Read Iban 2 Raja 19 Bible Online

2 Raja 19 - Iban bible

2 Raja 19

¹Lebuh Raja Hesekiah ninga utai ti dipadahka sida, iya lalu nyarikka gari diri, ngerasukka kain guni, lalu mansang ngagai Rumah Sembiang.

²Iya ngasuh Eliakim, pemesai ke ngemataka istana, Sebna ti nyadi kerani raja, enggau sida imam ti tinggi pangkat, betemu enggau nabi Isaiah anak Amos. Sida nya mega begari ngena kain guni.

³Tu pesan ti diasuh Raja Hesekiah bai sida ngagai Isaiah, “Tu hari pemerinsa. Kitai tu benung diukum lalu dipechat. Kitai nyau baka indu ke radai deka beranak, tang kelalu lemi tulang ngadaka anak.

⁴Raja besai menua Asiria udah ngasuh kepala pemesai iya mechat Allah Taala ti idup. Awakka TUHAN Allah Taala nuan ninga jaku pechat nya, lalu ngukum orang ke mechat nya. Nya alai, nuan enda tau enda besampika bala kitai ti agi idup.”

⁵Lebuh Isaiah nerima pesan nya ari Raja Hesekiah,

⁶iya lalu ngirumka saut tu, “TUHAN madahka ngagai nuan, nuan enda tau nejuka orang Asiria ngemba kita ngena jaku ti ngumbai TUHAN enda ulih ngelepaska kita.

⁷TUHAN deka ngasuh raja nya ninga berita ngapa ti deka ngasuh iya pulai ngagai menua iya empu, lalu TUHAN deka ngasuh orang munuh iya din.”

⁸Pemesai orang Asiria nya pulai, lalu nemu raja udah angkat ari Lakis lalu benung nyerang nengeri Libnah ti enda jauh ari nya. Nya alai, iya mansang ngagai Libnah, deka betanya ngagai raja.

⁹Lebuh raja ninga berita pasal bala soldadu orang Ejip ke diuluka Raja Tirhakah menua Etiopia, benung mansang deka nyerang sida, iya lalu ngirumka bala seruan baru ngagai Raja Hesekiah

¹⁰madahka ngagai Hesekiah munyi tu: “Anang nejuka Allah Taala nuan nipu nuan madahka Jerusalem enda ulih dialahka raja menua Asiria.

¹¹Nuan udah ninga pasal raja menua Asiria ti udah ngerusak semua menua. Kati nuan ngumbai diri deka dilepaska ari jari iya?

¹²Aki ini aku udah ngerusak nengeri Gosan, Haran, Resep, lalu munuh orang Beteden ti diau di Telesar, lalu nadai siku petara sida udah ulih ngelepaska sida.

¹³Dini alai raja nengeri Hamat, Arpat, Separbaim, Hena enggau Iwah?”

¹⁴Raja Hesekiah lalu nerima surat nya ari bala seruan, lalu macha iya. Udah nya iya lalu mansang ngagai Rumah Sembiang, ngerembaika surat nya di mua TUHAN,

¹⁵ lalu besampi, “O TUHAN Allah Taala ke disembah orang Israel, ke duduk ba kerusi diraja Nuan atas melikat cherub ti besayap, Nuan aja ti Allah Taala, ke merintah semua perintah di dunya tu. Nuan udah ngaga dunya, enggau langit.

¹⁶Nya alai, TUHAN, peda Nuan utai ti nyadi ba kami. Dingaka semua jaku Senakerip ke mechat Nuan, Allah Taala ti idup.

¹⁷TUHAN, semua kami nemu, bala raja menua Asiria udah ngerusak mayuh bengkah bansa, ngasuh menua nya nadai agi diuan mensia,

¹⁸lalu nunu petara sida ke endang ukai petara, tang semina engkeramba ti digaga jari mensia ari kayu enggau ari batu.

¹⁹Nya alai, TUHAN Allah Taala kami, selamatka kami diatu ari orang Asiria, ngambika semua bansa di dunya tu nemu Nuan siku aja, O TUHAN, endang Allah Taala.”

²⁰Udah nya Isaiah lalu ngirumka pesan ngagai Raja Hesekiah, madahka saut TUHAN ngagai sampi iya,

²¹munyi tu, “Nengeri Jerusalem ketawa sereta ngeleseka nuan, Senakerip.

²²Sapa orang ke udah dipechat sereta dikeleseka nuan? Nuan enda bebasaka Aku ti kudus, Allah Taala ke disembah orang Israel.

²³Nuan udah ngasuh bala seruan nuan temegah di mua Aku, madahka nuan udah ngalahka bukit ti pemadu tinggi di menua Lebanon ngena semua kerita perang nuan. Nuan udah temegah madahka diri udah nebang kayu sidar ti pemadu tinggi, enggau kayu saipris ti pemadu manah, lalu madahka diri udah datai ba puak utan.

²⁴Nuan udah temegah madahka diri udah numbak telaga, lalu udah ngirup ai di menua bukai, lalu madahka kaki bala soldadu nuan udah ngindik Sungai Nile datai ke Sungai nya nyau rangkai.

²⁵“Kati nuan nadai udah kala ninga pasal Aku ke lama udah ngelanggur semua utai nya? Diatu Aku udah ngereja nya. Aku udah meri ngagai nuan kuasa kena ngeruntuhka mayuh bengkah nengeri ti bekuta nyadi tugung batu.

²⁶Orang ke diau di nengeri nya nadai pengering agi. Sida takut lalu temati-kutu. Sida baka rumput ti ba padang, tauka rumput ti tumbuh ba perabung rumah ti dipuputka ribut angat ti muput ari timur.

²⁷“Tang Aku nemu semua utai pasal nuan, utai ti dikereja nuan, enggau tunga nuan bejalai. Aku nemu pemalat nuan ringat ngagai Aku.

²⁸Aku udah dipadahka pasal pengeringat enggau pasal penyumbung nuan. Nya alai diatu Aku deka ngaitka mata ginti ba idung nuan, enggau batang besi dalam nyawa nuan, lalu mai nuan pulai baru nengah jalai ti udah ditengah nuan mansang.”

²⁹Udah nya Isaiah lalu bejaku enggau Raja Hesekiah, “Tu tanda ti deka nyadi. Taun tu, enggau taun baru tu ila, kita deka makai semina gandum ti ulih kita ari babas, tang dalam taun ti ngentudika nya, kita deka nanam lalu ngetau gandum, nanam anggur lalu makai buah anggur.

³⁰Orang ke agi idup di menua Judah deka nyadi baka utai ti ditanam, ti ngunjamka urat ke dalam tanah, lalu bebuah.

³¹Tang orang di Jerusalem enggau di Bukit Sion agi bisi idup, laban TUHAN endang udah mutuska runding Diri deka ngasuh utai nya nyadi.

³²“Tu utai ti disebut TUHAN pasal raja menua Asiria: ‘Iya enda tama ngagai nengeri tu, tauka nimbakka laja ngagai nengeri tu. Nadai siku soldadu ke mai terabai deka datai semak nengeri tu, lalu nadai kuta tanah deka digaga ngelingi nengeri tu.

³³Iya deka pulai niti jalai ti ditengah iya mansang, tang iya enda tama ngagai nengeri tu. Aku ti TUHAN udah bejaku.

³⁴Aku deka nyaga lalu nyelamatka nengeri tu, ketegal nama Aku, enggau ketegal semaya ti udah digaga Aku enggau nembiak Aku David.’ ”

³⁵Malam nya siku melikat TUHAN mansang ngagai kem orang Asiria, lalu munuh 185,000 iku soldadu. Tumu pagi hari siti, sida nyau betegaring mati!

³⁶Udah nya raja Senakrip menua Asiria nyurutka diri, lalu pulai ngagai Nineweh.

³⁷Nyadi sekali lebuh iya benung besembiang dalam rumah sembiang petara iya ke benama Nisrok, dua iku ari bala anak lelaki iya, Adramelek seduai Sareser, munuh iya ngena pedang seduai iya empu, lalu ngerarika diri ngagai menua Ararat. Siku ari bala anak lelaki iya ti bukai lalu nganti iya nyadi raja.