Read Iban 2 Raja 24 Bible Online

2 Raja 24 - Iban bible

2 Raja 24

¹ Lebuh Jehoiakim nyadi raja, Raja Nebukadnesar menua Babilon nyerang menua Judah. Jehoiakim nunduk ngagai Raja Nebukadnesar tiga taun. Udah nya iya angkat ngelaban Nebukadnesar.

²TUHAN ngasuh bala soldadu orang Babilon, orang Siria, orang Moap enggau orang Amon ngelaban Jehoiakim ngambika sida ngerusak menua Judah, munyi ti udah disebut TUHAN ngena bala nabi Iya.

³Utai tu nyadi nitihka pesan TUHAN, kena Iya muai orang Judah ari menua nya, ketegal semua dosa ti udah dikereja Raja Manasi,

⁴kelebih agi laban iya udah munuh mayuh amat orang ke nadai penyalah. TUHAN enggai ngampun iya ketegal penyalah nya.

⁵Semua utai ti udah dikereja Jehoiakim bisi dituliska magang dalam Jerita Lama Pasal Raja Menua Judah.

⁶Jehoiakim mati, lalu anak iya Jehoiakin nganti iya nyadi raja.

⁷Raja menua Ejip enggau bala soldadu iya nadai agi nyerang, laban raja menua Babilon diatu merintah semua menua ti udah dipegai menua Ejip, berengkah ari Sungai Eupratis nyentuk ngagai garis entara menua di utara menua Ejip.

⁸Umur Jehoiakin lapan belas taun lebuh iya nyadi raja menua Judah, lalu iya merintah di Jerusalem tiga bulan. Indai iya Nehusta anak Elnatan ari Jerusalem.

⁹Jehoiakin bedosa ngelaban TUHAN baka apai iya empu.

¹⁰Lebuh iya megai perintah, bala soldadu orang Babilon, diuluka bala pemesai Raja Nebukadnesar, datai nyerang Jerusalem lalu ngelulung nengeri nya.

¹¹Lebuh bala soldadu nya ngelulung nengeri nya, Nebukadnesar empu datai di Jerusalem.

¹² Raja Jehoiakin, enggau indai iya, anak iya, bala pemesai iya, enggau bala pemesai ke ngemataka istana, nunduk magang ngagai bala soldadu orang Babilon. Nebukadnesar nangkap Jehoiakin dalam taun ti kelapan Nebukadnesar nyadi raja.

¹³Iya lalu nabanka semua pengaya ari Rumah Sembiang, enggau ari istana, ngagai menua Babilon. Munyi ti udah dipadahka TUHAN sebedau utai nya nyadi, Nebukadnesar mechahka semua pekekas ti digaga ari emas ti udah digaga Raja Solomon ke Rumah Sembiang.

¹⁴Nebukadnesar nabanka sepuluh ribu iku orang ari Jerusalem, nyengkaum semua orang ke tinggi pangkat, nyadi orang tangkap. Iya mega muai ari menua nya semua orang ke landik bekereja, nyengkaum tukang besi. Semina orang ke pemadu seranta aja ditinggalka iya di menua Judah.

¹⁵ Nebukadnesar mai Jehoiakin nyadi orang tangkap ngagai menua Babilon, sama enggau indai Jehoiakin, bala bini iya, bala pemesai iya, enggau orang ke tinggi pangkat di menua Judah.

¹⁶Nebukadnesar muai ari menua nya ngagai menua Babilon tujuh ribu iku orang ke tinggi pangkat, seribu iku orang ke landik bekereja, nyengkaum semua tukang besi. Semua sida nya orang ke bepengerai lalu tau nyadi soldadu magang.

¹⁷ Nebukadnesar ngasuh aya Jehoiakin ke benama Mataniah nyadi raja menua Judah, lalu iya mindahka nama Mataniah ngagai Sedekiah.

¹⁸ Umur Sedekiah dua puluh satu taun lebuh iya nyadi raja menua Judah, lalu iya merintah di Jerusalem sebelas taun. Indai iya Hamutal anak Jeremiah ari nengeri Libnah.

¹⁹Raja Sedekiah bedosa ngelaban TUHAN, baka Raja Jehoiakin.

²⁰ TUHAN balat amat ringat ngagai orang di Jerusalem enggau ngagai orang di menua Judah, datai ke Iya nyau muai sida ari menua nya.