Read Iban 1 Bansa Israel 14 Bible Online

1 Bansa Israel 14 - Iban bible

1 Bansa Israel 14

¹Raja Hiram di Tire lalu ngasuh seraban orang dagang nemuai ngagai David. Iya ngirumka ngagai David batang kayu sidar, tukang batu, tukang kayu, ngambika sida ngaga sebuah istana ke David.

²Ari nya David nemu TUHAN udah ngasuh iya tegap nyadi raja menua Israel, lalu udah ngasuh menua ti diperintah iya kaya-raja, ke penguntung bala nembiak iya.

³Jerusalem nya meh endur alai David ke ngambi mayuh agi bini, lalu mayuh agi anak lelaki enggau anak indu.

⁴Tu nama bala anak iya ke ada di Jerusalem: Shamua, Sobap, Natan, Solomon,

⁵Ibhar, Elisua, Elpelet,

⁶Nogah, Nepek, Japia,

⁷Elisama, Biliada, [39] enggau Elipelet.

⁸Lebuh orang Pilistin ninga David udah dichiri nyadi raja ke semua menua Israel, bala soldadu sida lalu mansang deka nangkap iya. Lebuh David ninga nya, iya lalu mansang ngelaban sida.

⁹Orang Pilistin datai ba Lebak Repaim, lalu belabuh ngerumpak utai ari menua nya.

¹⁰David lalu betanya ngagai Allah Taala, “Kati tau aku nyerang orang Pilistin? Kati Nuan deka ngasuh aku menang?” TUHAN lalu nyaut, “Serang meh sida! Aku deka ngasuh nuan menang!”

¹¹Nya alai David nyerang sida di Baal-perasim, lalu ngalahka sida. Ku iya, “Allah Taala udah ngena aku ngalahka bala soldadu munsuh baka ai bah.” Nya alai endur nya dikumbai Baal-perasim. [40]

¹²Orang Pilistin rari, lalu ninggalka engkeramba sida. David lalu meri atur ngasuh engkeramba nya ditunu.

¹³Enda lama udah bekau nya orang Pilistin pulai baru ngagai emperan nya, lalu belabuh ngerumpak utai dia baru.

¹⁴David lalu betanya ngagai Allah Taala baru. Allah Taala lalu nyaut, “Anang nyerang sida ari tu, tang kelulung sida, lalu serang sida ari sepiak nyin, semak kayu balsam.

¹⁵Lebuh nuan ninga munyi redup kaki orang bejalai ba puchuk kayu, nya baru nuan tau belabuh nyerang, laban Aku deka bejalai dulu ari nuan lalu ngalahka bala soldadu orang Pilistin.”

¹⁶David lalu ngereja nitihka jaku Allah Taala. Nya alai David muru orang Pilistin ari Gibeon nyentuk ngagai Geser.

¹⁷Berita pasal David ngelekai ngagai semua endur, lalu TUHAN ngasuh semua bansa takut magang ke iya.