Read Iban 2 Raja 17 Bible Online

2 Raja 17 - Iban bible

2 Raja 17

¹Dalam taun ti kedua belas Raja Ahas merintah menua Judah, Hosea anak Elah berengkah nyadi raja menua Israel, lalu iya merintah di Samaria semilan taun.

²Iya bedosa ngelaban TUHAN, tang enda ngemalat bala raja ke merintah menua Israel dulu agi ari nya.

³Raja Besai Salmaneser menua Asiria nyerang iya. Hosea lalu nunduk ngagai Salmaneser, lalu mayar chukai tiap taun ngagai iya.

⁴Tang sekali Hosea ngirumka bala seruan iya betemu enggau Raja So menua Ejip, minta tulung ari iya. Hosea lalu badu agi mayar chukai ninting taun ngagai Asiria. Lebuh Salmaneser ninga pasal pekara nya, iya lalu ngasuh orang nangkap lalu nutup Hosea dalam rumah jil.

⁵Udah nya Salmaneser nyerang menua Israel, lalu ngelulung nengeri Samaria. Dalam taun ti ketiga sida ngelulung nengeri nya,

⁶iya nya taun ti kesemilan Hosea merintah, raja menua Asiria [20] ngalahka nengeri Samaria, nabanka orang Israel nyadi orang tangkap ngagai menua Asiria, lalu ngasuh sekeda ari bala sida ngentapka diri di nengeri Halah, sekeda semak Sungai Habor, di pelilih menua Gosan, lalu sekeda ba mayuh bengkah nengeri di menua Media.

⁷Samaria alah laban orang Israel udah bedosa ngelaban TUHAN Allah Taala ti udah ngelepaska sida ari raja menua Ejip, lalu udah nguluka sida pansut ari menua Ejip. Sida udah nyembah petara bukai,

⁸niru adat asal orang ke udah diburu TUHAN lebuh bala nembiak Iya nyerang, lalu udah niru adat ti udah ditumbuhka bala raja orang Israel.

⁹Orang Israel udah ngereja [21] utai ti enda disagi TUHAN Allah Taala sida. Sida begagaka endur alai orang kapir nyembah petara sida dalam semua nengeri sida, berengkah ari nengeri ti pemadu mit nyentuk ngagai nengeri ti pemadu besai.

¹⁰ Ba sebelah munggu enggau di baruh semua kayu ti ngayung, sida nirika tiang batu, enggau engkeramba ke petara indu Aserah,

¹¹lalu sida betunuka menyan ba semua alta petara orang kapir, orang ke udah diburu TUHAN ari menua nya. Sida nyungkak TUHAN ringat ketegal semua penyai pengawa sida,

¹²lalu enda ngasika pesan TUHAN ti nagang sida nyembah engkeramba.

¹³TUHAN udah ngasuh bala seruan enggau bala nabi Iya meri jaku tangkan ngagai orang Israel enggau ngagai orang Judah: “Lengkaka jalai kita ke jai, lalu diau ngasika pesan Aku, ti disimpan dalam Adat ti udah diberi Aku ngagai aki ini kita, lalu udah diserahka Aku ngagai kita ngena sida nabi ke nembiak Aku.”

¹⁴Tang sida enda ngasi. Sida kieh baka aki ini sida ke enggai manggaika pengarap sida ba TUHAN Allah Taala sida.

¹⁵Sida enda ngasika atur Iya. Sida enda nitihka sempekat ti udah digaga Iya enggau aki ini sida, lalu sida enda mendingka jaku tangkan Iya. Sida nyembah engkeramba ti nadai guna, lalu sida empu nyadi orang ke nadai guna. Sida nitihka adat asal orang bansa bukai ke ngelingi sida, lalu enda ngasika pesan TUHAN ti udah nagang sida betundaka orang bukai.

¹⁶ Sida ngelanggar semua adat TUHAN Allah Taala sida, lalu ngaga dua iku anak sapi ti lelaki ari besi ngambika bisi disembah sida. Sida mega ngaga engkeramba petara indu Aserah, nyembah bintang, lalu betuaika petara Baal.

¹⁷ Sida nyerahka anak lelaki enggau anak indu sida nyadika piring tunu. Sida betilitka nasit enggau beburung, lalu sida nyerahka diri ngereja penyai di mua TUHAN, lalu nyungkak Iya ringat.

¹⁸Nya alai, TUHAN balat amat ringat ngagai orang Israel, lalu muai sida ari menua nya, ngalau semina perintah menua Judah aja.

¹⁹Tang indah orang Judah deh enda ngasika adat TUHAN Allah Taala sida. Sida betundaka adat asal ti ditiru orang Israel.

²⁰TUHAN udah nulak semua orang Israel, ngukum sida lalu nyerahka sida ngagai munsuh ti jai enggau sida, datai ke Iya muai sida ari mua Iya.

²¹Lebuh TUHAN udah nyeraraka orang Israel ari orang Judah, orang Israel lalu nyiri Jeroboam anak Nebat nyadi raja sida. Jeroboam mai sida ninggalka TUHAN, lalu nguluka sida ngagai dosa ti besai.

²²Sida neladan Jeroboam, lalu majak ngereja semua dosa ti udah dikereja iya,

²³datai ke ba pengujung iya, TUHAN muai sida ari menua nya, munyi ti udah disebut Iya dalam jaku tangkan ti udah diberi Iya ngena bala nembiak Iya, iya nya sida nabi. Nya alai orang Israel dibuai ngagai menua Asiria, alai sida ke agi diau nyentuk ngagai diatu.

²⁴Raja menua Asiria mai orang ari nengeri Babilon, Kut, Iwah, Hamat, enggau nengeri Separbaim, lalu ngasuh sida ngentapka diri di nengeri dalam menua Samaria [22] ngambi endur ari bala orang Israel ti udah dibuai ari menua nya lalu ditabanka ngagai menua bukai. Orang Asiria bempu nengeri nya, lalu diau dia.

²⁵Lebuh sida terubah ngentapka diri dia, sida enda nyembah TUHAN. Nya alai Iya lalu ngasuh jelu singa datai lalu munuh sekeda bala sida.

²⁶Raja menua Asiria lalu dipadahka pasal orang ke udah ngentapka diri di nengeri menua Samaria, ti enda nemu adat petara menua nya, ti ngasuh petara menua nya ngasuh jelu singa datai lalu munuh sida.

²⁷Nya alai Raja lalu meri atur, “Bai pulai baru siku ari bala sida imam ti udah ditabanka kitu nyadi orang tangkap. Asuh iya [23] pulai kin ke baru, lalu diau din, ngambika iya ngajar orang pasal adat petara menua nya.”

²⁸Nya alai siku imam orang Israel ti udah dibuai ari menua Samaria ngagai menua Asiria, pulai lalu diau di Betel, alai iya ke ngajar orang mayuh jalai nyembah TUHAN.

²⁹Tang orang ke ngentapka diri di menua Samaria majak begagaka engkeramba, lalu sida ngengkahka engkeramba nya dalam rumah sembiang ti udah digaga orang Israel. Genap bengkah raban sida nya bela begagaka engkeramba dalam nengeri ti alai sida diau:

³⁰orang Babilon begagaka engkeramba petara Sukot-benot, orang Kut begagaka engkeramba Nergal, orang Hamat begagaka engkeramba Asima,

³¹orang Iwah begagaka engkeramba Nibhas enggau engkeramba Tatak, lalu orang Separbaim nyerahka anak sida nyadika piring tunu ngagai petara sida ke benama Adramelek enggau Anamelek.

³²Bala orang tu mega nyembah TUHAN, lalu milih ari bala sida empu mayuh macham orang bekereja nyadi imam ba endur alai orang kapir nyembah petara sida, ngambika bisi ngenjuk piring ke sida ba endur nya.

³³Nya alai sida nyembah TUHAN, tang sida mega nyembah petara sida empu, nitihka adat asal ari menua sida empu.

³⁴ Sida agi nitihka adat asal sida empu nyentuk ngagai sehari tu. Sida enda nyembah TUHAN, lalu sida pen enda mega ngasika adat enggau pesan ti diberi TUHAN ngagai peturun Jakop, ti udah diberi Iya nama Israel.

³⁵ TUHAN udah ngaga sempekat enggau orang Israel munyi tu, “Anang nyembah petara bukai. Anang meremi ngagai sida, tauka betuaika sida, tauka ngenjuk piring ngagai sida.

³⁶ Kita enda tau enda ngasika Aku ti TUHAN, ti udah mai kita pansut ari menua Ejip, ngena kuasa enggau pengering ti besai. Kita enda tau enda meremi, lalu ngenjuk piring ngagai Aku.

³⁷Kita enda tau enda seruran ngasika adat enggau pesan ti udah ditulis Aku ke kita. Kita enda tau sekali-kali ngasika petara bukai,

³⁸lalu kita enda tau enda ingatka sempekat ti udah digaga Aku enggau kita.

³⁹Kita enda tau enda ngasika Aku ti TUHAN Allah Taala kita, nya baru Aku deka ngelepaska kita ari munsuh kita.”

⁴⁰Tang bala orang ke ngentapka diri di menua Samaria enggai mending, lalu sida majak nitihka adat asal sida empu.

⁴¹Nya alai sida nyembah TUHAN, enggau nyembah engkeramba, lalu bala peturun sida nya agi mengkang ngereja nya nyentuk ngagai sehari tu.