Read Iban 1 Bansa Israel 10 Bible Online

1 Bansa Israel 10 - Iban bible

1 Bansa Israel 10

¹Orang Pilistin beperang ngelaban orang Israel ba Bukit Gilboa. Mayuh orang Israel mati ba endur nya, lalu sida ti bukai, nyengkaum Raja Saul enggau bala anak lelaki iya, rari.

²Tang orang Pilistin ulih ngagai sida, lalu munuh anak lelaki Saul ke tiga iku, iya nya Jonatan, Abinadap, enggau Malkisua.

³Balat amat orang belaban ngelingi Saul. Iya lalu kena laban laja munsuh, lalu balat amat bakal.

⁴Ku iya bejaku enggau orang bujang siku ke mai senyata ke iya, “Sintak pedang nuan, lalu bunuh aku, ngambika orang Pilistin ke kapir nya enda ngayahka aku.” Tang orang bujang nya enda berani munuh Saul. Nya alai Saul nyintak pedang iya empu, lalu ngerejang diri ngena pedang nya.

⁵Lebuh orang bujang nya meda Saul udah mati, iya lalu ngerejang diri ngena pedang iya empu, lalu mati.

⁶Nya alai Saul enggau tiga iku anak lelaki iya sama mati, lalu nadai siku ari peturun iya bisi kala megai perintah udah lepas nya.

⁷Lebuh orang Israel ti diau ba Lebak Jesril ninga berita bala soldadu udah rari, lalu Saul enggau bala anak lelaki iya udah mati, sida lalu ninggalka nengeri sida, lalu rari. Udah nya orang Pilistin datai lalu nguan nengeri nya.

⁸Sehari udah bekau perang nya, orang Pilistin lalu ngerampas utai ari bangkai, lalu tetemuka bangkai Saul enggau bangkai anak lelaki iya garing-garing ba Bukit Gilboa.

⁹Sida mumpung pala Saul, muka semua senyata ari tubuh iya, lalu ngasuh bala seruan mai utai nya ngagai serata menua Pilistin, madahka berita manah nya ngagai engkeramba enggau ngagai bansa sida empu.

¹⁰Sida nyimpan senyata Saul dalam sebuah rumah sembiang sida, lalu ngantung pala iya dalam rumah sembiang petara Dagon.

¹¹Lebuh orang Jabes di Giliat ninga pasal utai ti udah dikereja orang Pilistin ngagai Saul,

¹²lelaki ke pemadu berani mansang lalu ngambi bangkai Saul enggau bangkai sida anak lelaki iya, lalu mai sida ngagai Jabes, lalu nguburka sida dia di baruh sebatang kayu oak, lalu bepasa tujuh hari.

¹³ Saul mati laban iya enda tetap ati ngagai TUHAN. Iya enda ngasika pesan TUHAN. Iya nguji minta jaku lalau ari semengat orang ke udah mati,

¹⁴ukai betanya ngagai TUHAN. Nya alai TUHAN munuh iya, lalu nyerahka perintah iya ngagai David anak Jesi.