Read Iban 2 Raja 15 Bible Online

2 Raja 15 - Iban bible

2 Raja 15

¹Dalam taun ti kedua puluh tujuh Raja Jeroboam Ti Kedua merintah menua Israel, Usiah anak Amasiah berengkah nyadi raja menua Judah,

²lebuh umur iya enam belas taun, lalu iya merintah lima puluh dua taun. Indai iya Jekoliah, datai ari Jerusalem.

³Raja Usiah ngereja utai ti ngerinduka ati TUHAN, neladan apai iya Amasiah.

⁴Tang iya enda ngerusak endur alai orang kapir nyembah petara sida, lalu orang mayuh majak ngenjuk piring sereta nunu menyan ba endur nya.

⁵TUHAN lalu ngasuh Usiah diserang penyakit kulit ti tau ngerampit, ti mengkang ba iya seumur idup. Iya diau kediri dalam rumah iya empu. Semua pengawa iya diambi magang ari iya, lalu anak iya Jotam merintah menua ngarika iya.

⁶Semua utai bukai ti udah dikereja Usiah bisi dituliska magang dalam Jerita Lama Pasal Raja Menua Judah.

⁷ Usiah mati lalu dikuburka ba lumbung bala raja di Nengeri David, lalu anak iya Jotam nganti iya nyadi raja.

⁸Dalam taun ti ketiga puluh lapan Raja Usiah merintah menua Judah, Sekariah anak Jeroboam Ti Kedua berengkah nyadi raja menua Israel, lalu iya merintah di Samaria enam bulan.

⁹Iya bedosa ngelaban TUHAN baka bala raja ke dulu ari iya. Iya ngereja utai ti jai neladan Raja Jeroboam anak Nebat, ti udah nguluka orang Israel bedosa.

¹⁰Salum anak Jabes lalu bepekat ngelaban Raja Sekariah. Iya munuh Raja Sekariah di Iblim, lalu nganti iya nyadi raja.

¹¹Semua utai bukai ti udah dikereja Sekariah bisi dituliska magang dalam Jerita Lama Pasal Raja Menua Israel.

¹² Nya alai semaya ti udah digaga TUHAN enggau Raja Jehu dikamatka. Semaya nya munyi tu, “Peturun nuan, nyentuk ngagai serak ti keempat [18] deka nyadi raja menua Israel.”

¹³Dalam taun ti ketiga belas Raja Usiah merintah menua Judah, Salum anak Jabes berengkah nyadi raja menua Israel, lalu iya merintah di Samaria sebulan.

¹⁴Menahem anak Gadi datai ari Tirsah ngagai Samaria, munuh Salum, lalu nganti iya nyadi raja.

¹⁵Semua utai bukai ti udah dikereja Salum, nyengkaum cherita pasal iya ke bepekat ngelaban raja, bisi dituliska magang dalam Jerita Lama Pasal Raja Menua Israel.

¹⁶Lebuh maya nya Menahem ngerusak Tipsah, munuh semua orang ke diau di nengeri nya, enggau di menua ti ngelingi nengeri nya berengkah ari Tirsah. Iya ngereja nya laban orang dia enggai nunduk ngagai iya. Indah perut sida indu ke ngandung deh diperuti iya.

¹⁷Dalam taun ti ketiga puluh semilan Raja Usiah merintah menua Judah, Menahem anak Gadi berengkah nyadi raja menua Israel, lalu iya merintah di Samaria sepuluh taun.

¹⁸Iya bedosa ngelaban TUHAN, laban nyentuk ngagai pemati iya, iya ngereja utai ti jai neladan Raja Jeroboam anak Nebat, ti udah nguluka orang Israel bedosa.

¹⁹Tiglat Pileser, raja menua Asiria, lalu nyerang menua Israel, lalu Menahem meri iya 34,000 kilogram pirak kena iya minta raja menua Asiria nyaup iya negapka kuasa iya di menua Israel.

²⁰Menahem bulih duit nya ari orang ke kaya di menua Israel. Iya mejalka sida meri lima puluh singkap duit siku-siku. Nya alai Tiglat pulai ngagai menua iya empu.

²¹Semua utai bukai ti udah dikereja Menahem bisi dituliska magang dalam Jerita Lama Pasal Raja Menua Israel.

²²Iya mati lalu dikuburka, lalu anak iya Pekahiah nganti iya nyadi raja.

²³Dalam taun ti kelima belas Raja Usiah merintah menua Judah, Pekahiah anak Menahem berengkah nyadi raja menua Israel, lalu iya merintah di Samaria dua taun.

²⁴Iya bedosa ngelaban TUHAN, neladan penyai Raja Jeroboam anak Nebat, ti udah nguluka orang Israel bedosa.

²⁵Siku pemesai ari bala soldadu Pekahiah, ke benama Pekah anak Remaliah, bepekat enggau lima puluh iku orang ari Giliat, deka munuh Pekahiah dalam kuta ti dalam istana, di Samaria, lalu nganti iya nyadi raja.

²⁶Semua utai bukai ti udah dikereja Pekahiah bisi dituliska magang dalam Jerita Lama Pasal Raja Menua Israel.

²⁷Dalam taun ti kelima puluh dua Raja Usiah merintah menua Judah, Pekah anak Remaliah berengkah nyadi raja menua Israel, lalu iya merintah di Samaria dua puluh taun.

²⁸Iya bedosa ngelaban TUHAN laban iya ngereja utai ti jai neladan Raja Jeroboam anak Nebat, ti udah nguluka orang Israel bedosa.

²⁹Lebuh Pekah nyadi raja, Tiglat Pileser, raja menua Asiria, ngalahka nengeri Ijon, Abel Bet-maakah, Janoah, Kedes enggau nengeri Hasor, menua Giliat, menua Galili, enggau menua Naptali, lalu nabanka orang mayuh nyadi orang tangkap ngagai menua Asiria.

³⁰Dalam taun ti kedua puluh Jotam anak Usiah merintah nyadi raja menua Judah, Hosea anak Elah bepekat ngelaban Raja Pekah, munuh iya, lalu nganti iya nyadi raja.

³¹Semua utai bukai ti udah dikereja Pekah bisi dituliska magang dalam Jerita Lama Pasal Raja Menua Israel.

³²Dalam taun ti kedua Pekah anak Remaliah nyadi raja menua Israel, Jotam anak Usiah berengkah nyadi raja menua Judah

³³lebuh umur iya dua puluh lima taun, lalu iya merintah enam belas taun. Indai iya Jerusa anak Sadok.

³⁴Jotam ngereja utai ti ngerinduka ati TUHAN, neladan apai iya Usiah.

³⁵Tang iya enda ngerusak endur alai orang kapir nyembah petara sida, lalu orang mayuh majak ngenjuk piring sereta nunu menyan ba endur nya. Jotam nya meh orang ke ngaga Pintu Utara ke Rumah Sembiang.

³⁶Semua utai bukai ti udah dikereja Jotam bisi dituliska magang dalam Jerita Lama Pasal Raja Menua Judah.

³⁷Lebuh Jotam nyadi raja, nya mega maya TUHAN terubah ngasuh Raja Resin menua Siria enggau Raja Pekah menua Israel nyerang menua Judah.

³⁸Jotam mati lalu dikuburka ba lumbung bala raja di Nengeri David, lalu anak iya Ahas nganti iya nyadi raja.