Read Iban 2 Raja 6 Bible Online

2 Raja 6 - Iban bible

2 Raja 6

¹Nyadi sekali bala nabi ke diajar Elisa, mutap ngagai iya, “Endur alai kami diau tu kelalu sekut.

²Kami minta nuan ngemendarka kami mupuk ngagai Sungai Jordan lalu beramu, ngambika kami ulih ngaga endur alai kami diau.” “Mupuk meh kita,” ku Elisa nyaut.

³Siku ari bala sida lalu minta Elisa bejalai enggau sida. Elisa besetuju,

⁴lalu sida sama mupuk. Lebuh sida datai ba Sungai Jordan, sida lalu belabuh gawa.

⁵Lebuh siku ari bala sida benung nebang kayu, mata kapak iya ngelechut lalu labuh ke dalam ai. “Kati ku aku enggau nya, tuan?” ku iya ngangau ngagai Elisa. “Kapak nya ulih aku nginjau ari orang!”

⁶“Ba ni alai mata kapak nya labuh?” ku Elisa nanya. Orang nya lalu nunjukka endur nya ngagai iya. Elisa lalu netak kayu siti, lalu nikauka kayu nya ngagai ai nya. Mata kapak nya lalu melepung.

⁷“Ambi mata kapak nya,” ku Elisa bejaku ngagai orang nya. Orang nya nyapai, lalu ngambi mata kapak nya.

⁸Lebuh raja menua Siria benung beperang ngelaban menua Israel, iya betanya ngagai bala pemesai iya, lalu milih siti endur alai iya deka nirika kem.

⁹Tang Elisa ngirumka pesan ngagai raja menua Israel, meri jaku tangkan ngagai iya, enda nyagi iya mansang semak ngagai endur nya, laban bala soldadu orang Siria udah ngeramka ipa ba endur nya.

¹⁰Raja menua Israel lalu meri jaku tangkan ngagai orang ke diau ba endur nya. Bala orang nya lalu bejaga. Utai tu nyadi dua tiga kali.

¹¹Raja menua Siria tusah amat ati laban nya. Iya lalu ngangauka bala pemesai iya, lalu nanya sida, “Sapa ari bala kita setanah enggau raja menua Israel?”

¹²Siku ari bala sida lalu nyaut, “Nadai, Tuan Raja. Nabi Elisa ke madahka ngagai raja menua Israel pasal utai ti disebut nuan dalam bilik nuan empu.”

¹³“Giga dini alai iya,” ku raja nya bejaku enggau sida, “ngambika aku nangkap iya.” Lebuh orang madahka Elisa bisi di Dotan,

¹⁴raja menua Siria nya lalu ngasuh bala soldadu mansang ngagai nengeri nya ngena kuda enggau kerita perang. Sida datai dia lebuh malam hari, lalu ngelulung nengeri nya.

¹⁵Tumu pagi hari siti, orang gaji Elisa dani, pansut ari rumah, lalu tepedaka bala soldadu orang Siria nepan kuda enggau kerita perang ngelulung nengeri nya. Iya lalu pulai ke rumah ngagai Elisa, lalu ku iya bejaku enggau Elisa, “Nadai penyadi kitai tu, tuan! Nama utai ti patut dikereja kitai?”

¹⁶“Anang takut,” ku Elisa nyaut. “Bala kitai mayuh agi ari bala sida.”

¹⁷Udah nya iya lalu besampi, “O TUHAN, buka mata iya, lalu asuh iya meda!” TUHAN lalu nyaut sampi iya. Orang gaji Elisa engkadah, lalu meda tisi bukit nya nyau penuh laban kuda enggau kerita perang ti beapi-api, ngelingi Elisa.

¹⁸Lebuh bala soldadu orang Siria nyerang, Elisa lalu besampi, “O TUHAN, asuh bala orang nya buta!” TUHAN lalu nyaut sampi iya, lalu ngasuh bala soldadu orang Siria buta.

¹⁹Udah nya Elisa lalu mansang ngagai sida, lalu ku iya bejaku enggau sida, “Salah jalai kita tu. Tu ukai nengeri ti digagai kita. Titihka aku. Awakka aku nguluka kita ngagai orang ke digiga kita.” Iya lalu nguluka sida ngagai nengeri Samaria.

²⁰Lebuh bala soldadu orang Siria udah tama ngagai nengeri Samaria, Elisa lalu besampi, “Buka mata sida, TUHAN, lalu awakka sida ulih meda.” TUHAN lalu nyaut sampi iya, lalu ngasuh sida ulih meda baru. Nya baru sida nemu diri di nengeri Samaria.

²¹Lebuh raja menua Israel meda bala soldadu orang Siria, iya lalu nanya Elisa, “Kati tau aku munuh sida, tuan? Tau aku munuh sida?”

²²“Anang,” ku Elisa nyaut. “Soldadu ti udah ditangkap nuan lebuh kita betempuh pen enda meh tau dibunuh nuan. Beri sida makai ngirup, lalu asuh sida pulai ngagai raja sida empu.”

²³Raja menua Israel lalu nyendiaka pengerami makai besai ke sida. Lebuh sida udah makai, lalu udah mabuk, iya ngasuh sida pulai ngagai raja menua Siria. Kenyau ari nya, bala soldadu orang Siria badu agi nyerang menua Israel.

²⁴Nyau kelama udah bekau nya, Raja Benhadat menua Siria nguluka bala iya ngelaban menua Israel, lalu ngelulung nengeri Samaria.

²⁵Nengeri nya lalu balat amat suntuk pemakai, datai ke pala keledai sigi nyau dijual ngena rega lapan puluh singkap duit pirak, lalu rega sesuku kilogram tai burung achang nyau bulih lima singkap duit pirak.

²⁶Lebuh raja menua Israel benung bejalai ba puchuk dinding kuta nengeri nya, siku indu lalu ngangau, “Tulung aku, Tuan Raja!”

²⁷Raja lalu nyaut, “Enti TUHAN enggai nyaup nuan, baka ni ku aku ulih nyaup nuan? Aku nadai gandum, nadai wain.

²⁸Nama penusah nuan?” Indu nya lalu nyaut, “Suba indu tu mai aku makai anak aku, lalu hari siti makai anak iya.

²⁹ Kami duai lalu manduk anak aku, lalu makai iya. Hari siti, aku mai iya makai anak iya, tang iya udah ngelalaika anak iya nya!”

³⁰Lebuh raja ninga nya, iya lalu nyarikka gari diri, lalu orang ke diau semak kuta nya meda iya ngena kain guni, dibap gari iya empu.

³¹Ku raja nya bejaku, “Awakka Allah Taala munuh aku enti Elisa enda dipumpung pala sebedau malam tu!”

³²Iya lalu ngasuh siku seruan ngambi Elisa. Ba urung maya nya Elisa bisi di rumah, sama enggau bala tuai ke datai nemuai ngagai iya. Sebedau seruan raja nya datai, Elisa endang udah bejaku enggau bala tuai nya, ku iya, “Pemunuh nya ngasuh siku orang datai munuh aku! Lebuh iya datai ditu lagi, tutup pintu, lalu anang nyagi iya tama. Raja empu deka datai ari belakang iya.”

³³Lebuh Elisa agi benung nyebut jaku nya, raja [9] pen datai, lalu bejaku, “TUHAN Empu ti udah ngasuh penusah tu ninggang kitai! Nya alai nama kebuah aku nganti Iya nulung kitai.”