Read Iban 2 Raja 9 Bible Online

2 Raja 9 - Iban bible

2 Raja 9

¹Nyadi sekali nabi Elisa mesanka siku ari bala nabi ti agi biak, lalu bejaku enggau iya, “Besikap nuan, lalu mupuk ngagai Ramot-giliat. Bai kebuk minyak kana tu,

²lalu lebuh nuan datai din, giga Jehu anak Jehosapat, uchu Nimsi. Bai iya kediri ngagai bilik siti,

³tuang minyak kana tu ba pala iya, lalu sebut, ‘TUHAN madahka Diri nata nuan nyadi raja menua Israel.’ Udah nya, angkat nuan ari endur nya enggau naka penyampat.”

⁴Nabi ke biak nya lalu mupuk ngagai Ramot,

⁵alai iya ke tetemuka bala pemesai soldadu benung baum. Ku iya, “Tuan, aku bisi pesan ke nuan.” Jehu lalu nanya, “Nuan deka bejaku enggau sapa?” “Enggau nuan, tuan,” ku nabi nya nyaut.

⁶ Seduai iya lalu tama ngagai bilik siti. Nabi ke biak nya lalu nuang minyak kana ba pala Jehu, lalu ku iya, “TUHAN Allah Taala ke disembah orang Israel nyebut tu ngagai nuan, ‘Aku nata nuan nyadi raja nembiak Aku Israel.

⁷Nuan enda tau enda munuh raja nuan, iya nya anak Ahap, ngambika Aku ulih ngukum Jesebel laban iya udah munuh bala nabi Aku, enggau bala nembiak Aku ti bukai.

⁸Semua sida Ahap sebilik, enggau semua peturun iya enda tau enda dibunuh magang. Aku deka muai semua lelaki ke tuai enggau ke biak ari ruang bilik Ahap.

⁹Aku deka ngereja ruang bilik iya, baka Aku ti udah ngereja ruang bilik Raja Jeroboam menua Israel, enggau Raja Baasa menua Israel.

¹⁰ Jesebel enda dikuburka. Bangkai iya deka diempa ukui di menua Jesril.’ ” Lebuh nabi ti biak nya udah nyebut nya, iya angkat ari bilik nya, lalu rari.

¹¹Jehu lalu pulai ngagai bala pemesai soldadu ti bukai. Sida lalu nanya iya, “Semua utai nadai nama-nama? Nama utai ti dipinta orang ke gila nya tadi ari nuan?” “Kita nemu gaya orang ke baka nya, kutap-kutap ngapa,” ku Jehu nyaut.

¹²“Nadai kami nemu!” ku sida nyaut. “Padahka ngagai kami utai ti disebut iya!” “Iya madahka ngagai aku, TUHAN nyebut: ‘Aku nata nuan nyadi raja menua Israel.’ ”

¹³Bala pemesai ti bukai nya lalu tekala nya nganchau kelambi sida ba pala tangga alai Jehu ke bediri. Sida lalu nyepu terumpit, lalu manjung, “Jehu meh raja!”

¹⁴Udah nya Jehu lalu bepekat ngelaban Raja Joram ti diau di Jesril, alai iya ti udah ngerarika diri, nganti bakal diri gerai udah bekau iya ke beperang di Ramot ngelaban Raja Hasael menua Siria. Ku Jehu bejaku enggau bala pemesai soldadu ti bukai, “Enti kita setanah enggau aku, kita enda tau enda nentuka nadai siku orang enselit pansut ari Ramot lalu madahka pasal utai tu ngagai orang di Jesril.”

¹⁶Udah nya iya lalu nepan kerita perang iya, lalu mansang ngagai Jesril. Nyadi bakal Joram apin suman, lalu Raja Ahasiah bisi dia ngabas iya.

¹⁷Siku jejaga ke nyaga ba menara lalu tepedaka Jehu enggau bala iya datai. “Bisi orang datai nepan kuda mansang kitu!” ku iya ngangau. Disaut Joram, “Asuh siku orang nepan kuda mansang lalu nanya enti orang nya pangan tauka munsuh.”

¹⁸Seruan nya lalu nepan kuda iya lalu mansang ngagai Jehu. Ku iya, “Raja keran deka nemu enti nuan tu pangan tauka ukai.” “Nya ukai pekara nuan!” ku Jehu nyaut. “Titihka aku.” Jejaga ke nyaga ba menara nya lalu madahka seruan nya udah datai ba tekang bala orang nya, tang enda pulai.

¹⁹Siku agi seruan lalu diasuh mansang. Iya mega nanya Jehu munyi ti dulu. Jehu lalu nyaut baru, “Nya ukai pekara nuan. Titihka aku.”

²⁰Jejaga nya madahka seruan nya mega udah datai ba tekang bala orang nya, tang enda pulai. Lalu ku iya nampung jaku iya, “Kepala bala orang nya ngemudika kerita perang; baka gamal Jehu, laban iya ngemudika kerita perang nya baka orang ke gila!”

²¹Raja Joram lalu bejaku, “Sediaka kerita perang aku.” Orang lalu nyendiaka kerita perang iya. Iya enggau Raja Ahasiah lalu bela nepan kerita perang diri empu, deka betemu enggau Jehu. Seduai iya betemu enggau Jehu ba tanah Nabot.

²²“Kati nuan datai mai pemaik?” ku Joram nanya Jehu. Jehu lalu nyaut, “Baka ni ku kitai bisi pemaik, enti kitai agi nyimpan semua penemu manang lalu agi nyembah engkeramba ti dipunka indai nuan Jesebel?”

²³Joram nguingka kerita perang iya, deka rari, lalu ku iya manjung, “Orang tu ngelaban perintah, Ahasiah!”

²⁴Jehu lalu ngambi panah, lalu enggau pengabis pengering iya nimbakka laja iya. Laja nya lalu kena belakang Joram, lalu ngebuska tungkul ati iya. Joram rebah lalu mati dalam kerita perang iya,

²⁵lalu ku Jehu bejaku enggau Bidkar ti nyadi penyaup iya, “Ambi bangkai iya, lalu buai iya ba tanah Nabot. Nuan enda tau enda ingat, lebuh tua sama nepan kuda ari belakang Ahap, apai Raja Joram, TUHAN bisi nyebut leka jaku tu ngelaban Ahap,

²⁶ ‘Aku bisi meda orang munuh Nabot enggau bala anak lelaki iya kemari, lalu Aku besemaya deka ngukum nuan ditu ba tanah tu.’ Nya alai, ambi bangkai Joram,” ku Jehu bejaku enggau orang ke nyadi penyaup iya, “lalu buai bangkai iya ba tanah Nabot, kena ngamatka semaya TUHAN.”

²⁷Lebuh Raja Ahasiah meda utai nya nyadi, iya lalu rari nepan kerita perang iya ngagai nengeri Bet-hagan, digagai Jehu. “Timbak iya,” ku Jehu bejaku enggau bala iya. Sida lalu nimbak iya lebuh iya benung nepan kerita perang iya di rantau jalai ngagai Gur, semak nengeri Iblim. Tang iya agi ulih ngerarika diri, nyentuk nengeri Megido, alai iya ke lalu mati.

²⁸Bala pemesai iya mai bangkai iya pulai ngagai Jerusalem ngena sebuah kerita perang, lalu nguburka iya ba lumbung bala raja di Nengeri David.

²⁹Ahasiah berengkah nyadi raja menua Judah dalam taun ti kesebelas Joram anak Ahap nyadi raja menua Israel.

³⁰Jehu lalu datai di Jesril. Lebuh Jesebel ninga pasal utai ti udah nyadi, iya lalu ngechat lilit mata diri, ngaduka buk iya, lalu nyenguk ke baruh ari jenila istana.

³¹Lebuh Jehu tama nengah pintu penama, Jesebel lalu ngangau, “Simri! [13] Nuan tu pemunuh! Nama kebuah nuan datai kitu?”

³²Jehu engkadah, lalu ngangau, “Sapa setanah enggau aku?” Dua tauka tiga iku pemesai ke gawa di istana nyenguk ari jenila ngagai iya ke baruh.

³³Ku Jehu bejaku enggau sida, “Buai indu nya ke baruh kitu!” Sida lalu muai Jesebel, lalu darah iya bekelimbur teperanchit ngagai dinding enggau ngagai kuda. Jehu lalu mai kuda enggau kerita perang iya ngelanggar bangkai Jesebel.

³⁴Iya tama ngagai istana, lalu makai. Udah nya iya bejaku, “Bai indu ke udah kena sumpah nya ari tu, lalu kuburka iya, laban iya anak raja.”

³⁵Tang orang ke mansang deka nguburka iya nadai tetemuka iya, kelimpah ari keruntuk pala, enggau tulang jari enggau tulang kaki iya.

³⁶ Lebuh sida madahka pekara nya ngagai Jehu, Jehu lalu bejaku, “Tu meh utai ti dipadahka TUHAN, lebuh Iya bejaku ngena nembiak Iya nabi Elijah: ‘Ukui deka makai bangkai Jesebel di nengeri Jesril.

³⁷Rangkah tulang iya deka ngachir ba endur nya baka tai jelu, datai ke orang nyau enda nemu sapa ke bempu bangkai nya.’ ”