Read Iban 2 Raja 12 Bible Online

2 Raja 12 - Iban bible

2 Raja 12

¹Dalam taun ti ketujuh Raja Jehu merintah menua Israel, Joas berengkah nyadi raja menua Judah, lalu iya merintah di Jerusalem empat puluh taun. Indai iya benama Sibiah, ari nengeri Beer-seba.

²Joas ngereja utai ti ngerinduka ati TUHAN sepemanjai umur iya, laban iya diajar Imam Jehoiada.

³Tang palan alai orang kapir nyembah petara sida, enda dirusak, lalu orang mayuh majak ngenjuk piring sereta nunu menyan ba endur nya.

⁴ Ku Joas bejaku ngagai bala imam, “Semua duit ti diberi nyadi pemeri ti kudus ti dibai ngagai Rumah TUHAN, nya duit chukai, enggau duit ti dienjuk nitihka peneka ati diri, ti dibai ngagai Rumah TUHAN,

⁵awakka imam nerima duit nya ari genap iku orang ke meri pemeri nya, lalu awakka sida imam nyeruri Rumah TUHAN nya genap kali utai ti patut diseruri ditemu sida imam.

⁶Tang nyentuk ngagai taun ti ketiga puluh Joas megai perintah, bala imam lalu apin nyeruri Rumah Sembiang.

⁷Nya alai, Raja Joas lalu mesanka Jehoiada enggau bala imam ti bukai, lalu nanya ngagai sida, “Nama kebuah kita enda nyeruri Rumah Sembiang? Belabuh ari diatu, kita enda tau nyimpan duit ti diterima kita. Kita enda tau enda nyerahka duit nya, ngambika Rumah Sembiang diseruri.”

⁸Bala imam besetuju enggau penemu nya, lalu besetuju mega enda nyeruri Rumah Sembiang nya.

⁹Imam Jehoiada lalu ngambi siti peti, ngaga siti lubang ba tudung peti nya, lalu ngengkahka peti nya ba atas alta, muak ari kanan penama ngagai Rumah Sembiang. Bala imam ke bekereja ba penama nya, nyimpan dalam peti nya semua duit ti diberi bala orang ke datai besembiang.

¹⁰Lebuh duit nyau udah mayuh dalam peti nya, kerani raja enggau Imam Besai lalu datai, ngeluluhka pirak nya, lalu nimbang iya. [16]

¹¹Lebuh penyampau duit nya udah dituliska, sida lalu nyerahka pirak nya ngagai orang ke nyadi tuai megai pengawa dalam Rumah Sembiang, kena sida mayar bala tukang kayu, enggau bala tukang ke ngaga rumah,

¹²tukang batu, orang ke betetakka batu, ke bebelika ramu enggau batu ti dikena nyeruri, sereta mayar semua ungkus utai bukai ti dikena.

¹³Tang duit nya enda dikena begagaka mangkuk pirak, mangkuk, terumpit, tauka pekekas kena ngintu lampu, tauka sebarang utai bukai ti digaga ari pirak tauka emas.

¹⁴Semua duit nya dikena mayar bala orang ke gawa, enggau dikena meli semua utai ti dikena nyeruri Rumah Sembiang aja.

¹⁵ Orang ke nyadi tuai ngatur pengawa nya endang orang ke tau dikarapka, nya alai sida enda dipinta madahka jalai duit nya dikena.

¹⁶ Duit ti diberi nyadika piring kena bebayarka ukum penyalah, enggau piring pengampun dosa, enda disimpan dalam peti nya, laban duit nya diberi ngagai bala imam.

¹⁷Lebuh maya nya Raja Hasael menua Siria nyerang lalu ngalahka nengeri Gat. Udah nya iya berunding deka nyerang Jerusalem.

¹⁸Raja Joas menua Judah lalu ngambi semua pemeri ti udah diserahka bala raja ke dulu agi ari iya, iya nya sida Jehosapat, Jehoram, enggau Ahasiah, ngagai TUHAN. Iya lalu nambahka pemeri ti diberi iya empu, enggau semua emas ti dalam sarang reta Rumah Sembiang, enggau di istana, lalu ngirumka semua duit nya nyadika pemeri ngagai Raja Hasael. Raja Hasael lalu mai bala soldadu iya angkat ari Jerusalem.

¹⁹Semua utai bukai ti udah dikereja Raja Joas bisi dituliska magang dalam Jerita Lama Bala Raja Menua Judah.

²⁰Bala pemesai Raja Joas lalu bepekat ngelaban iya. Dua iku ari bala sida, iya nya Josakar anak Simet, enggau Jehosabat anak Somer, munuh iya dalam rumah ti digaga ba tanah tambun ti ba tisi timur nengeri Jerusalem, ba jalai ngagai Sila. Joas dikuburka ba lumbung bala raja di Nengeri David, lalu anak iya Amasiah nganti iya nyadi raja.