Read Iban 2 Raja 16 Bible Online

2 Raja 16 - Iban bible

2 Raja 16

¹Dalam taun ti ketujuh belas Pekah anak Remaliah nyadi raja menua Israel, Ahas anak Jotam berengkah nyadi raja menua Judah

²lebuh umur iya dua puluh taun, lalu iya merintah di Jerusalem enam belas taun. Iya enda nitihka teladan ti manah ari aki iya Raja David, tang ngereja utai ti enda dikerinduka TUHAN Allah Taala,

³ lalu neladan sida raja menua Israel. Indah anak lelaki iya empu deh diserahka iya ngagai engkeramba nyadika piring tunu, nunda pengawa ti jai ti udah dikereja orang ke udah diburu TUHAN ari menua nya, lebuh orang Israel nyerang.

⁴Ahas ngenjuk piring, sereta nunu menyan ba endur alai orang kapir nyembah petara sida ba sebelah bukit, enggau di baruh kayu.

⁵ Raja Resin menua Siria enggau Raja Pekah menua Israel nyerang lalu ngelulung Jerusalem, tang seduai iya enda ulih ngalahka Ahas. (

⁶Lebuh maya nya mega raja menua Edom [19] merintah nengeri Elat baru, lalu muru orang Judah ti diau di nengeri nya. Orang Edom lalu ngentapka diri di nengeri nya, lalu sida agi diau dia nyentuk ngagai diatu.)

⁷Ahas lalu ngasuh orang mansang betemu enggau Tiglat Pileser, raja menua Asiria, mai pesan tu, “Aku tu ulun ke angkunka nuan. Aku minta nuan datai lalu ngelepaska aku ari jari raja menua Siria enggau raja menua Israel. Sida benung nyerang aku diatu.”

⁸Ahas ngambi pirak enggau emas ari sarang reta Rumah Sembiang, enggau ari sarang wang ti di istana, lalu ngirumka utai nya ngagai raja.

⁹Lebuh Tiglat Pileser nerima pesan nya ari Ahas, iya enggau bala soldadu iya lalu mansang nyerang nengeri Damaskus, ngalahka nengeri nya, munuh Raja Resin, lalu nabanka orang ari nengeri nya ngagai Kir nyadi orang tangkap.

¹⁰Lebuh Raja Ahas mansang ngagai nengeri Damaskus deka betemu enggau Raja Besai Tiglat Pileser, iya tepedaka siti alta ba endur nya. Iya lalu ngirumka siti chunto ti chukup silik ngagai Imam Uriah.

¹¹Uriah lalu ngaga siti alta sebaka enggau alta nya, lalu alta nya tembu digaga iya sebedau Ahas pulai.

¹²Lebuh Ahas pulai ari Damaskus, iya meda alta nya udah tembu.

¹³Nya alai iya lalu nunu jelu nyadika piring, enggau piring tepung ba alta nya, lalu nuang piring wain, enggau darah ari jelu nya nyadika piring pemaik ba alta nya.

¹⁴ Nyadi alta temaga ti udah diserahka ngagai TUHAN bisi ba entara alta ti baru nya enggau Rumah Sembiang. Nya alai iya mindahka alta temaga nya ngagai endur muak ke utara alta ti baru nya.

¹⁵Udah nya iya lalu bejaku enggau Uriah, “Kena meh alta ti besai tu alai ngenjuk piring tunu tiap pagi, enggau alai ngenjuk piring tepung tiap lemai, alai ngenjuk piring tunu enggau piring tepung ti diberi raja enggau orang mayuh, enggau alai ngenjuk piring wain ari orang mayuh. Tuang ba alta tu darah semua jelu ti diberi nyadika piring. Tang galau alta temaga nya kena aku nujum.”

¹⁶Uriah lalu ngereja nitihka jaku raja.

¹⁷ Raja Ahas lalu ngererak kerita temaga ti dikena dalam Rumah Sembiang, lalu ngambi bisin ti ba kerita nya. Iya mega ngambi tangki temaga ari belakang dua belas iku sapi temaga, lalu ngengkahka tangki temaga nya ba sigi batu pemun.

¹⁸Lalu kena iya ngenyamaika ati raja menua Asiria, Ahas mega ngambi ari Rumah Sembiang panggau ti alai ngengkahka kerusi diraja, lalu nikupka pintu ti ditengah raja tama ngagai Rumah Sembiang.

¹⁹Semua utai bukai ti udah dikereja Raja Ahas bisi dituliska magang dalam Jerita Lama Pasal Raja Menua Judah.

²⁰ Ahas mati lalu dikuburka ba lumbung bala raja di Nengeri David, lalu anak iya Hesekiah nganti iya nyadi raja.