Read Iban 2 Raja 7 Bible Online

2 Raja 7 - Iban bible

2 Raja 7

¹Tang ku Elisa nyaut, “Pendingka utai ti disebut TUHAN! Ba urung maya tu pagila, kita di Samaria ulih meli empat kilogram setengah gandum ti pemadu alus tauka semilan kilogram barli, ngena sesingkap pirak aja.”

²Ku pemesai ke ngiring raja nya bejaku enggau Elisa, “Nadai utai baka nya ulih nyadi. Enti sema TUHAN Empu meri gandum nya [10] diatu, enda meh utai nya ulih nyadi!” Disaut Elisa, “Nuan empu deka meda utai nya nyadi, tang nuan enda makai pemakai nya.”

³Nyadi di luar pintu nengeri Samaria bisi empat iku orang ke ngidapka penyakit kulit ti tau ngerampit. Ku sida empat nya bejaku enggau pangan diri, “Nama kebuah kitai diau ditu nganti diri mati?

⁴Nadai guna kitai tama ngagai nengeri, laban din kitai deka mati keberuran. Tang enti kitai diau ditu, kita deka mega mati. Aram kitai bejalai ngagai kem orang Siria. Pengabis jai utai ti deka dikereja sida ngagai kitai nya munuh kitai. Tang nyangka ukur sida enggai munuh kitai.”

⁵Nya alai, lebuh hari nyau deka malam, sida empat lalu mansang ngagai kem orang Siria. Tang lebuh sida datai ba kem nya, sida nadai nemu orang dia,

⁶laban TUHAN udah ngasuh bala orang Siria ninga munyi auh bala soldadu ti ngena kuda enggau kerita perang datai, lalu sida ngumbai raja menua Israel udah ngaji raja orang Iti enggau orang Ejip, enggau bala soldadu sida, nyerang sida.

⁷Nya alai lemai nya bala soldadu orang Siria rari, ninggalka langkau kain, kuda, enggau keledai sida.

⁸Lebuh orang empat iku nya datai ba tisi kem nya, sida lalu tama ngagai langkau kain siti, makai sereta ngirup utai dia, ngambi pirak, emas, enggau gari ti ditemu sida, angkat ari endur nya lalu ngelalaika utai nya. Udah nya sida pulai kia baru, tama ngagai sebuah langkau kain ti bukai, lalu ngereja baka nya baru.

⁹Tang udah nya sida lalu bejaku, “Kitai enda patut ngereja tu! Kitai bisi berita ti manah, lalu kitai patut madahka berita tu ngagai orang bukai. Enti kitai nganti ngagai pagila baru madahka berita tu, kitai tetap deka kena ukum. Aram kitai madahka ngagai bala pemesai raja!”

¹⁰Sida lalu ninggalka kem orang Siria nya, pulai ngagai nengeri Samaria, lalu ngangauka jejaga ke ba pintu nengeri nya, “Kami udah ngagai kem orang Siria, tang kami nadai meda tauka ninga orang dia. Kuda enggau keledai sida agi mengkang ditanchang, lalu langkau kain ditinggalka sida pia aja.”

¹¹Bala jejaga lalu madahka berita nya, lalu berita nya dipadahka ngagai istana.

¹²Lebuh maya nya, hari endang agi malam, tang raja angkat ari peninduk iya, lalu bejaku enggau bala pemesai iya, “Dinga kita! Tu endang pelan orang Siria! Sida nemu kitai keberuran, nya alai sida diatu udah ninggalka kem sida, lalu belalai di menua pesisir. Sida ngumbai kitai deka pansut ari nengeri tu begigaka pemakai. Udah nya baru sida nangkap kitai idup-idup, lalu ngalahka nengeri tu.”

¹³Siku ari bala pemesai iya lalu bejaku, “Orang di nengeri tu endang nadai penyadi agi, baka sida ke udah mati nya. Nya alai manah kitai ngasuh sekeda orang mupuk ngena lima iku kuda ti agi ba jari kitai, ngambika sida mansik pekara nya.” [11]

¹⁴Sida lalu milih orang, lalu raja ngasuh sida mupuk ngena dua buah kerita perang ngambika sida mansik utai ti udah nyadi ba bala soldadu orang Siria.

¹⁵Sida bejalai nyentuk ngagai Sungai Jordan. Di rantau jalai sida tepedaka gari enggau pekekas ti becherayan ditinggalka orang Siria lebuh sida rari. Udah nya sida pulai, lalu madahka ngagai raja.

¹⁶Orang Samaria lalu beterudus pansut ari nengeri, lalu ngambi perapasan ari kem orang Siria. Lalu munyi ti udah disebut TUHAN, empat kilogram setengah gandum ti pemadu alus, tauka semilan kilogram barli dijual ngena rega sesingkap duit pirak aja.

¹⁷Nyadi raja orang Israel udah ngasuh pengiring iya empu nyaga pintu nengeri nya. Pemesai nya mati ba mua pintu nengeri nya, kena indik bala mayuh, munyi ti udah dipadahka Elisa lebuh raja datai betemu enggau iya.

¹⁸Nyadi Elisa udah madahka ngagai raja, ba urung maya nya, empat kilogram setengah gandum ti pemadu alus, tauka semilan kilogram barli, deka dijual di Samaria ngena rega sesingkap duit pirak,

¹⁹lalu pemesai nya udah nyaut, “Utai nya enda ulih nyadi. Enti sema TUHAN Empu meri gandum nya [12] diatu, enda meh utai nya ulih nyadi!” Lalu Elisa udah nyaut, “Nuan empu deka meda utai nya nyadi, tang nuan enda makai pemakai nya.”

²⁰Nya alai nya meh utai ti nyadi ba pemesai nya. Iya mati kena indik bala mayuh ba mua pintu nengeri nya.