Read Iban 2 Raja 11 Bible Online

2 Raja 11 - Iban bible

2 Raja 11

¹Lebuh Ataliah, indai Raja Ahasiah, ninga anak iya udah dibunuh, iya lalu meri atur ngasuh bala sida raja sebilik dibunuh magang.

²Ka semina Joas anak Ahasiah aja ke ulih ngerarika diri. Lebuh orang baru deka munuh iya sama enggau sida ti bukai, ibu iya Jehoseba anak Raja Joram, menyadi-tiri Ahasiah, nyelamatka iya. Ibu iya mai iya, sama enggau indu ke ngibun iya, ngagai bilik tinduk dalam Rumah Sembiang, lalu ngelalaika iya ari Ataliah, enggai ke iya dibunuh.

³Jehoseba ngibun nembiak nya enam taun, ngelalaika iya dalam Rumah Sembiang, sekumbang Ataliah ke merintah nyadi kuin.

⁴Tang dalam taun ti ketujuh, imam Jehoiada mesanka bala pemesai ti nyadi tuai nyaga raja, enggau orang ke nyaga istana, ngasuh sida datai ngagai Rumah Sembiang, lalu ngasuh sida besumpah besetujuka utai ti deka dikereja iya. Iya lalu ngasuh sida betemu enggau Joas anak Raja Ahasiah.

⁵Iya meri atur tu ngagai sida: “Lebuh kita mansang gawa kena Hari Sabat, seraban ari tiga bengkah raban kita deka nyaga istana.

⁶Seraban ti bukai deka nyaga ba Pintu Sur, lalu seraban ti bukai deka nyaga ba pintu ti di belakang bala jejaga ti bukai. [15]

⁷Raban dua iti ti ngetu gawa ba Hari Sabat, deka nyaga raja dalam Rumah Sembiang TUHAN.

⁸Pedang kita enda tau enda disintak lebuh kita nyaga Raja Joas, lalu kita enda tau enda bejalai sama enggau iya lebuh iya bejalai ngagai sebarang endur. Barang sapa datai semak ngagai kita, enda tau enda dibunuh.”

⁹Bala pemesai nya ngasika atur Jehoiada, lalu mai ngagai Jehoiada bala nembiak sida ke ngetu jaga, enggau ke baru deka mansang jaga lebuh Hari Sabat.

¹⁰Jehoiada meri ngagai bala pemesai nya sangkuh enggau terabai Raja David, ti udah ditaruh dalam Rumah Sembiang,

¹¹lalu iya ngasuh bala soldadu nyintak pedang sida lalu bediri ngelingi semua mua Rumah Sembiang, nyaga raja.

¹²Udah nya, Jehoiada lalu mai Joas pansut, ngengkahka makota ba pala iya, lalu meri ngagai iya adat pasal jalai nyadi raja. Udah nya Joas ditata, lalu dichiri nyadi raja. Bala orang mayuh lalu nempapka jari, sereta manjung, “Gayu-guru meh raja!”

¹³Lebuh Kuin Ataliah ninga munyi panjung bala jejaga enggau orang mayuh, iya lalu beguai-guai mansang ngagai Rumah Sembiang alai orang mayuh ti udah begempuru.

¹⁴ Iya lalu tepedaka raja ti baru, bediri ngimbai tiang ti besai ba penama ngagai Rumah Sembiang, laban nya endang adat asal sida. Raja nya dikelingi bala pemesai, enggau bala orang ke nyepu terumpit, lalu semua orang mayuh manjung magang gaga ati, sereta nyepu terumpit. Ataliah lalu nyarikka gari diri lalu manjung, “Penipu! Penipu!”

¹⁵Jehoiada enda nyagi Ataliah dibunuh dalam kandang Rumah Sembiang, nya alai iya lalu bejaku enggau bala pemesai soldadu, “Bai iya pansut ensaraka rintai bala jejaga, lalu bunuh barang sapa deka nguji nyelamatka iya.”

¹⁶Sida lalu nangkap iya, lalu mai iya ngagai istana. Sida lalu munuh iya ba Pintu Kuda.

¹⁷Imam Jehoiada lalu ngasuh Raja Joas enggau orang mayuh ngaga siti sempekat enggau TUHAN, ngambika sida nyadi nembiak TUHAN. Iya mega ngaga siti sempekat entara raja enggau orang mayuh.

¹⁸Udah nya, orang mayuh mansang ngagai rumah sembiang Baal lalu ngeruntuhka rumah nya. Sida mechahka alta enggau engkeramba Baal, lalu munuh Matan, ti nyadi imam Baal, di mua alta nya. Jehoiada lalu ngasuh bala jejaga nyaga Rumah Sembiang.

¹⁹Udah nya, iya enggau bala pemesai, bala orang ke nyaga raja, enggau bala orang ke nyaga istana lalu ngiring raja ari Rumah Sembiang ngagai istana, dititihka semua orang mayuh. Joas tama nengah Pintu Jejaga, lalu nudukka diri ba kerusi diraja.

²⁰Semua orang mayuh bela gaga ati magang, lalu nengeri nya nadai pengachau agi, laban Ataliah udah dibunuh dalam istana.

²¹Joas nyadi raja menua Judah lebuh umur iya tujuh taun.