Read Iban 2 Raja 13 Bible Online

2 Raja 13 - Iban bible

2 Raja 13

¹Dalam taun ti kedua puluh tiga Joas anak Ahasiah nyadi raja menua Judah, Jehoahas anak Jehu berengkah nyadi raja menua Israel, lalu iya merintah di Samaria tujuh belas taun.

²Baka Raja Jeroboam ke dulu ari iya, iya bedosa ngelaban TUHAN, lalu nguluka orang Israel bedosa. Iya nadai kala ngelengkaka ulah iya ti jai;

³nya alai TUHAN ringat ngagai orang Israel, lalu Iya nejuka Raja Hasael menua Siria, enggau anak iya Benhadat betangkan-tangkan ngalahka menua Israel.

⁴Udah nya Jehoahas besampi ngagai TUHAN, lalu lebuh TUHAN meda pemalat raja menua Siria nekanka pengidup orang Israel, Iya nyaut sampi Raja Jehoahas.

⁵TUHAN meri siku tuai ngagai orang Israel, ke ngelepaska sida ari orang Siria, lalu orang Israel diau likun baka ke dulu.

⁶Tang sida mengkang enggai nesal ati ke dosa ti udah dibai Raja Jeroboam kereja sida, tang majak ngereja dosa nya, lalu nejuka engkeramba petara indu Aserah mengkang di Samaria.

⁷Jehoahas nadai agi bala soldadu, kelimpah ari lima puluh iku bala soldadu ke nepan kuda, sepuluh buah kerita perang, enggau sepuluh ribu iku soldadu ke bejalai kaki, laban raja menua Siria udah munuh sida ti bukai, ngelunjak sida baka ke ngelunjak amau.

⁸Semua utai bukai ti udah dikereja Jehoahas, enggau cherita pasal pemerani iya bisi dituliska magang dalam Jerita Lama Pasal Raja Menua Israel.

⁹Iya mati lalu dikuburka di Samaria, lalu anak iya Jehoas nganti iya nyadi raja.

¹⁰Dalam taun ti ketiga puluh tujuh Raja Joas merintah di menua Judah, Jehoas anak Jehoahas berengkah nyadi raja menua Israel, lalu iya merintah di Samaria enam belas taun.

¹¹Iya mega bedosa ngelaban TUHAN, lalu ngereja utai ti jai neladan Raja Jeroboam, ti udah nguluka orang Israel bedosa.

¹²Semua utai bukai ti udah dikereja Jehoas, nyengkaum pemerani iya beperang ngelaban Raja Amasiah menua Judah, bisi dituliska magang dalam Jerita Lama Pasal Raja Menua Israel.

¹³Jehoas mati lalu dikuburka ba lumbung bala raja di Samaria, lalu anak iya, Jeroboam Ti Kedua, nganti iya nyadi raja.

¹⁴ Nyadi Elisa udu amat sakit, lalu lebuh iya benung garing-garing natka diri ke nyau deka mati, Raja Jehoas menua Israel datai ngabas iya. Ku Raja Jehoas nyabak, “Apai, apai! Nuan tu orang ke kering nyaga menua Israel!”

¹⁵Lalu ku Elisa bejaku enggau iya, “Ambi panah enggau laja.” Jehoas lalu ngambi panah enggau laja;

¹⁶Elisa lalu ngasuh iya sedia nimbakka laja nya. Raja lalu sedia, lalu Elisa ngengkahka jari ba atas jari raja.

¹⁷Udah nya, nitihka asuh Elisa, raja lalu muka jenila ti nunga ngagai Sira. “Timbakka laja nya!” ku Elisa bejaku enggau Raja Jehoas. Lebuh raja udah nimbakka laja nya, Elisa lalu bejaku, “Nuan tu nyadika laja TUHAN, kena Iya ngalahka orang Siria. Nuan deka ngelaban orang Siria di Apek, datai ke nuan udah ngalahka sida.”

¹⁸Udah nya Elisa lalu ngasuh raja ngambi laja ti bukai, lalu maluka laja nya ngagai tanah. Raja lalu maluka laja nya tiga kali ngagai tanah, lalu badu.

¹⁹Elisa lalu ringat. Ku iya bejaku enggau raja, “Nuan patut malu tanah lima tauka enam kali, nya baru nuan ulih ngeluska orang Siria. Tang diatu nuan deka ngalahka sida semina tiga kali aja.”

²⁰Elisa mati lalu dikuburka. Nyadi orang Moap endang selalu nyerang menua Israel tiap taun.

²¹Nyadi sekali, lebuh orang Israel nguburka orang ke mati, sida bisi tepedaka seraban orang Moap datai. Orang Israel lalu nibarka bangkai orang nya ngagai kubur Elisa, lalu rari. Lebuh bangkai orang nya negu rangkah tulang Elisa, orang nya lalu idup baru, lalu bediri.

²²Raja Hasael menua Siria balat amat nekanka pengidup orang Israel sekumbang Jehoahas ti nyadi raja,

²³tang TUHAN nelap enggau orang Israel sereta kasihka sida. Iya enda nyagi sida dirusak, tang nyaup sida ketegal sempekat Iya enggau Abraham, Isak, enggau Jakop. Iya nadai kala enda ingatka bala nembiak Iya.

²⁴Lebuh Raja Hasael mati, anak iya Benhadat nganti iya nyadi raja.

²⁵Udah nya Raja Jehoas menua Israel ngalahka Benhadat tiga kali, lalu ngambi pulai baru nengeri ti udah dialahka Benhadat lebuh maya apai iya Jehoahas nyadi raja.