu Jehu nyaup Jonadap niki ngagai kerita perang iya.

¹⁶Ku Jehu, “Aram mupuk enggau aku, ngambika nuan meda pengangkun aku ke TUHAN.” Seduai iya lalu sama nepan kerita perang nya ngagai Samaria.

¹⁷Lebuh seduai iya datai di Samaria, Jehu lalu munuh semua kaban belayan Ahap. Siku pen nadai ga sida ditejuka idup. Nya utai ti udah dipadahka TUHAN ngagai Elijah.

¹⁸Jehu lalu ngempuruka semua orang Samaria, lalu ku iya bejaku, “Raja Ahap enda tentu bebendar betuaika petara Baal, tang aku deka bebendar agi betuaika iya.

¹⁹Nya alai gempuruka semua bala nabi Baal, semua orang ke nyembah Baal, enggau semua bala imam. Semua orang enda tau enda enggau begempuru magang. Aku deka ngenjuk piring ti besai ngagai Baal, lalu barang sapa enda enggau begempuru, deka dibunuh.” (Tu chara Jehu nipu, ngambika iya ulih munuh semua orang ke nyembah Baal.)

²⁰Udah nya Jehu lalu meri siti atur, “Letak hari alai ngemesaika Baal!” Hari lalu diletak.

²¹Jehu lalu ngirumka pesan ngagai serata menua Israel. Semua orang ke nyembah Baal bela datai magang. Nadai siku sida ke enda datai. Semua sida lalu tama ngagai rumah sembiang Baal, lalu rumah nya penuh laban sida.

²²Udah nya Jehu lalu bejaku enggau imam ti nyadi tuai ngemataka baju panjai ti kudus, ngasuh iya mai baju panjai nya pansut, lalu meri baju nya ngagai bala orang ke nyembah Baal.

²³Udah nya Jehu empu lalu tama ngagai rumah sembiang Baal, sama enggau Jonadap anak Rekap, lalu ku iya bejaku enggau orang mayuh dia, “Kita enda tau enda nentuka semina orang ke nyembah Baal aja bisi ditu, lalu nentuka nadai orang ke nyembah TUHAN bisi udah tama.”

²⁴Udah nya, iya enggau Jonadap lalu tama, deka ngenjuk piring enggau piring tunu ngagai Baal. Nyadi iya endang udah ngasuh lapan puluh iku orang bediri di luar rumah sembiang nya, lalu udah meri atur tu ngagai sida, “Kita enda tau enda munuh semua orang tu. Barang sapa nejuka sida rari, deka dibunuh!”

²⁵Lebuh Jehu udah ngenjuk piring, iya lalu bejaku enggau bala jejaga sereta enggau bala pemesai, “Tama, lalu bunuh semua sida. Anang nejuka sida rari!” Sida lalu tama, kinding-kinding megai pedang, lalu munuh semua sida. Sida lalu ngirit bangkai semua orang nya ke luar. Udah nya sida lalu tama ngagai bilik alai Baal disembah dalam rumah sembiang nya.

²⁶Sida mai lalu nunu tiang keramat ti bisi dia.

²⁷Nya alai sida ngerusak tiang keramat, enggau rumah sembiang nya, lalu ngaga rumah sembiang nya nyadika agu, nyentuk ngagai sehari tu.

²⁸Nya meh chara Jehu munaska pengawa orang ke besembahka Baal di menua Israel.

²⁹ Tang iya neladan dosa Raja Jeroboam ke nguluka orang Israel bedosa nyembah anak sapi ti lelaki ti digaga ari emas, ti udah didirika iya di Betel enggau di Dan.

³⁰Ku TUHAN bejaku ngagai Jehu, “Nuan udah ngereja ngagai bala peturun Ahap semua utai ti udah diasuh Aku kereja nuan. Nya alai, Aku besemaya, peturun nuan nyentuk ngagai serak ti keempat deka nyadi raja menua Israel.”

³¹Tang Jehu enda ngasika Adat TUHAN Allah Taala ke disembah orang Israel enggau pengabis ati iya. Iya neladan Jeroboam, ti udah nguluka orang Israel bedosa.

³²Ba urung maya nya TUHAN lalu belabuh ngurangka pemesai rampa menua Israel. Raja Hasael menua Siria ngalahka semua sitak menua Israel

³³ti di timur Sungai Jordan, nyentuk ngagai nengeri Aroer di selatan, ba Sungai Arnon, nyengkaum menua Giliat enggau menua Basan, ti alai raban bansa Gat, Reuben, enggau Manasi Timur diau.

³⁴Semua utai bukai ti udah dikereja Jehu, nyengkaum pasal pemerani iya, bisi dituliska magang dalam Jerita Lama Pasal Raja Menua Israel.

³⁵Iya mati, lalu dikuburka di Samaria, lalu anak iya Jehoahas nganti iya nyadi raja.

³⁶Jehu merintah di Samaria nyadi raja menua Israel dua puluh lapan taun.