Read Iban 2 Raja 22 Bible Online

2 Raja 22 - Iban bible

2 Raja 22

¹ Umur Josiah lapan taun lebuh iya nyadi raja menua Judah, lalu iya merintah di Jerusalem tiga puluh satu taun. Indai iya Jedidah anak Adaiah ari nengeri Boskat.

²Josiah ngereja utai ti dikerinduka TUHAN. Iya nunda utai ti udah dikereja aki iya Raja David, terit ngasika semua adat Allah Taala.

³Dalam taun ti kelapan belas iya megai perintah, Raja Josiah ngasuh kerani raja, Sapan anak Asaliah, uchu Mesulam, mansang ngagai Rumah Sembiang. Ku iya,

⁴“Alai nuan mansang ngagai Imam Besai Hilkiah, lalu tanyaka penyampau duit ti udah dipupu bala imam ke bekereja ba mua pintu Rumah Sembiang, ari orang mayuh.

⁵Asuh iya meri duit nya ngagai orang ke nyadi tuai ngaduka Rumah Sembiang. Sida enda tau enda ngaji

⁶bala tukang kayu, orang ke ngaga rumah, enggau bala tukang batu, sereta meli ramu enggau batu kena ngaduka Rumah Sembiang.

⁷ Orang ke nyadi tuai ngereja pengawa nya enda tau enda orang ke tau dikarapka, ngambika sida enda ibuh madahka chara sida ngena duit nya.”

⁸Sapan lalu mai atur raja ngagai Hilkiah. Hilkiah lalu madahka diri udah tetemuka Bup Adat dalam Rumah Sembiang, lalu meri bup nya ngagai Sapan. Sapan lalu macha bup nya.

⁹Udah nya iya lalu pulai ngagai raja, lalu madahka ngagai raja, “Bala orang gaji nuan udah ngambi duit ti dalam Rumah Sembiang, lalu udah nyuaka duit nya ngagai orang ke nyadi tuai ngaduka Rumah Sembiang.”

¹⁰Lalu ku iya bejaku, “Aku bisi siti bup ditu ti udah diberi Hilkiah ngagai aku.” Iya lalu macha bup nya enggau nyawa ti inggar di mua raja.

¹¹Lebuh raja ninga bup nya dibacha, ati iya tusah, lalu iya nyarikka gari diri.

¹²Iya lalu meri atur ngagai Imam Hilkiah, Ahikam anak Sapan, Akbor anak Mikaiah, Sapan ti nyadi kerani raja, enggau ngagai Asaiah, ti nyadi penyaup raja,

¹³“Alai kita mupuk lalu betanya ngagai TUHAN ngarika aku, enggau ngarika semua orang Judah pasal ajar ti dalam bup tu. TUHAN ringat ngagai kitai laban aki ini kitai nadai udah ngereja utai ti patut dikereja nitihka bup tu.”

¹⁴Hilkiah, Ahikam, Akbor, Sapan enggau Asaiah lalu mansang betanya ngagai indu siku ke benama Huldah, iya nya siku nabi ti diau ba kandang nengeri Jerusalem ti baru apin lama udah tembu. (Laki iya Salum anak Tikbah, uchu Haras. Lalu iya tu nyadi tuai ngemataka baju panjai dalam Rumah Sembiang.) Sida madahka ngagai iya gaya utai ti udah nyadi.

¹⁵Huldah lalu ngasuh sida pulai ngagai raja, lalu meri ngagai iya

¹⁶pesan TUHAN, munyi tu, “Aku deka ngukum Jerusalem, enggau semua orang ke diau di nengeri nya, munyi ti udah ditulis dalam bup ti udah dibacha raja.

¹⁷Sida udah nulak Aku, lalu udah ngenjuk piring ngagai petara bukai, lalu semua utai ti udah dikereja sida udah ngeringatka ati Aku. Aku ringat ngagai Jerusalem, lalu pengeringat aku enda nemu padam.

¹⁸Nyadi pasal raja nya empu, tu utai ti disebut Aku, TUHAN Allah Taala ke disembah orang Israel: Nuan udah mendingka utai ti ditulis dalam bup nya,

¹⁹lalu nuan udah nesal ati, lalu udah ngemaruhka diri di mua Aku, nyarikka gari nuan, sereta nyabak, lebuh nuan udah ninga aku madahka Diri deka ngukum Jerusalem enggau orang ke diau dalam nengeri nya. Aku deka balat ngukum nengeri nya, lalu nama nengeri nya deka nyadika leka jaku sumpah.[30] Tang Aku udah ninga sampi nuan,

²⁰lalu ukum ti deka diasuh Aku ninggang Jerusalem enda nyadi sebedau nuan mati. Aku deka ngasuh nuan mati enggau selamat.” Bala sida lalu pulai mai pesan nya ngagai Raja Josiah.