Read Iban 1 Bansa Israel 17 Bible Online

1 Bansa Israel 17 - Iban bible

1 Bansa Israel 17

¹Raja David diatu nyau diau dalam istana iya empu. Nyadi sekali iya mesanka nabi Natan, lalu bejaku enggau iya, “Aku diatu diau dalam rumah ti digaga ari kayu sidar, tang Peti Lampang Batu Adat TUHAN disimpan dalam langkau kain!”

²Disaut Natan, “Kereja aja utai ti ku ati nuan, laban Allah Taala bisi enggau nuan.”

³Tang malam nya Allah Taala bejaku ngagai Natan,

⁴“Alai nuan madahka jaku Aku tu ngagai nembiak Aku David, ‘Nuan ukai orang ke diasuh Aku ngaga Rumah alai Aku diau.

⁵Kenyau ari maya Aku ngelepaska orang Israel ari menua Ejip, nyentuk ngagai diatu, Aku nadai kala diau dalam rumah. Aku endang semampai diau dalam langkau kain, lalu mindah ari endur siti ngagai endur siti.

⁶Sekumbang Aku ke bejalai enggau orang Israel, Aku nadai kala nanya ngagai bala tuai ti udah diletak Aku, kebuah alai sida enda ngaga rumah ari kayu sidar ke Aku.”

⁷“Nya alai padahka ngagai nembiak Aku David, Aku TUHAN ti Pemadu Bekuasa nyebut tu ngagai iya, ‘Aku udah ngambi nuan ari pengawa nuan ke ngibun bedus, lalu ngaga nuan nyadi raja ke bala nembiak Aku Israel.

⁸Aku endang seruran enggau nuan di sebarang endur nuan bejalai, lalu Aku udah ngalahka semua munsuh nuan, lebuh nuan majakka pejalai nuan. Aku deka ngaga nuan beberita baka bala tuai ti beberita di dunya tu.

⁹Aku udah milih siti endur ke bala nembiak Aku Israel, lalu Aku udah ngasuh sida ngentapka diri dia, alai sida deka diau, lalu enda agi ditekanka orang. Kenyau ari maya sida udah tama ngagai menua tu, sida udah diserang orang ke mangah, tang utai ti baka nya nadai agi nyadi. Aku besemaya deka ngalahka semua munsuh nuan, lalu meri ngagai nuan mayuh peturun.

¹¹Lebuh nuan mati, lalu dikuburka begulai enggau bala aki ini nuan, Aku deka ngasuh siku ari bala anak lelaki nuan nyadi raja, lalu Aku deka ngasuh perintah iya kering.

¹²Iya nya meh orang ke deka ngaga rumah Aku, lalu Aku deka nentuka perintah iya meruan belama iya.

¹³ Aku deka nyadi Apai iya, lalu Iya deka nyadi anak lelaki Aku. Aku enggai badu rinduka iya, enda baka Aku enggau Saul, ti udah dibuai Aku ngambika nuan ulih nyadi raja.

¹⁴Aku deka ngasuh iya nyadi tuai ke bala nembiak Aku, enggau nyadi tuai ke perintah Aku belama iya. Perintah iya enda nemu abis.’ ”

¹⁵Natan lalu madahka ngagai David semua utai ti udah dipandangka Allah Taala ngagai iya.

¹⁶Udah nya David lalu tama ngagai Langkau Kain TUHAN, duduk lalu besampi, “Aku tauka ruang bilik aku enda patut nerima semua utai ti udah dikereja Nuan ke aku, TUHAN Allah Taala.

¹⁷Tang taja pia, Nuan diatu ngereja lebih agi ari nya. Nuan udah ngaga semaya pasal peturun aku jemah ila, lalu Nuan, TUHAN Allah Taala, udah ngaga aku nyadi orang ke besai. [43]

¹⁸Nama utai bukai ti tau disebut aku ngagai Nuan? Nuan amat nemu aku, tang taja pia, Nuan masa aku, ke nembiak Nuan.

¹⁹Nuan ngereja nya ke aku laban nya endang peneka enggau juluk ati Nuan, kena Nuan nunjukka aku deka nyadi orang ke besai jemah ila.

²⁰TUHAN, nadai orang baka Nuan. Kami endang nemu, semina Nuan siku aja ti Allah Taala.

²¹Nadai bansa bukai di dunya tu baka bansa orang Israel, ti udah dilepaska Nuan ari pengidup sida ke nyadi ulun, ngambika sida nyadi nembiak Nuan. Nuan udah ngereja pengawa ti besai sereta badas ke sida, lalu berita pasal Nuan ngelekai di serata dunya. Nuan udah ngelepaska bala nembiak Nuan ari menua Ejip, lalu udah muru semua bansa bukai lebuh bala nembiak Nuan nyerang.

²²Nuan udah ngaga Israel nyadi nembiak Nuan belama iya, lalu Nuan, TUHAN, nyadi Allah Taala sida.

²³“Nya alai, diatu O TUHAN, kamatka belama iya semaya ti udah digaga Nuan pasal aku enggau pasal peturun aku, lalu kereja meh utai ti ku Nuan.

²⁴Nama Nuan deka tebilang, lalu orang deka nyebut belama iya, ‘TUHAN ti Pemadu Bekuasa nya Allah Taala ke disembah orang Israel.’ Lalu Nuan deka ngasuh perintah aku meruan belama iya.

²⁵Aku berani nyebut sampi tu ngagai Nuan, Allah Taala aku, laban Nuan udah mandangka semua utai tu ngagai aku, ke nembiak Nuan, lalu udah madahka ngagai aku pasal Nuan ti deka ngasuh peturun aku nyadi raja.

²⁶Nuan, TUHAN, endang Allah Taala, lalu Nuan udah ngaga semaya ti manah tu ngagai aku.

²⁷Aku minta Nuan merekatka peturun aku, ngambika sida deka seruran gaga ati dikerinduka Nuan. Nuan, TUHAN, udah merekatka sida, lalu berekat Nuan deka meruan ba sida belama iya.”