Read Iban 2 Raja 14 Bible Online

2 Raja 14 - Iban bible

2 Raja 14

¹Dalam taun ti kedua Jehoas anak Jehoahas nyadi raja menua Israel, Amasiah anak Joas berengkah nyadi raja menua Judah

²lebuh umur iya dua puluh lima taun, lalu iya merintah di Jerusalem dua puluh semilan taun. Indai iya benama Jeho-adin, ari Jerusalem.

³Iya ngereja utai ti ngerinduka ati TUHAN, tang iya enda baka aki iya Raja David, tang ngereja utai baka ke udah dikereja apai iya Joas.

⁴Iya enda ngeruntuhka endur alai orang kapir nyembah petara sida, lalu orang mayuh majak ngenjuk piring sereta nunu menyan ba endur nya.

⁵Lebuh Amasiah nyau udah tegap megai perintah, iya lalu munuh bala pemesai ti udah munuh apai iya.

⁶ Tang iya enda munuh bala anak sida laban iya ngasika jaku TUHAN ti ditulis dalam Adat Moses: “Apai indai enda tau dibunuh ketegal penyalah anak sida, lalu anak enda tau dibunuh ketegal penyalah apai indai sida. Orang semina tau dibunuh ketegal penyalah sida empu.”

⁷Amasiah munuh sepuluh ribu iku soldadu orang Edom ba Lebak Garam. Iya ngalahka nengeri Sela, lalu iya ngumbai nengeri nya Jokte-el. Nama nya agi mengkang nyentuk ngagai diatu.

⁸Udah nya Amasiah lalu ngasuh bala seruan mansang ngagai Raja Jehoas menua Israel, mai iya belaban. [17]

⁹Tang Raja Jehoas ngirumka pesan tu kena iya nyaut Amasiah: “Nyadi sekali, madang duri ba Bukit Lebanon ngirumka pesan ngagai kayu sidar: ‘Asuh anak indu nuan jadi enggau anak lelaki aku.’ Siku jelu babas mansa, lalu ngindik madang duri nya.

¹⁰Nyadi nuan Amasiah udah ngalahka orang Edom, lalu nuan diatu nyau penuh laban penyumbung. Anang enda nemu puas ati ke diri ti tampak nama. Diau aja di rumah. Nama kebuah nuan deka ngaga pengachau lalu ngasuh nuan enggau bala nuan ditinggang penusah?”

¹¹Tang Amasiah enggai mendingka jaku Raja Jehoas. Nya alai Raja Jehoas mansang enggau bala iya, lalu ngelaban Amasiah ba Bet-semes, di menua Judah.

¹²Bala soldadu Amasiah alah, lalu semua bala soldadu iya rari ngagai rumah diri.

¹³Jehoas lalu nangkap Amasiah, nyerang Jerusalem, lalu ngeruntuhka dinding kuta nengeri nya berengkah ari Pintu Epraim nyentuk ngagai Pintu Sukut, kira panjai dua ratus meter.

¹⁴Iya ngambi semua pirak enggau emas ti ditemu iya, semua pekekas Rumah Sembiang, lalu mai utai nya ngagai Samaria. Iya mega nabanka orang tebus.

¹⁵Semua utai bukai ti udah dikereja Jehoas, nyengkaum pemerani iya beperang ngelaban Raja Amasiah menua Judah, bisi dituliska magang dalam Jerita Lama Pasal Raja Menua Israel.

¹⁶Jehoas mati, lalu dikuburka ba lumbung bala raja di Samaria, lalu anak lelaki iya, Jeroboam Ti Kedua, nganti iya nyadi raja.

¹⁷Raja Amasiah menua Judah agi mengkang idup lima belas taun udah bekau pemati Raja Jehoas menua Israel.

¹⁸Semua utai bukai ti udah dikereja Amasiah bisi dituliska magang dalam Jerita Lama Pasal Raja Menua Judah.

¹⁹Nyadi orang di Jerusalem bepekat deka munuh Amasiah. Nya alai Amasiah ngerarika diri ngagai nengeri Lakis, tang bala munsuh iya nitihka iya ngagai nengeri nya, lalu munuh iya.

²⁰Bangkai iya lalu dibai pulai ngagai Jerusalem, ditepanka ba siku kuda, lalu dikuburka ba lumbung bala raja di Nengeri David.

²¹Udah nya orang Judah lalu nyiri anak iya Usiah, ke umur enam belas taun, nyadi raja.

²²Udah bekau pemati apai iya, Usiah ngalahka nengeri Elat, lalu ngaduka nengeri nya baru.

²³Dalam taun ti kelima Amasiah anak Joas nyadi raja menua Judah, Jeroboam anak Jehoas lalu berengkah nyadi raja menua Israel, lalu iya merintah di Samaria empat puluh satu taun.

²⁴Iya bedosa ngelaban TUHAN, laban iya neladan penyai Jeroboam anak Nebat ti udah nguluka orang Israel bedosa.

²⁵ Iya ngerampas baru semua sitak menua ti endang diempu orang Israel, berengkah ari Lebo-hamat di utara, nyentuk ngagai Tasik Mati di selatan. Tu meh utai ti udah disemaya TUHAN, ti Allah Taala ke disembah orang Israel, ngagai nembiak Iya nabi Jonah anak Amitai ke datai ari Gat-heper.

²⁶TUHAN udah meda pemerinsa orang Israel, lalu siku pen nadai ga orang nyaup sida.

²⁷Tang juluk ati TUHAN ukai deka ngerusak orang Israel abis lengis enggau ke belama iya. Nya alai iya ngelepaska sida ngena Raja Jeroboam Ti Kedua.

²⁸Semua utai bukai ti udah dikereja Jeroboam Ti Kedua, pemerani iya beperang, enggau chara iya mulaika nengeri Damaskus enggau nengeri Hamat ngagai orang Israel baru, bisi dituliska magang dalam Jerita Lama Pasal Raja Menua Israel.

²⁹Jeroboam mati, lalu dikuburka ba lumbung bala raja, lalu anak iya Sekariah nganti iya nyadi raja.