Read Iban 2 Raja 20 Bible Online

2 Raja 20 - Iban bible

2 Raja 20

¹Ba urung maya nya, Raja Hesekiah sakit, lalu nyau deka mati. Nabi Isaiah anak Amos datai ngabas iya, lalu ku iya bejaku enggau Raja Hesekiah, “TUHAN ngasuh nuan ngemas semua pekara nuan, laban nuan deka mati, enda ulih gerai.”

²Hesekiah lalu nguingka mua diri ngagai dinding, lalu besampi,

³“TUHAN, aku minta Nuan ingatka aku ti udah tetap ati sereta taluk betuaika Nuan, lalu aku endang seruran nguji ngereja utai ti diasuh Nuan.” Iya lalu nyabak balat amat.

⁴Isaiah lalu mupuk ari istana raja, tang sebedau iya meraka tengah laman ti ba tengah-tengah istana nya, TUHAN ngasuh iya

⁵pulai baru ngagai Hesekiah, ti nyadi raja ke bala nembiak TUHAN, lalu nyebut ngagai iya, “Aku, TUHAN Allah Taala aki nuan David, udah ninga sampi nuan, lalu udah meda ai mata nuan. Aku deka ngeraika nuan, lalu tiga hari da agi, nuan deka mansang ngagai Rumah Sembiang.

⁶Aku deka nejuka nuan idup lima belas taun da agi. Aku deka ngelepaska nuan enggau nengeri Jerusalem ari kuasa raja menua Asiria. Aku deka nyaga nengeri tu, ketegal nama Aku, enggau ketegal semaya ti udah digaga Aku enggau nembiak Aku David.”

⁷Udah nya Isaiah lalu ngasuh bala orang ke bekereja ke raja nampal pisa nya ngena buah ara ti udah ditutuk, ngambika iya gerai.

⁸Raja Hesekiah lalu nanya, “Nama tanda ti nunjukka TUHAN deka ngeraika aku, lalu aku ulih mansang ngagai Rumah Sembiang tiga hari da agi?”

⁹Disaut Isaiah, “TUHAN deka meri nuan siti tanda kena nunjukka Iya deka ngamatka semaya Iya. Kati nuan dekaka ayuk ba tangga nya niki sepuluh iti tangkal, tauka surut sepuluh iti tangkal?” [25]

¹⁰Ku Hesekiah nyaut, “Ngasuh ayuk nya mansang sepuluh iti tangkal ke mua nya nyamai dikereja![26] Asuh iya nyurutka ayuk nya sepuluh iti tangkal.”[27]

¹¹Isaiah lalu besampi ngagai TUHAN. TUHAN lalu ngasuh ayuk nya surut sepuluh iti tangkal [28] ba tangga nya.[29] Tangga nya digaga Raja Ahas.

¹²Ba urung maya nya, raja menua Babilon, ke benama Merodak Baladan, anak Baladan, bisi ninga berita pasal Raja Hesekiah ke sakit. Nya alai iya lalu ngirumka siti surat enggau pemeri ngagai Raja Hesekiah.

¹³Hesekiah ngelaluka bala seruan nya, lalu ngayanka pengaya iya ngagai sida: pirak enggau emas, rempah enggau minyak wangi, enggau semua senyata perang iya. Nadai utai ti dalam bilik setor iya, tauka ba endur bukai dalam menua ti diperintah iya, ti enda diayanka iya ngagai sida.

¹⁴Udah nya nabi Isaiah mansang ngagai Raja Hesekiah, lalu nanya, “Ari ni penatai bala orang tu, lalu nama utai ti disebut sida ngagai nuan?” Disaut Hesekiah, “Sida tu datai ari menua ti jauh, ari menua Babilon.”

¹⁵“Nama utai ti dipeda sida dalam istana?” “Sida meda semua utai. Nadai utai ti dalam bilik setor ti enda diayanka aku ngagai sida.”

¹⁶Udah nya Isaiah lalu madahka ngagai raja, “TUHAN bisi bejaku madahka

¹⁷ maya deka datai alai semua utai ti dalam istana nuan, semua utai ti udah ditaruh bala aki ini nuan nyentuk ngagai sehari tu, deka ditabanka magang ngagai menua Babilon. Nadai utai agi tinggal.

¹⁸ Sekeda peturun ari tubuh nuan empu deka ditabanka, lalu diperiri ngambika sida ulih bekereja dalam istana raja menua Babilon.”

¹⁹Raja Hesekiah ngumbai utai tu nunjukka menua deka bisi pemaik enggau pengelikun lebuh iya agi idup. Nya alai ku iya nyaut, “Manah amat pesan TUHAN ti udah diberi nuan ngagai aku.”

²⁰Semua utai bukai ti udah dikereja Raja Hesekiah, pemerani iya, enggau cherita pasal iya ke ngaga letung, sereta numbak lubang kena mai ai ngagai nengeri nya, bisi dituliska magang dalam Jerita Lama Raja Menua Judah.

²¹Hesekiah mati, lalu anak iya Manasi nganti iya nyadi raja.