Read Iban 1 Bansa Israel 18 Bible Online

1 Bansa Israel 18 - Iban bible

1 Bansa Israel 18

¹Nyau kelama udah bekau nya, Raja David nyerang orang Pilistin baru, lalu ngalahka sida. Iya ngerampas nengeri Gat enggau genturung pendiau ti ngelingi nengeri nya ari jari sida.

²Iya mega ngalahka orang Moap, ke lalu nyadi nembiak iya, sereta mayar chukai ngagai iya.

³Udah nya, David nyerang Raja Hadadeser sitak menua Sobah di menua Siria, semak menua Hamat, laban Hadadeser udah nguji ngerampas perintah di menua ti ngimbai ulu Sungai Eupratis.

⁴David lalu ngerampas seribu buah kerita perang Hadadeser, tujuh ribu iku soldadu ke nepan kuda, enggau dua puluh ribu iku soldadu ke bejalai kaki. David ninggalka kuda semina chukup dikena seratus buah kerita perang, tang mutuska rakat semua kuda ti bukai.

⁵Lebuh orang Siria ari Damaskus ngasuh bala soldadu datai nulung Raja Hadadeser, David nyerang sida lalu munuh dua puluh dua ribu iku ari bala sida.

⁶Udah nya iya lalu nirika kem soldadu di menua sida, lalu orang Siria nyadi nembiak iya, lalu mayar chukai ngagai iya. TUHAN ngasuh David menang di semua endur.

⁷David ngerampas terabai emas ti dibai bala pemesai Hadadeser, lalu mai terabai nya ngagai Jerusalem.

⁸ Iya mega ngambi mayuh amat perengka temaga ari Tibhat enggau ari Kun, iya nya dua buah nengeri ti dipegai Hadadeser. (Udah bekau nya, Solomon ngena temaga nya begagaka tangki, berapa iti batang tiang ti besai, enggau perengka temaga ti bukai ke Rumah Sembiang.)

⁹Lebuh Raja Tou di Hamat ninga David udah ngalahka semua bala soldadu Hadadeser,

¹⁰iya lalu ngasuh anak iya Joram meri tabi basa enggau jaku puji ngagai David ketegal iya udah ngalahka Hadadeser, ke suah udah dilaban Tou. Joram mai ngagai David pemeri ti digaga ari emas, pirak enggau temaga.

¹¹Raja David lalu nyerahka semua utai nya ngagai TUHAN, sama enggau pirak enggau emas ti udah diambi iya ari semua bansa ti udah dialahka iya, iya nya bansa Edom, Moap, Amon, Pilistin, enggau bansa Amalek.

¹² Abisai - indai iya Seruiah - udah ngalahka orang Edom ba Lebak Garam, lalu munuh lapan belas ribu iku bala munsuh.

¹³Iya lalu nirika kem soldadu di serata menua Edom, lalu orang Edom nyadi nembiak Raja David magang. TUHAN ngasuh David menang di semua endur.

¹⁴David merintah semua menua Israel, lalu iya bejalaika atur ti lurus sereta betul ngagai semua nembiak iya.

¹⁵Menyadi Abisai ke benama Joap nya tuai soldadu. Jehosapat anak Ahilut nyadi tukang tulis ke semua utai ti nyadi.

¹⁶Sadok anak Ahitup enggau Ahimelek anak Abiatar nyadi imam. Seraiah [44] nyadi kerani kot.

¹⁷Benaiah anak Jehoiada nyadi tuai orang ke nyaga David, lalu bala anak Raja David megai pangkat ti tinggi dalam perintah iya.