Read Iban 2 Raja 2 Bible Online

2 Raja 2 - Iban bible

2 Raja 2

¹Maya pen nyau datai alai TUHAN deka ngambi Elijah niki ke serega ngena ribut pulas uchung. Elijah seduai Elisa mupuk ari Gilgal,

²lalu di rantau jalai, Elijah bejaku enggau Elisa, “Nuan tinggal ditu. TUHAN udah ngasuh aku mansang ngagai Betel.” Tang ku Elisa nyaut, “Aku besumpah atas nama TUHAN ti idup, enggau penaluk aku ke nuan, aku enggai ninggalka nuan.” Nya alai seduai iya lalu majakka pejalai ngagai Betel.

³Seraban bala nabi ti diau di nengeri nya mansang ngagai Elisa, lalu nanya iya, “Kati nuan nemu TUHAN deka ngambi tuan nuan sehari tu?” “Nemu,” ku Elisa nyaut, “tang kitai enda ibuh berandauka nya diatu.”

⁴Udah nya Elijah lalu bejaku enggau Elisa, “Nuan tinggal ditu. TUHAN udah ngasuh aku mansang ngagai Jeriko.” Tang ku Elisa nyaut, “Aku besumpah nama TUHAN ti idup, enggau penaluk aku ke nuan, aku enggai ninggalka nuan.” Nya alai seduai iya lalu majakka pejalai ngagai Jeriko.

⁵Seraban bala nabi ti diau di nengeri nya mansang ngagai Elisa, lalu nanya iya, “Kati nuan nemu TUHAN deka ngambi tuan nuan sehari tu?” “Nemu,” ku Elisa nyaut. “Tang kitai enda ibuh berandauka nya.”

⁶Udah nya Elijah lalu bejaku enggau Elisa, “Nuan tinggal ditu. TUHAN udah ngasuh aku mansang ngagai Sungai Jordan.” Tang ku Elisa nyaut, “Aku besumpah atas nama TUHAN ti idup, enggau penaluk aku ke nuan, aku enggai ninggalka nuan.” Nya alai seduai iya majak bejalai,

⁷dititihka lima puluh iku nabi, ngagai Sungai Jordan. Elijah seduai Elisa lalu ngetu ba tebing sungai nya, lalu bala nabi nya bediri enda jauh ari seduai iya.

⁸Elijah lalu muka kelambi iya, ngulungka kelambi nya lalu maluka kelambi nya ngagai ai Sungai Jordan. Ai nya lalu bebagi dua, lalu seduai iya meraka ke seberai nengah tanah ti rangkai.

⁹ Dia Elijah lalu bejaku enggau Elisa, “Padahka ngagai aku utai ti diasuh nuan kereja aku ke nuan, sebedau aku dibai ari tu.” “Beri ngagai aku dua kali lipat kuasa nuan ngambika aku ulih nganti nuan,” [3] ku Elisa nyaut.

¹⁰“Utai ti dipinta nuan nya mar diberi aku,” ku Elijah nyaut. “Tang nuan deka nerima utai nya, enti nuan meda aku diambi ari nuan. Enti nuan nadai meda aku, nuan enda nerima utai nya.”

¹¹Lebuh seduai iya benung bejalai, seduai iya majak berandau. Tekala nya kerita api ti ditarit kuda api datai, ensaraka seduai iya, lalu Elijah ditabanka idup-idup ke serega ulih ribut pulas uchung.

¹² Elisa meda utai nya nyadi, lalu ngangauka Elijah, “Apai! Apai! Penyaga orang Israel ti bekuasa! Nadai meh nuan agi enggau aku!” Lalu iya nadai agi meda Elijah. Elisa tusah amat ati, lalu nyarikka kelambi iya belah dua.

¹³Iya ngambi kelambi Elijah ti udah labuh ari tubuh Elijah. Elisa pulai, lalu bediri ba tebing Sungai Jordan.

¹⁴Iya malu ai sungai nya ngena kelambi Elijah, lalu ku iya bejaku, “Dini alai TUHAN Allah Taala Elijah?” Udah nya iya lalu malu ai nya baru. Ai nya lalu bebagi dua, lalu iya bejalai ke seberai meraka sungai nya.

¹⁵Lebuh bala nabi ke lima puluh iku ari nengeri Jeriko meda nya, sida lalu bejaku, “Kuasa Elijah udah diberi ngagai Elisa!” Sida lalu mansang ngagai Elisa, meremi di mua iya,

¹⁶lalu bejaku, “Kami tu lima puluh iku, lalu semua kami tu kering magang. Aram kitai mupuk ngiga tuan nuan. Nyangka ukur Roh TUHAN udah nabanka iya ngagai bukit, tauka ngagai lebak.” “Anang,” ku Elisa nyaut.

¹⁷Tang sida majak ngumbuk iya, datai ke nyau nurutka jaku sida, lalu ngelakka sida mupuk begigaka Elijah tiga hari, tang sida nadai tetemuka iya.

¹⁸Udah nya sida pulai baru ngagai Elisa ti udah nganti sida di Jeriko, lalu ku iya bejaku enggau sida, “Nya kebuah aku nagang kita.”

¹⁹Sekeda orang ari Jeriko mansang ngagai Elisa, lalu bejaku, “Tuan, nuan nemu, nengeri tu nengeri ti manah, tang ai ditu enda manah, lalu ngasuh indu gugur anak.”

²⁰“Engkah garam mimit dalam mangkuk ti baru, lalu bai utai nya ngagai aku,” ku iya madahka ngagai sida. Sida lalu mai utai nya ngagai iya.

²¹Iya mansang lalu naburka garam nya ngagai mata ai nya, lalu bejaku, “Tu utai ti disebut TUHAN: ‘Aku nuchi ai tu, lalu iya enda agi ngasuh orang mati tauka gugur anak.’ ”

²²Kenyau ari nya, ai nya nyadi tuchi, munyi ti udah disebut Elisa.

²³Elisa angkat ari Jeriko, lalu mansang ngagai Betel. Di rantau jalai, sekeda bala nembiak pansut ari sebuah nengeri, lalu beduan iya. “Angkat ari tu, pala lasu!” ku sida ngangauka iya.

²⁴Elisa nguing, melutka mata ngagai sida, lalu nyumpah sida dalam nama TUHAN. Dua iku indu beruang lalu pansut ari babas, lalu nyarikka tubuh empat puluh dua iku nembiak nya.

²⁵Elisa lalu majakka pejalai iya ngagai Bukit Karmel, lalu udah nya pulai ngagai Samaria.