Read Iban 2 Raja 25 Bible Online

2 Raja 25 - Iban bible

2 Raja 25

¹ Sedekiah angkat ngelaban Raja Nebukadnesar menua Babilon. Nebukadnesar lalu datai enggau bala soldadu iya, lalu nyerang Jerusalem kena sepuluh hari bulan ti kesepuluh dalam taun ti kesemilan Sedekiah megai perintah. Orang Babilon nirika kem sida ari luar nengeri nya, ngaga kuta kena ngelulung nengeri nya,

²lalu ngelulung nengeri nya datai ke taun ti kesebelas Sedekiah nyadi raja.

³Kena semilan hari bulan ti keempat taun nya, lebuh orang balat amat keberuran laban sida nyau nadai agi utai diempa,

⁴dinding kuta nengeri nya lalu ulih kebus laban munsuh. Tang taja pen orang Babilon ngelulung nengeri nya, semua bala soldadu orang Judah ulih ngerarika diri magang malam nya. Sida rari nengah kebun raja, bejalai nengah pintu ti ba entara dua iti dinding kuta, lalu rari tunga ngagai Lebak Jordan.

⁵Tang bala soldadu orang Babilon begagaika Raja Sedekiah, lalu nangkap iya ba emperan semak Jeriko. Semua bala soldadu iya lalu ninggalka iya.

⁶Sedekiah lalu dibai ngagai Raja Nebukadnesar ba nengeri Riblah. Dia Nebukadnesar lalu ngeletak iya diukum.

⁷ Bala anak lelaki Sedekiah lalu dibunuh di mua Sedekiah empu. Udah nya Nebukadnesar lalu ngasuh orang ngeruk leka mata Sedekiah, nanchang iya ngena rantai, lalu mai iya ngagai menua Babilon.

⁸Kena tujuh hari bulan ti kelima dalam taun ti kesemilan belas Raja Nebukadnesar udah merintah menua Babilon, Nebusaradan, ti nyadi penyanding penemu raja sereta nyadi tuai soldadu, tama ngagai nengeri Jerusalem.

⁹ Iya nunu Rumah Sembiang, istana enggau rumah semua orang ke tinggi pangkat di Jerusalem

¹⁰lalu bala soldadu iya ngeruntuhka dinding kuta nengeri nya.

¹¹Udah nya Nebukadnesar lalu nabanka orang ke agi tinggal di nengeri nya ngagai menua Babilon. Iya mega nabanka bala orang ke landik gawa, ti agi tinggal, enggau orang ke udah ngerarika diri lalu ngalih ari bala soldadu orang Babilon.

¹²Tang iya ninggalka orang ke pemadu seranta di menua Judah, orang ke nadai reta tengkira, lalu ngasuh sida bekereja dalam kebun anggur, enggau ba umai.

¹³ Orang Babilon lalu mechahka tiang temaga, enggau kerita surung ti dalam Rumah Sembiang, sama enggau tangki temaga siti ti besai, lalu nabanka semua temaga nya ngagai menua Babilon.

¹⁴ Sida mega nabanka pengauk enggau sarang amau ti dikena nuchi alta, pekekas ti dikena nungkun lampu, mangkuk ti dikena nimbun darah ari piring, mangkuk alai nunu menyan, enggau semua pekekas bukai ti digaga ari temaga ti dikena ngereja pengawa dalam Rumah Sembiang.

¹⁵Sida nabanka semua utai ti digaga ari emas tauka pirak, nyengkaum mangkuk ti mit enggau talam kena mai bara api.

¹⁶Utai ti digaga Solomon ari temaga ke Rumah Sembiang, iya nya dua batang tiang, kerita surung, enggau tangki ti besai, nya kelalu besai ditimbang.

¹⁷Tiang ti dua batang nya sebaka tukuh. Peninggi siti-siti tiang nya 8 meter, lalu puchuk iya disangkum ngena temaga. Peninggi siti-siti sangkum nya 1.3 meter. Siti-siti sangkum nya dibelit ngena ukir buah delima ti digaga ari temaga.

¹⁸Nambahka nya, Nebusaradan, pemesai ti nyadi tuai soldadu, mai Imam Besai Seraiah, imam ke lumur dua nangkanka Sepaniah, enggau tiga iku agi pemesai ari Rumah Sembiang.

¹⁹Iya ngambi ari nengeri nya siku pemesai soldadu ti udah nyadi tuai soldadu, lima iku penyanding penemu raja ti agi di nengeri nya, penulung tuai soldadu ke nyimpan cherita pasal pengawa soldadu, enggau enam puluh iku orang bukai ti tinggi pangkat.

²⁰Nebusaradan mai sida ngagai raja menua Babilon ti agi benung di Riblah

²¹di menua Hamat. Raja nya lalu ngasuh sida dipalu lalu dibunuh. Nya alai orang Judah dibuai ari menua sida lalu ditabanka ngagai menua Babilon.

²² Raja Nebukadnesar menua Babilon ngeletak Gedaliah anak Ahikam, uchu Sapan, nyadi tuan gabenor menua Judah, lalu ngasuh iya nyadi tuai ke semua orang ke enda ditabanka ngagai menua Babilon.

²³Lebuh bala pemesai soldadu, enggau soldadu orang Judah ti enda nunduk ninga pasal nya, sida lalu mansang ngagai Gedaliah di Mispah. Bala pemesai nya nyengkaum Ismail anak Netaniah, Johanan anak Kareah, Seraiah anak Tanhumet ari nengeri Netopah, enggau Jesaniah ari Maakah.

²⁴Ku Gedaliah bejaku enggau sida, “Aku madahka ngagai kita, kita enda tau takutka bala pemesai orang Babilon. Diau mendam di menua tu, bekereja ke raja menua Babilon. Nya baru kita enda kena laban penusah.”

²⁵ Tang dalam bulan ti kesebelas taun nya, Ismail anak Netaniah, uchu Elisama, siku raban ari ruang bilik raja, mai sepuluh iku orang mansang ngagai Mispah, ngamuk Gedaliah, lalu munuh iya. Iya mega munuh orang Israel enggau orang Babilon ke bisi dia enggau Gedaliah.

²⁶ Udah nya semua orang Israel, ke kaya enggau ke seranta, enggau bala pemesai soldadu, angkat lalu mansang ngagai menua Ejip, laban sida takutka orang Babilon.

²⁷Dalam taun Ebilmerodak nyadi raja menua Babilon, iya ngelepaska Raja Jehoiakin menua Judah ari rumah jil, kena iya ngayanka penelap iya ngagai raja Jehoiakin. Utai tu nyadi kena dua puluh tujuh hari bulan ti kedua belas, tiga puluh tujuh taun udah bekau Jehoiakin ditabanka nyadi orang tangkap.

²⁸Ebilmerodak nelap enggau iya, lalu masa iya lebih agi ari iya ke masa raja bukai ti udah dibuai enggau iya ngagai menua Babilon.

²⁹Nya alai Jehoiakin dikemendarka nukar gari ti dikena iya dalam rumah jil ngagai gari iya empu, lalu makai enggau raja sepemanjai umur iya.

³⁰Genap hari, sekumbang iya ti agi idup, iya diberi elaun kena iya meli utai ti dipeguna iya.