Read Iban 2 Raja 3 Bible Online

2 Raja 3 - Iban bible

2 Raja 3

¹Dalam taun ti kelapan belas Raja Jehosapat merintah menua Judah, Joram anak Ahap berengkah nyadi raja menua Israel, lalu iya merintah di Samaria dua belas taun.

²Iya bedosa ngelaban TUHAN, tang iya kurang agi jai ari apai iya, tauka indai iya Jesebel, laban iya muai tiang Baal ti udah digaga apai iya.

³Tang taja pia, baka Raja Jeroboam anak Nebat ke dulu ari iya, iya enggai badu nguluka orang Israel bedosa.

⁴Raja Mesa menua Moap bisi nupi jelu bedus, lalu tiap taun iya meri seratus ribu iku anak domba, enggau bulu bedus, kena iya mayar chukai ngagai raja menua Israel.

⁵Tang lebuh Raja Ahap menua Israel mati, Mesa angkat ngelaban Israel.

⁶Raja Joram lalu tekala nya angkat ari Samaria, lalu ngempuruka semua soldadu iya.

⁷Iya ngirumka pesan ngagai Raja Jehosapat menua Judah, munyi tu: “Raja menua Moap udah angkat ngelaban aku. Kati nuan deka enggau aku beperang ngelaban iya?” “Ka,” ku Raja Jehosapat nyaut. “Aku, bala aku enggau kuda aku deka mansang enggau nuan.

⁸Ni jalai ti deka ditengah kitai mansang nyerang iya?” “Kitai deka bejalai nengah jalai ti melit, nengah menua puang Edom,” ku Joram nyaut.

⁹Nya alai raja menua Israel, raja menua Judah enggau raja menua Edom lalu mupuk. Lebuh sida udah bejalai tujuh hari, sida suntuk ai. Sida nadai agi ai ke bala sida empu enggau ke jelu ti mai keresa sida.

¹⁰“Mati kitai tu!” ku Raja Joram bejaku enggau nyawa ti inggar. “TUHAN udah nyerahka kitai tiga ngagai raja menua Moap!”

¹¹Raja Jehosapat lalu nanya, “Kati bisi nabi ti tau diasuh kitai betanya ngagai TUHAN ditu?” Siku pemesai ari bala soldadu Raja Joram lalu nyaut, “Elisa anak Sapat bisi ditu. Iya udah bekereja nyadi penulung Elijah.”

¹²“Iya endang amat nabi,” ku Raja Jehosapat bejaku. Nya alai raja tiga iku nya lalu mansang ngagai Elisa.

¹³“Nama kebuah aku enda tau enda nyaup nuan?” ku Elisa bejaku enggau raja menua Israel. “Alai nuan betanya ngagai bala nabi ti udah alai apai enggau indai nuan betanya menya.” “Ukai baka nya!” ku Joram nyaut. “TUHAN udah nyerahka kami tiga ngagai Raja menua Moap.”

¹⁴Elisa lalu nyaut, “Dalam nama TUHAN ti idup, ke dipetuaika aku, aku besumpah enggai nyaup nuan, enti enda ketegal aku bebasaka Raja Jehosapat menua Judah ke setanah enggau nuan.

¹⁵Ambi diatu siku orang ke nemu nebah musik.” Lebuh orang nya benung nebah belikan iya, kuasa TUHAN lalu datai ba Elisa,

¹⁶lalu ku iya bejaku, “Tu utai ti disebut TUHAN: ‘Keruang parit di serata buntut sungai ti rangkai tu.

¹⁷Taja pen kita nadai meda ujan tauka ribut, buntut sungai tu deka penuh laban ai, lalu kita, enggau jelu tupi kita, enggau jelu ti dikena kita mai keresa kita, deka mayuh ai irup.’ ”

¹⁸Lalu ku Elisa nampung jaku iya, “Utai tu mudah dikereja TUHAN, lalu Iya deka mega ngasuh kita menang ngelaban orang Moap.

¹⁹Kita deka ngalahka semua nengeri sida ke manah, ti bekuta. Kita deka nebang semua kayu buah sida, nutup semua mata ai sida, lalu ngelamun semua tanah umai sida ke ami ngena batu, kena ngerusak tanah umai nya.”

²⁰Pagi hari siti, lebuh maya ngenjuk piring, ai lalu rarat datai ari Edom, lalu ngampuhka tanah.

²¹Lebuh orang Moap ninga raja tiga iku nya udah datai deka nyerang sida, semua orang lelaki ke ulih ngena senyata, kenyau ari orang ke pemadu tuai ngagai orang ke pemadu biak, dikangauka magang, lalu diasuh nyaga garis entara menua.

²²Lebuh sida dani pagi hari siti, sida meda mata hari manchar ngagai ai nya, lalu ngasuh ai nya mirah baka darah.

²³Orang Moap lalu manjung, “Darah! Bala munsuh tentu udah belaban lalu bebunuhka pangan diri! Aram kitai ngerampas utai ari kem sida!”

²⁴Tang lebuh orang Moap datai ba kem orang Israel, orang Israel angkat lalu nyerang sida. Orang Moap lalu nyurutka diri. Orang Israel majak begagai lalu bebunuhka sida, [4]

²⁵sereta ngerusak nengeri sida. Lebuh orang Israel mansa tanah umai ti ami, genap iku sida bela nikauka sigi batu ngagai tanah umai nya, datai ke semua tanah umai nya nyau abis dilamun batu. Orang Israel mega ngalitka semua mata ai, lalu nebang kayu buah. Ba pengujung iya, semina indu nengeri Kir-heseret aja [5] agi tinggal. Orang ke landik nimbakka batu ngena pangwang ngelulung lalu nyerang nengeri nya.

²⁶Lebuh raja menua Moap nemu diri alah, iya lalu mai tujuh ratus iku soldadu ti landik belaban ngena pedang, nguji ngerarika diri ngerenchah bala soldadu orang Edom, tang iya enda ulih.

²⁷Iya lalu mai anak tuai iya ke dipaduka nganti iya nyadi raja, lalu nyerahka iya ba atas dinding kuta nengeri nya, nyadika piring ngagai petara orang Moap. Orang Israel balat amat takut, lalu nyurutka diri ari nengeri nya, lalu pulai ngagai menua sida empu.