Read Iban 2 Raja 5 Bible Online

2 Raja 5 - Iban bible

2 Raja 5

¹ Nyadi Naaman nya kepala soldadu orang Siria. Iya balat dibasa sereta dipuji raja menua Siria, laban TUHAN udah ngasuh bala soldadu orang Siria ke diuluka Naaman menang. Naaman nya orang ke berani, tang iya ngidapka penyakit kulit ti balat diketakutka.

²Nyadi sekali, lebuh sida nyerang menua Israel, bala soldadu orang Siria bisi nabanka siku indu dara orang Israel, ke lalu nyadi ulun bini Naaman.

³Nyadi sekali indu nya nyebut ngagai bini Naaman, “Naka meh pemanah enti sema tuan aku betemu enggau siku nabi ti diau di Samaria! Iya tentu deka ngeraika tuan ari penyakit iya.”

⁴Lebuh Naaman ninga nya, iya lalu betemu enggau raja, lalu madahka pasal utai ti udah disebut indu dara nya.

⁵Ku raja nya bejaku, “Mupuk meh nuan ngagai raja orang Israel, lalu bai surat tu ngagai iya.” Naaman lalu mupuk, mai tiga puluh ribu singkap duit pirak, enam ribu singkap duit emas, enggau sepuluh lambar gari ti manah.

⁶Baka tu ku utai ti disebut dalam surat ti dibai iya, “Nama orang ke mai surat tu nya Naaman. Iya tu pemesai aku. Aku minta nuan ngeraika iya ari penyakit iya.”

⁷Lebuh raja menua Israel macha surat nya, iya lalu nyarikka gari diri lalu bejaku, ku iya, “Kati iya ngumbai aku Allah Taala ti bekuasa atas seput enggau pemati, alai iya ngasuh aku ngeraika orang tu? Iya tu nguji mai aku belaya!”

⁸Lebuh nabi Elisa ninga pasal nya, iya lalu ngirumka pesan ngagai raja, “Nama kebuah nuan tusah ati? Asuh orang nya betemu enggau aku, ngambika iya nemu menua Israel bisi nabi!”

⁹Naaman mansang ngena kuda enggau kerita perang iya, lalu ngetu ba mua pintu Elisa.

¹⁰Elisa lalu ngasuh orang gaji iya ngasuh Naaman masu diri tujuh kali di Sungai Jordan, lalu iya deka gerai ari penyakit iya.

¹¹Tang Naaman angkat ari nya ringat. Ku iya, “Aku ngumbai iya deka pansut lalu betemu enggau aku, besampi ngagai TUHAN Allah Taala iya, ngepaika jari iya atas endur ti kena laban penyakit, [7] lalu ngeraika aku!

¹²Sungai Abana enggau Sungai Parpar di Damaskus lebih manah agi ari sungai di menua Israel. Nama kebuah aku enda tau masu diri dalam sungai nya, lalu gerai?”

¹³Bala orang gaji Naaman mansang ngagai iya, lalu bejaku, “Tuan, enti nabi nya ngasuh nuan ngereja utai ti mar, nuan tentu deka ngereja utai nya. Nya alai, nama kebuah nuan enda masu diri, munyi ti diasuh iya, ngambika nuan gerai?”

¹⁴Naaman lalu nurun ngagai Sungai Jordan, nyelam ba sungai nya tujuh kali, nitihka asuh Elisa. Iya lalu gerai. Isi iya nyau sentar sereta bepengerai, baka isi anak mit.

¹⁵Iya enggau semua bala iya lalu pulai ngagai Elisa, lalu ku iya bejaku enggau Elisa, “Diatu baru aku nemu, kitai nadai petara bukai tang semina Allah Taala ke disembah orang Israel siku aja. Nya alai aku minta nuan, tuan, nyambut pemeri tu ari aku.”

¹⁶Disaut Elisa, “Aku besumpah dalam nama TUHAN ti idup, ke dipetuaika aku, aku enggai nyambut pemeri.” Naaman majak ngasuh Elisa nyambut pemeri nya, tang Elisa enggai.

¹⁷Nya alai, ku Naaman bejaku, “Enti nuan enggai nyambut pemeri tu, awakka aku ga mai tanah ari tu ngagai menua aku ngena dua iku keledai aku, [8] laban belabuh ari diatu, aku enggai agi ngenjuk piring tauka piring tunu ngagai petara bukai, tang semina ngagai TUHAN siku aja.

¹⁸Nya alai, aku ngarapka TUHAN deka ngampun aku, lebuh aku nyempulang raja aku ngagai rumah sembiang Rimon, petara menua Siria, lalu nyembah TUHAN dia. TUHAN tentu deka ngampun aku!”

¹⁹Lalu ku Elisa bejaku, “Mupuk meh nuan enggau selamat.” Naaman lalu mupuk. Lebuh iya baru apin lama udah ngejangka endur nya,

²⁰orang gaji Elisa, Gehasi, lalu berunding, “Tuan aku udah nejuka Naaman mupuk nadai mayar utai! Iya patut nyambut utai ti diberi orang Siria nya. Dalam nama TUHAN ti idup, aku deka belanda nitihka orang nya, lalu ngambi utai ari iya.”

²¹Gehasi lalu nitihka Naaman. Lebuh Naaman meda siku orang belanda nitihka iya, iya lalu nurun ari kerita perang iya, deka betemu enggau orang nya. Iya lalu nanya, “Bisi utai salah?”

²²“Nadai,” ku Gehasi nyaut. “Tang tuan aku udah ngasuh aku madahka ngagai nuan, baru apin lama tu tadi, dua iku nabi ari menua ti bebukit di menua Epraim, bisi datai. Iya minta nuan meri ngagai seduai nya tiga ribu singkap duit pirak, enggau dua lambar gari.”

²³“Bai aja enam ribu singkap duit pirak,” ku Naaman nyaut. Iya majak ngasuh Gehasi nerima utai nya. Iya lalu nyimpan duit pirak nya dalam dua iti kambut, nanchang kambut nya, meri kambut nya enggau dua lambar gari ti manah nya ngagai dua iku ari bala orang gaji iya, lalu ngasuh seduai nya bejalai dulu ari Gehasi.

²⁴Lebuh sida datai ba bukit ti alai Elisa diau, Gehasi lalu ngambi dua iti kambut nya lalu tama ngagai rumah. Udah nya iya lalu ngasuh orang gaji Naaman ke dua iku nya pulai.

²⁵Iya lalu tama baru. Elisa lalu nanya iya, “Kini ke nuan tadi?” “Nadai aku mindah tadi, tuan,” ku iya nyaut.

²⁶Tang ku Elisa, “Kati aku nadai dia dalam roh, lebuh orang nya nurun ari kerita perang iya lalu betemu enggau nuan? Tu ukai maya nyambut duit tauka gari, kebun buah kana, tauka kebun anggur, jelu bedus tauka jelu sapi, tauka orang gaji!

²⁷Diatu penyakit Naaman nya deka lekat ba nuan, lalu nuan enggau peturun nuan deka diempa penyakit nya belama iya!” Lebuh Gehasi mupuk, penyakit nya endang udah lekat ba iya. Kulit iya burak baka seleju.