Read Iban 2 Raja 18 Bible Online

2 Raja 18 - Iban bible

2 Raja 18

¹Dalam taun ti ketiga Hosea anak Elah nyadi raja menua Israel, Hesekiah anak Ahas berengkah nyadi raja menua Judah,

²lebuh umur iya dua puluh semilan taun. Indai iya Abijah anak Sekariah.

³Iya ngereja utai ti ngerinduka ati TUHAN, neladan aki iya Raja David.

⁴ Iya ngerusak endur alai orang kapir nyembah petara sida, ngeredakka tiang batu, lalu nebang engkeramba petara indu Aserah. Iya mega ngeredakka ular temaga ti udah digaga Moses, ti dikumbai Nehustan. Nyentuk ngagai maya nya, orang Israel agi majak betunuka menyan kena sida masa ular temaga nya.

⁵Hesekiah manggaika pengarap iya ba TUHAN Allah Taala ke disembah orang Israel. Menua Judah nadai kala bisi raja ti baka iya, nemuka sebedau tauka udah lepas iya.

⁶Iya tetap ati ngagai TUHAN, lalu nadai kala enda ngasika Iya, tang bejimat ngereja semua pesan ti udah diberi TUHAN ngagai Moses.

⁷Nya alai TUHAN bisi enggau iya, lalu iya mujur dalam semua utai ti dikereja iya. Iya angkat ngelaban raja menua Asiria, lalu enggai nunduk ngagai raja nya.

⁸Iya ngalahka orang Pilistin, lalu nyerang palan alai sida diau, berengkah ari genturung pendiau ti pemadu mit nyentuk ngagai nengeri ti pemadu besai, nyengkaum Gasa enggau menua ti ngelingi nengeri nya.

⁹Dalam taun ti keempat Hesekiah merintah, iya nya taun ti ketujuh Raja Hosea merintah menua Israel, Raja Besai Salmaneser menua Asiria nyerang menua Israel, lalu ngelulung nengeri Samaria.

¹⁰Ketiga taun sida udah ngelulung Samaria, nengeri nya lalu alah. Tu taun ti keenam Hesekiah megai perintah, enggau taun ti kesemilan Hosea merintah.

¹¹Raja besai menua Asiria [24] nabanka orang Israel nyadi orang tangkap lalu ngasuh sekeda sida ngentapka diri di nengeri Halah, sekeda semak Sungai Habor di pelilih menua Gosan, lalu sekeda ba mayuh bengkah nengeri di menua Media.

¹²Samaria alah laban orang Israel enda ngasika TUHAN Allah Taala sida, tang ngelanggar sempekat ti udah digaga Iya enggau sida, lalu ngelanggar semua adat ti udah diberi Moses, ti nembiak TUHAN. Sida enggai mending, lalu sida enggai ngasi.

¹³Dalam taun ti keempat belas Raja Hesekiah megai perintah, Senakerip, raja menua Asiria, nyerang lalu ngalahka mayuh bengkah nengeri ti bekuta di menua Judah.

¹⁴Hesekiah lalu ngirumka pesan ngagai Senakerip, ke bisi di Lakis lebuh maya nya. Ku iya, “Aku udah ngereja utai ti salah. Aku minta nuan badu agi nyerang. Aku deka meri sebarang utai ti dipinta nuan.” Raja lalu nyaut, madahka Hesekiah patut ngirumka ngagai iya 10,000 kilogram pirak, enggau 1,000 kilogram emas.

¹⁵Hesekiah lalu ngirumka ngagai iya semua pirak ti dalam sarang reta Rumah Sembiang enggau dalam sarang wang ti di istana.

¹⁶Iya mega ngerebakka emas ari pintu Rumah Sembiang, enggau emas ti udah dikena iya empu nyampak tiang pintu. Iya lalu ngirumka semua utai nya ngagai Senakerip.

¹⁷Raja menua Asiria lalu ngasuh mayuh amat bala soldadu angkat ari Lakis mansang nyerang Hesekiah di Jerusalem. Bala soldadu nya diuluka tiga iku pemesai iya ke pemadu tinggi pangkat. Lebuh sida datai di Jerusalem, sida lalu diau ba jalai raya ba palan alai tukang kain bekereja ngimbai parit ti mai ai ari letung ti di atas.

¹⁸Udah nya sida mesanka Raja Hesekiah, lalu tiga iku pemesai Hesekiah pansut betemu enggau sida. Nama pemesai tiga iku nya, Eliakim anak Hilkiah, ti nyadi tuai ngemataka istana, Sebna, ti nyadi kerani raja, enggau Joah anak Asap, ti nyadi kerani menua.

¹⁹Siku ari pemesai orang Asiria lalu madahka ngagai sida pasal raja ke keran deka nemu utai ti ngasuh Hesekiah kempang ati baka nya.

²⁰Ku iya, “Kati kita ngumbai leka jaku ulih nganti pengelandik beperang enggau pengering? Sapa dalam runding kita ulih nyaup kita angkat ngelaban Asiria?

²¹Kita ngarapka Ejip deka nyaup kita, tang nya baka orang ke betungkat ngena buluh ti patah, ti deka ngachuk jari iya. Nya meh gaya raja menua Ejip lebuh orang ngarapka iya.”

²²Ku pemesai orang Asiria nya nampung jaku iya, “Kati kita madahka diri deka ngarapka TUHAN Allah Taala kita? Indah Hesekiah empu deh udah ngerusak rumah sembiang enggau alta TUHAN lebuh iya ngasuh orang Judah enggau orang ke diau di Jerusalem nyembah Allah Taala semina ba alta di Jerusalem aja.

²³Aku deka betawar enggau kita dalam nama raja. Aku deka meri kita dua ribu iku kuda, enti kita bisi tetemuka orang ngemayuh nya nepan kuda nya!

²⁴Indah pemesai orang Asiria ke pemadu baruh pangkat deh enda ulih dilaban kita, tang agi ga kita ngarapka orang Ejip ngirumka kerita perang enggau bala soldadu ke nepan kuda ngagai kita!

²⁵Kati kita ngumbai TUHAN nadai udah nyaup aku nyerang lalu ngerusak menua kita? TUHAN Empu ti udah ngasuh aku nyerang lalu ngerusak menua kita.”

²⁶Udah nya Eliakim, Sebna, enggau Joah lalu bejaku ngagai pemesai nya, “Tuan, kami minta nuan bejaku ngena jaku bansa Aram enggau kami, laban kami meretika jaku nya. Anang bejaku ngena jaku Hebrew, laban semua orang ke ba atas dinding kuta nya mending magang.”

²⁷Ku pemesai nya nyaut, “Kati kita ngumbai raja semina ngasuh aku nyebut semua utai tu ngagai kita enggau ngagai raja aja? Ukai, aku mega bejaku ngagai bala orang ke duduk ba atas dinding kuta, ti deka makai tai lalu ngirup ai kemi diri baka kita empu.”

²⁸Udah nya pemesai nya lalu bediri, lalu bejaku enggau nyawa ti inggar ngena jaku Hebrew, “Pendingka utai ti dipadahka raja menua Asiria ngagai kita!

²⁹Iya meri jaku tangkan ngagai kita, enda ngasuh kita nejuka Hesekiah nipu kita, laban iya enda ulih ngelepaska kita ari jari aku.

³⁰Lalu anang nejuka iya mujuk kita ngarapka TUHAN. Anang ngumbai TUHAN deka ngelepaska kita ari jari aku, lalu nagang bala soldadu kami orang Asiria ngalahka nengeri kita.

³¹Anang mendingka Hesekiah. Raja menua Asiria ngasuh kita pansut ari nengeri nya lalu nyerahka diri. Semua kita deka dikemendarka makai buah anggur ari batang anggur, enggau buah ara ari kayu ara kita empu, lalu ngirup ai ari telaga kita empu,

³²nyentuk ngagai maya raja ngasuh kita ngentapka diri di menua ti sebaka enggau menua kita empu, ti bisi kebun anggur ti meri kita wain, enggau gandum kena kita ngaga roti. Menua nya mayuh minyak kana, enggau ai manyi. Enti kita ngereja utai ti diasuh iya, kita enda mati, tang idup. Anang nejuka Hesekiah nipu kita ngumbai TUHAN deka ngelepaska kita ari jari aku.

³³Kati petara orang menua bukai udah bisi kala ngelepaska menua sida ari kuasa raja menua Asiria?

³⁴Dini alai petara nengeri Hamat enggau petara nengeri Arpat diatu? Dini alai petara nengeri Separbaim, Hena enggau Iwah? Kati orang bisi udah ngelepaska Samaria?

³⁵Kemaya petara semua menua nya bisi udah kala ngelepaska menua sida ari kuasa raja kami? Nya alai nama utai ti ngasuh kita ngumbai TUHAN ulih ngelepaska Jerusalem ari jari aku?”

³⁶Bala orang mayuh enda bemunyi, nitihka asuh Raja Hesekiah. Sida nadai nyaut seleka.

³⁷Udah nya, Eliakim, Sebna enggau Joah lalu nyarikka gari diri, lalu mansang madahka utai ti udah disebut pemesai orang Asiria ngagai sida.