Read Iban 1 Bansa Israel 16 Bible Online

1 Bansa Israel 16 - Iban bible

1 Bansa Israel 16

¹Sida lalu mai Peti Lampang Batu Adat nya ngagai langkau kain ti udah disediaka David ke Peti nya, lalu ngengkahka Peti nya dalam langkau kain nya. Udah nya sida lalu ngenjuk piring tunu enggau piring pemaik, ngagai Allah Taala.

²Lebuh David udah tembu ngenjuk piring, iya merekatka orang mayuh dalam nama TUHAN,

³lalu nyadung pemakai ngagai semua sida. Iya meri ngagai siku-siku lelaki enggau indu di menua Israel setuku roti, siti lampang dagin ti udah dipanggang, [42] enggau salai buah anggur.

⁴David ngeletak sekeda orang Lewi nguluka orang nyembah TUHAN Allah Taala ke disembah orang Israel, di mua Peti Lampang Batu Adat nya, belagu sereta muji TUHAN.

⁵Asap diletak nyadi tuai sida, lalu Sekariah nyadika penulung iya. Jeil, Semiramot, Jehiel, Matitiah, Eliap, Benaiah, Obet-edom, enggau Jeil nebah belikan. Asap nebah bebendai,

⁶lalu imam ke dua iku, iya nya Benaiah seduai Jahasil tiap hari nyepu terumpit di mua Peti Lampang Batu Adat nya.

⁷Nya meh terubah iya David meri Asap enggau orang Lewi ti bukai tanggungjawap belagu muji TUHAN.

⁸Beri terima kasih ngagai TUHAN, padahka pemesai kuasa Iya. Tusui ngagai semua bansa utai ti udah dikereja Iya.

⁹Belagu muji TUHAN. Tusui pasal pengawa ti badas ti udah dikereja Iya.

¹⁰Gaga ati meh kita ke enggi Iya. Awakka semua orang ke nyembah Iya rami gaga magang!

¹¹Mansang ngagai TUHAN minta saup, lalu seruran nyembah Iya.

¹²Kita peturun Jakop ke nembiak Allah Taala, peturun Israel, ti udah dipilih Allah Taala, kingatka kereja ajih ti udah dikereja Allah Taala enggau ukum ti udah diletak Iya.

¹⁴TUHAN endang Allah Taala kitai. Pesan Iya endang diberi ngagai semua dunya.

¹⁵Anang enda ingatka sempekat Allah Taala, ti udah digaga Iya meruan belama iya,

¹⁶ sempekat ti udah digaga Iya enggau Abraham, semaya ti udah digaga Iya enggau Isak.

¹⁷ TUHAN ngaga sempekat enggau Jakop, sempekat ti meruan belama iya.

¹⁸“Aku deka meri menua Kanaan ngagai nuan,” ku Iya bejaku. “Menua nya deka nyadika pesaka nuan.”

¹⁹Nembiak Allah Taala endang enda mayuh, nyadi orang kampar di menua Kanaan.

²⁰Sida segau-segau bejalai ari menua siti ngagai menua siti, ari perintah siti ngagai perintah siti.

²¹ Tang Allah Taala enda nejuka orang nekanka pengidup sida. Kena Iya nyaga sida, Iya meri jaku tangkan ngagai bala raja.

²²“Anang ngemediska bala nembiak ti udah dipilih Aku. Anang negu bala nabi Aku.”

²³Belagu ke TUHAN, semua dunya! Padahka tiap hari berita manah pasal Iya ti udah meri kitai pengelepas.

²⁴Padahka pasal mulia Iya ngagai semua menua, enggau pasal pemesai pengawa ti udah dikereja Iya, ngagai semua bansa.

²⁵TUHAN endang besai lalu endang patut dipuji. Iya endang patut lebih agi dikenangika ari semua petara.

²⁶Petara semua bansa nya semina engkeramba aja, tang TUHAN udah ngaga langit.

²⁷Iya endang bemulia sereta bekuasa. Kuasa enggau pengaga ngemenuhka Rumah Sembiang Iya.

²⁸Puji meh TUHAN, semua kita ke diau di dunya. Puji meh mulia enggau pengering Iya.

²⁹Puji meh nama TUHAN ti bemulia. Bai meh piring lalu datai ngagai Rumah Sembiang Iya. Meremi meh kita di mua Iya ti Kudus lebuh Iya pegari.

³⁰Begetar meh kita di mua Iya, semua dunya! Dunya udah diengkahka ba endur iya, lalu enda ulih dikinsitka agi.

³¹Gaga ati meh kita, tanah enggau langit! Padahka ngagai semua bansa TUHAN nya Raja.

³²Begelumbang meh nuan tasik, lalu inggar meh utai ti dalam nuan. Gaga ati meh kita umai, enggau semua utai ti dalam kita!

³³Kayu ti dalam utan deka manjung gaga ati lebuh TUHAN datai lalu merintah dunya.

³⁴ Beri terima kasih ngagai TUHAN, laban Iya endang manah. Pengerindu Iya meruan belama iya.

³⁵Sebut ngagai Iya, “Selamatka kami, O Allah Taala ti Juruselamat kami. Gempuruka kami. Lepaska kami ari menua bukai, ngambika kami nemu meri terima kasih lalu muji nama Nuan ti kudus.”

³⁶Pujika TUHAN Allah Taala ke disembah orang Israel! Puji Iya diatu enggau ke belama iya! Udah nya semua orang mayuh nyebut, “Amin,” lalu muji TUHAN.

³⁷Raja David ngeletak Asap enggau orang Lewi ti bukai bekereja tetap nguluka orang besembiang ba endur alai Peti Lampang Batu Adat disimpan. Sida ngereja pengawa sida dia tiap hari.

³⁸Sida ditulung Obet-edom anak Jedutun enggau enam puluh lapan iku orang ari raban peturun iya empu. Hosah seduai Obet-edom nyadi tuai nyaga pintu.

³⁹Tang Imam Sadok enggau bala sida ke sama nyadi imam baka iya, nguluka orang nyembah TUHAN ba endur alai besembiang di Gibeon.

⁴⁰Genap pagi enggau genap lemai sida enda tau enda nunu piring segala ba alta nitihka jaku ti udah ditulis dalam Adat ti udah diberi TUHAN ngagai orang Israel.

⁴¹Orang ke enggau sida dia nya Heman seduai Jedutun, enggau sida ti bukai ke endang udah dipilih belagu muji TUHAN ketegal pengerindu Iya ti meruan belama iya.

⁴²Heman seduai Jedutun mega ngemataka terumpit enggau bebendai, enggau pekekas musik ti bukai ti ditebah lebuh orang muji TUHAN. Raban raban peturun Jedutun nyadi kepala nyaga pintu.

⁴³ Udah nya semua orang pulai magang, lalu David pulai ke rumah ngagai sida sebilik.