Read Iban 2 Raja 21 Bible Online

2 Raja 21 - Iban bible

2 Raja 21

¹Manasi umur dua belas taun lebuh iya nyadi raja menua Judah, lalu iya merintah di Jerusalem lima puluh lima taun. Indai iya Hepsibah.

² Manasi bedosa ngelaban TUHAN laban iya nunda penyai pengawa ti udah dikereja bansa orang ke udah diburu TUHAN ari menua nya lebuh bala nembiak TUHAN nyerang.

³Iya ngaduka palan alai orang kapir nyembah petara sida, palan ti udah dirusak apai iya Hesekiah. Iya ngaduka alta alai orang nyembah Baal, lalu ngaga engkeramba petara indu Aserah, baka ke udah dikereja Raja Ahap menua Israel. Manasi mega nyembah bintang.

⁴ Iya ngaga endur alai orang kapir nyembah petara sida dalam Rumah Sembiang, palan ti udah diletak TUHAN alai Iya patut disembah.

⁵Iya ngaga mayuh bengkah alta kena nyembah bintang ba dua iti tengah laman Rumah Sembiang.

⁶Iya nyerahka anak lelaki iya nyadika piring tunu; iya beburung; betanya ngagai orang ke ngumbai diri nemu bejaku enggau semengat orang ke udah mati, enggau betanya ngagai manang. Iya balat amat bedosa ngelaban TUHAN, lalu nya nyungkak TUHAN ringat.

⁷ Iya ngengkahka tanda petara indu Aserah dalam Rumah Sembiang, palan ti udah dikenang TUHAN ngagai David enggau ngagai anak iya Solomon, munyi tu, “Di Jerusalem ditu, dalam Rumah Sembiang tu, meh endur ti udah dipilih Aku ari semua menua ti diempu dua belas raban bansa orang Israel, alai Aku disembah.

⁸Lalu enti orang Israel deka ngasika semua pesan Aku, lalu nitihka semua Adat ti udah diberi nembiak Aku Moses ngagai sida, nya baru Aku enda ngasuh sida diburu ari menua ti udah diberi Aku ngagai aki ini sida.”

⁹Tang orang Judah enda ngasika TUHAN, lalu Manasi nguluka sida ngereja dosa ti lebih besai agi ari ti udah dikereja bansa orang ke udah diburu TUHAN ari menua nya, lebuh bala nembiak Iya nyerang.

¹⁰Ku TUHAN bejaku ngena bala nabi Iya,

¹¹“Raja Manasi udah ngereja utai ti jai, utai ti lebih agi jai ari utai ti udah dikereja orang Kanaan, lalu iya udah nguluka orang mayuh bedosa ngena engkeramba ti udah digaga iya.

¹²Nya alai, Aku, TUHAN Allah Taala ke disembah orang Israel, deka ngasuh penusah ti besai ninggang nengeri Jerusalem enggau menua Judah, datai ke semua orang ke ninga berita nya deka temati-kutu.

¹³Aku deka ngukum Jerusalem baka Aku ti udah ngukum Samaria, baka Aku ti udah ngukum Raja Ahap menua Israel, enggau bala peturun iya. Aku deka muai semua orang ari Jerusalem, ngambika nengeri tu nadai agi pengamah, baka chapak ti udah dikendas, lalu ditungkupka.

¹⁴Aku deka muai orang ke agi idup, lalu nyerahka sida ngagai munsuh ti deka ngalah sereta ngerampas utai ari menua sida.

¹⁵Aku deka ngereja nya ngagai bala nembiak Aku, laban sida udah bedosa ngelaban Aku, lalu udah nyungkak Aku ringat kenyau ari maya aki ini sida pansut ari menua Ejip kelia, nyentuk ngagai sehari tu.”

¹⁶Manasi udah munuh mayuh amat orang ke nadai penyalah, datai ke darah sida nyau rarat ba jalai raya nengeri Jerusalem. Iya ngereja nya kena nambahka pengawa iya ke nguluka orang Judah besembahka engkeramba, ti ngasuh sida bedosa ngelaban TUHAN.

¹⁷Semua utai bukai ti udah dikereja Manasi, nyengkaum dosa ti udah dikereja iya, bisi dituliska magang dalam Jerita Lama Pasal Raja Menua Judah.

¹⁸Manasi mati lalu dikuburka ba kebun istana, iya nya kebun Usa, lalu anak iya Amon nganti iya nyadi raja.

¹⁹Umur Amon dua puluh dua taun lebuh iya nyadi raja menua Judah, lalu iya merintah di Jerusalem dua taun. Indai iya Mesulemet anak Harus, ari nengeri Jotbah.

²⁰Raja Amon mega bedosa ngelaban TUHAN baka apai iya.

²¹Iya neladan pengawa apai iya, lalu iya nyembah engkeramba ti udah disembah apai iya.

²²Iya nulak TUHAN Allah Taala aki ini iya, lalu enda ngasika pesan TUHAN.

²³Bala pemesai Amon bepekat ngelaban iya, lalu sida munuh iya dalam istana.

²⁴Orang Judah lalu munuh orang ke munuh Amon, lalu ngasuh anak iya Josiah nyadi raja.

²⁵Semua utai bukai ti udah dikereja Amon, bisi dituliska magang dalam Jerita Lama Pasal Raja Menua Judah.

²⁶Amon dikuburka ba kubur ti dalam kebun Usa, lalu anak iya Josiah nganti iya nyadi raja.